په‌رله‌مانتارێكی یه‌كێتی له‌ڕێی سه‌رۆكوه‌زیرانه‌وه‌ ناهاوسه‌نگی دامه‌زراندن راده‌گرێت

PUKMEDIA

دیلان غەفور ئەندامی ئەنجومەنی نوێنەرانی عیراق

ئه‌ندامێكی ئه‌نجومه‌نی نوێنه‌رانی عیراق داوایه‌ك ئاڕ‌استه‌ی سه‌رۆكوه‌زیرانی عیراق ده‌كات و ده‌ڵێت: "پێویسته‌ جیاكاری نه‌كرێت له‌نێوان پێكهاته‌كانی كه‌ركوكداو كورد بێبه‌ش نه‌كرێت له‌ وه‌رگرتنی خوێندكاران له‌په‌یمانگای باڵای په‌ره‌پێدانی ئاسایش و ئیداری".

دیلان غه‌فور ئه‌ندامی ئه‌نجومه‌نی نوێنه‌رانی عیراق له‌ فراكسیۆنی یه‌كێتیی نیشتمانیی كوردستان به‌ PUKMEDIA ی راگه‌یاند: "دوای ئه‌وه‌ی بۆمان ده‌ركه‌وت ناهاوسه‌نگی هه‌یه‌ له‌ وه‌رگرتنی خوێندكاران له‌ په‌یمانگای باڵای په‌ره‌پێدانی ئاسایش و ئیداریی، هه‌روه‌ها جیاوازی له‌ نێوان پێكهاته‌كانی كه‌ركوك ده‌كرێت و كورد بێبه‌ش ده‌كرێت، بۆیه‌ به‌نوسراوێك داوامان له‌ سه‌رۆكوه‌زیرانی عیراق كرد كه‌ ره‌چاوی هاوسه‌نگی بكرێت له‌ خولی 30 هه‌مینی په‌یمانگاكه‌".

"سه‌رۆكوه‌زیران داواكه‌مانی به‌ هه‌ند وه‌رگرت و ئاڕ‌استه‌ی وه‌زاره‌تی ناوخۆی كرد، كه‌ پێویسته‌ هاوسه‌نگی هه‌بێت له‌ دامه‌زراندن و جیاوازیی نه‌كرێت و هیچ پێكهاته‌یه‌ك په‌راوێز نه‌خرێت"، دیلان غه‌فور وای وت.

ئه‌ندامه‌كه‌ی ئه‌نجومه‌نی نوێنه‌رانی عیراق سوپاسی وه‌زیری دادی عیراقی كردو ئاماژه‌ی به‌وه‌شدا: "خالید شوانی وه‌زیری دادی عیراق به‌رده‌وام له‌م دۆسیه‌یانه‌دا هاوكاریمان ده‌كات، بۆیه‌ پێویسته‌ سوپاسی بكه‌ین، هه‌روه‌ها له‌نزیكه‌وه‌ چاودێریی ئه‌م پرسه‌ ده‌كه‌ین و به‌دواداچوونمان به‌رده‌وام ده‌بێت".
PUKMEDIA

دەقی ئەو نووسراوەی کە ئاڕاستەی سەرۆکوەزیران کراوە