لێپرسراوی پەیوەندییەکانی دەرەوە: یاسا بکرێتە چارەسەری کێشەکان

PUKMEDIA

دارا خەیلانی و ئاراكاوا میكیهیرۆ

ئەمڕۆ چوارشەممە٢٠-٣-٢٠٢٤، هەڤاڵ دارا خەیلانی ئەندامی سەرکردایەتی و لێپرسراوی پەیوەندییەکانی دەرەوە، لە مەکتەبی سیاسی لە هەولێر، پێشوازی لە ئاراكاوا میكیهیرۆ کونسوڵی ژاپۆن لە هەرێمی کوردستان کرد.

لە دیدارەکەدا دۆخی سیاسی هەرێمی کوردستان و عیراق و هەڵبژاردنی پەرلەمانی کوردستان و کێشەکانی نێوان هەولێر و بەغدا گفتووگۆیان لەبارەوە کرا و جەخت لە بەردەوامی گفتووگۆکان کرایەوە لە پێناو چارەسەری رێشەیی ئاڵەنگارییەکان و پابەندبوون بە دەستور و رێککەوتنە سیاسییەکان.

پاشان هەڤاڵ دارا خەیلانی هەڵوێستی یەکێتیی نیشتمانیی کوردستانی روونکردەوە و ئاماژەی بەوەکرد: "یەکێتیی پێداگری دەکات لە هەڵبژاردنێکی پاک و بێگەرد لەو وادەیەی دیاریکراوە، چونکە چارەسەری یەکجارەکی کێشەکان تەنها لەڕێگەی هەڵبژاردنێکی ڕاستەقینەو چارەنووس ساز دەبێت کە هەمووان نوێنەری ڕاستەقینەی خۆیان هەڵدەبژێرن، ئەمەش سەرەتایەکی گرنگە بۆ پاراستن و بەهێزترکردنی قەوارەی هەرێمی کوردستان و چارەسەرکردنی کێشە هەڵپەسێردراوەکانی نێوان هەرێم و بەغدا، بەتایبەتی کێشەی مووچە و گوزەرانی خەڵک".

"نابێت کێشە و ململانێ سیاسییەکان تێکەڵ بە ژیانی هاووڵاتیان و ئاسایشی ووڵات بکرێت و پێویستە لە ڕێگەی یاساوە هەموو کێشەکان چارەسەر بکرێت، لە پێناو بەدیهێنانی داهاتوویەکی گەش بۆ کۆمەڵانی خەڵکی کوردستان"، دارا خەیلانی وادەڵێت.
PUKMEDIA