داوای هەڵگرتنی گەمارۆی سەر فڕۆکەخانەی نێودەوڵەتی سلێمانی دەکرێت

PUKMEDIA

وێنەیەک لە کۆبوونەوەکە

سەرۆکی لیژنەی گواستنەوەو پەیوەندییکردنی پەرلەمانی عیراق رایدەگەیەنێت: "فڕۆکەخانەی سلێمانی هیچ گرفتێکی تەکنیکی و ئیداری نیە". داواشیکرد تورکیا پێداچونەوە بەبڕیارەکانی سەبارەت بە فڕۆکەخانەی سلێمانی بکات.

لە پارێزگای بەسرە لیژنەی گواستنەوە و پەیوەندییکردنی پەرلەمانی عیراق لەگەڵ عەلی رەزا کۆنای باڵیۆزی تورکیا لە عیراق و کونسوڵی تورکیا لە بەسرە و وەفدێکی باڵای وەزارەتی گواستنەوەی تورکیا کۆبووەوە، هەروەها لیژنەکەی ئەنجومەنی نوێنەران داوای لە باڵیۆزی تورکیا لە عیراق کرد، ئابلوقەی سەر فڕۆکەخانەی سلێمانی هەڵبگرێت.

سەرۆک مام جەلال ئەندازیاری پەیوەندیی نێوان تورکیا و  گەلی کوردستان بوو

کاروان یاروەیس ئەندامی ئەنجومەنی نوێنەرانی عیراق بە سایتی رەسمی یەکێتیی نیشتمانیی کوردستان PUKMEDIA ی راگەیاند: "داوام کرد وەک دەستپێشخەرییەک بۆ قۆناغێکی نوێی پەیوەندییەکانیان لەگەڵ یەکێتی، تورکیا ئابلۆقەی سەر فرۆکەخانەی سلێمانی لاببات، کە زیاتر هاووڵاتیان لێ زیانمەندن".

 "یەکێتی حزبی سەرۆک مام جەلالە کە ئەندازیاری ئاشتی و پەیوەندیی دۆستانەی نێوان تورکیاو  گەلی کوردستان بووە"، کاروان یاروەیس وای وت.

فڕۆکەخانەی سلێمانی گرفتی تەکنیکی نییە

زەهرە ئەلپەجاری سەرۆکی لیژنەی گواستنەوەو پەیوەندییکردنی پەرلەمانی عیراقیش رایگەیاند: "وەک ئەرکی لیژنەکەمان بەدواداچوونمان کردوەو فرۆکەخانەی سلێمانی هیچ گرفتێکی تەکنیکی و ئیداری نیە و داوای کرد تورکیا پێداچونەوە بەبڕیارەکانی سەبارەت بە فرۆکەخانەی سلێمانی بکات".
PUKMEDIA