لەسلێمانی پرسەی ماتەمینی بۆ د.جەمال فوئاد دادەنرێت

خولێخۆشبوو د. جەمال فوئاد ، وەزیری پێشووتری كشتوكاڵ لە حكومەتی هەرێمی كوردستان

بڕیارە رۆژی شەممە 8-10 پرسەی خوالێخۆشبوو د.جەمال فوئاد وەزیری پێشووتری كشتوكاڵ لە حكومەتی هەرێمی كوردستان، لە مزگەوتی شێخ فەرید لە شاری سلێمانی بەڕێوەبچێت، کە رۆژی 28-9-2022  لە ئەمریکا کۆچیدوایی کرد.

د. جەمال برای هەردوو خوالێخۆشبوو د.كەمال فوئاد ئەندامی دەستەی دامەزرێنەری یەكێتیی نیشتمانیی كوردستان و د. ئیحسان فوئادە.

بەپێی زانیارییەکانی PUKMEDIA تەرمی خوالێخۆشبوو لە ویلایەتی کالیفۆرنیای ئەمریکا بەخاک سپێردراوەو پرسەی ژنان و پیاوان لە مزگەوتی شێخ فەرید دەبێت لە سلێمانی.

د. جەمال فوئاد ساڵی 1928 لە سلێمانی لەدایکبووەو كەسایەتییەكی رۆشنبیر و ناسراو بوو، هەروەها پسپۆری بواری كشتوكاڵ بووە و پەیوەندییەكی پتەوەی لەگەڵ ناوەندە نێودەوڵەتییەكان و رێكخراوە جیهانییەكان دا هەبوو.

هەروەها ساڵانێكی زۆر وەك مامۆستا لە زانكۆی سلێمانی  خزمەتی كردووە و لەسەر دەستی ئەو چەندین خوێندكار و پسپۆری ئەكادیمی پێگەیشتوون.

یەكێك لە كارە جوانەكانی بۆ شاری سلێمانی سەوزكردن و بە دارستانكردنی بناری چیای گۆیژە بوو، هەروەها پەرۆشێكی راستەقینەی بواری ژینگە بووە و جێدەستی دیارە.

د.جەمال فوئاد بە نەخۆشی دڵ لە ویلایەتی كالیفۆرنیا لە ئەمریكا، ئێوارەی رۆژی 28-9-2022، كۆچیی دواییكرد.

PUKMEDIA