سەرۆك بافڵ: بەڵێنە یەكێتییەكەت وەك چاومان دەپارێزین

بافڵ جەلال تاڵەبانی سەرۆكی یەكێتیی نیشتمانیی كوردستان

هەڤاڵ بافڵ جەلال تاڵەبانی سەرۆكی یەكێتیی نیشتمانیی كوردستان لە ساڵیادی ماڵئاوایی شكۆی نەتەوە ونیشتمان سەرۆك مامجەلال دا دەڵێت:"بەڵێنمان بە رۆحی تۆ و خەڵكە دڵسۆزەكەماندا یەكێتییەكەت وەك چاومان بپارێزین، ژیانی حزبایەتیمان خستەوە سەر رێچكە تەندروستەكە" و "ئێستاش دوای ساڵێك بەویژدانێكی ئارامەوە بۆت دەنووسم هەر ئەوەمان ئەنجامدا كە لێمان چاوەڕێدەكرا، رێگریمان لە بەهەدەردانی سامانی گشتی كردووە و رووبەڕووی نایەكسانی و نادادی وەستاوینەتەوە. بەكارهێنانی پلە و پۆستمان بۆ بەرژوەندی تایبەت و دەستبردن بۆ مافی گشتی قەدەغە كردووە".

 سەرۆك بافڵ جەلال تاڵەبانی لە پەیامێكی كورتی بە ناوی " بۆ باوكم"  لە پەیجی خۆی لە تۆڕی كۆمەڵایەتی فەیسبووك بڵاوكردەوە و  دەنوسێت:" بەداخەوە لەم دواییەدا كەسانێك رێگەكەیان ونكرد و چەپكەگوڵەكەیان بەرەو وشكبوون دەبرد. ئاراممان گرت و پشوومان درێژ، بەڵام لەكۆتاییدا بڕیارە دروست و مێژووییەكەمان دا و یەكێتیمان بەرەو ڕێگە راستەقینەكە ئاڕاستەكرد".

ئەمە دەقی پەیامەكەی سەرۆك بافڵە..

باوكی ئازیزم
پێنج ساڵی تەواوە لێرەنیت و دەمەوێت بە ئەوپەڕی راستگۆیی، دڵێكی پڕ لە هیوا و ویژدانێكی ئاسوودەوە لەبارەی گۆڕانكارییەكانی ئەمدواییەی یەكێتی، كوردستان و عیراقەوە بۆت بنووسم.
دەمەوێت بگەڕێمەوە بۆ شەست ساڵ لەمەوبەر، ئەوكاتەی بە ورەیەكی پۆڵایین و هێزێكی لەبن نەهاتووەوە وەك رێبوارێكی رێگای ئازادی و شكۆمەندی، خەمی كورد و كوردستانت كردە كۆڵ و ژیانت كردە قوربانیی ئەو ئامانج و بەها پیرۆزانەی هەرگیز سازشت لێنەكرد. ئامانجێك كە خۆی لە بەدیهێنانی مافە رەواكانی گەلی كورد، دادپەروەری، دیموكراسی، تەبایی و پێكەوەژیاندا دەبینییەوە. دامەزراندنی یەكێتیی نیشتمانیی كوردستانیش لەگەڵ هاوخەبات و هاوڕێكانتدا هەر لەوپێناوەدا بوو.
لای هەمووان روون و ئاشكرایە پاراستنی یەكێتی ناو یەكێتی و دەستگرتن بە سیاسەتی چەپكەگوڵەكەوە خەمی گەورەی تۆ بوو. دەتویست یەكێتیی نیشتمانیی كوردستان سەنگەرێك بێت بۆ بەرگری لە خاكی كوردستان و دۆزە رەواكانی گەلی كورد. وێستگەیەك بێت بۆ كۆكردنەوەی جیاوازییەكان و بونیادنانی كۆمەڵگەیەكی دیموكراسی و تەندروست. بەڵام بەداخەوە لەم دواییەدا كەسانێك رێگەكەیان ونكرد و چەپكەگوڵەكەیان بەرەو وشكبوون دەبرد. ئاراممان گرت و پشوومان درێژ، بەڵام لەكۆتاییدا بڕیارە دروست و مێژووییەكەمان دا و یەكێتیمان بەرەو ڕێگە راستەقینەكە ئاڕاستەكرد. بەڵێنمان بە رۆحی تۆ و خەڵكە دڵسۆزەكەماندا یەكێتییەكەت وەك چاومان بپارێزین. ژیانی حزبایەتیمان خستەوە سەر رێچكە تەندروستەكە و هەموو ئۆرگانەكانمان كردووەتە ناوەندێك بۆ خزمەتكردنی خەڵكی كوردستان. ئەمەش هەر ئەوەبوو كە تۆ دەتویست.

دەمانەوێت لەگەڵ خوا و خەڵكەكەمان راستگۆبین. لەئاست ئەو بەرپرسیارێتییە نەتەوەیی و نیشتمانییەدا بین كە وەرمانگرتووە. یەكێتی هەڵگری سیاسەتێكی حەكیمانە و تەندروست بێت وەك ئەوەی خۆت پەیڕەوت دەكرد. بەدیدگایەكی نیشتمانییەوە كار بۆ بەرژەوەندییە گشتی و باڵاكان بكەین و خزمەتی خاك و خەڵكە خۆشەویستەكەمان بكەین. هەوڵ بۆ بەدیهێنانی دادپەروەری بدەین و پەرە بە گیانی تەبایی و پێكەوەژیان بدەین. رێز لە جیاوازییەكان بگرین و دەرگامان بەڕووی رەخنە و گلەییەكاندا كراوە بێت. دەمانەوێت ژینگەیەك فەراهەم بكەین كە تاكەكان هەست بە ئارامی و پارێزراوی بكەن. دەزانین رێگەكەمان سەختە و بەربەستەكان زۆرن، بەڵام بەڵێنێكە و داومانە (نەسرەوتن تا سەركەوتن).

ساڵی رابردوو و لە چوارەمین ساڵیادی كۆچتدا بۆم نووسیت هەر بڕیارێك داومانە و دەیدەین لەپێناو چاكەی گشتیدا بووە و دەبێت. ئێستاش دوای ساڵێك بەویژدانێكی ئارامەوە بۆت دەنووسم هەر ئەوەمان ئەنجامدا كە لێمان چاوەڕێدەكرا. رێگریمان لە بەهەدەردانی سامانی گشتی كردووە و رووبەڕووی نایەكسانی و نادادی وەستاوینەتەوە. بەكارهێنانی پلە و پۆستمان بۆ بەرژوەندی تایبەت و دەستبردن بۆ مافی گشتی قەدەغە كردووە. یاساشكێنانمان داوەتە دادگا و ئارامی و ئاسایشمان لەپێشینەی ئەركەكانمان داناوە. لەبوارەكانی تەندروستی، پەروەردە و ژینگە خزمەتی زۆرمان پێشكەشكردووە و بەردەوامیش دەبین.

لە ماوەی رابردوودا عیراق، ئەو وڵاتەی تۆ سەرۆككۆماری بوویت، بەدۆخێكی هەستیار و تەنگژەیەكی قووڵی سیاسیدا تێپەڕی. ڕوانینێكی سادە بۆ دۆخەكە ئەو راستییەی دەردەخست كە كۆچی تۆ چ بۆشاییەكی لە گۆڕەپانی سیاسیدا دروستكردووە. بەڵام نائومێد نەبووین، بەسوودوەرگرتن لە ئەزموون و گەنجینەی پڕ گەوهەری تۆ لە هەوڵەكانمان بۆ تێپەڕاندنی دۆخەكە و كۆكردنەوەی لایەنەكان لەپێناو هاوبەشیی راستەقینە و سازان بەردەوام بووین. یەكێتیی نیشتمانیی كوردستان سیاسەتی حەكیمانەی تۆی پەیڕەوكرد و هەمووان شاهیدی ئەو راستییەمان بۆ دەدەن كە بەشێك بووین لە چارەسەر نەوەك ئاڵۆزی. بۆ ئەمەش خۆمان بە قەرزار و سوپاسگوزارت دەزانین.
یادت بەخێر شكۆی نەتەوە و نیشتمان
مێژوو بەشانازییەوە ناوت دەهێنێت

كوڕی خۆت
بافڵ

PUKMEDIA