ئەنجومەنی سەركردایەتی یەكێتی كۆدەبێتەوە

کۆبوونەوەی ئەنجومەنی سەرکردایەتی یەکێتیی نیشتمانیی کوردستان

ئەنجومەنی سەركردایەتی بە سەرپەرشتی هەڤاڵ بافڵ جەلال تاڵەبانی سەرۆكی یەكێتیی نیشتمانیی كوردستان كۆدەبێتەوە و تەوەری سەرەكی رێكخستنەوەی ئۆرگان و مەڵبەند و مەكتەبەكانی یەكێتییە.
كۆبوونەوەكەی ئەنجومەنی سەركردایەتی درێژكراوەی كۆبووەنەوەكانی پێشووترە، و بڕیارە رۆژی پێجشەممە 29-9-2022 بەرێوەبچێت.
مستەفا محەمەد عەبدوڵا(مستەفا چاڵاوی) جێگری سكرتێری ئەنجومەنی سەركردایەتی یەكێتیی لە لێدوانێكیدا بە PUKMEDIA سایتی رەسمی یەكێتیی نیشتمانیی كوردستان-ی راگەیاند:"لەو كۆبوونەوەیەدا بەسەرپەرشتی سەرۆك بافڵ جەلال تاڵەبانی سەرۆكی یەكێتی قسە لەسەر راپۆرتی مەكتەبەكانی راگەیاندن، بیرو گەشەپێدانی هۆشیاریی، رێكخراوە دیموكراتییەكان، شەهیدان وتێكۆشەران، ناوەندەكانی دەرەوە، كاروباری كۆمەڵایەتی و پێكهاتەكان دەكرێت".
مەكتەب و ئۆرگانەكان راپۆرتی رێكخستنەوە و كاركردن و پلان و ستراتیژیی ئامادەدەكەن و لە ئەنجومەنی سەركردایەتی بەوردی تاووتوێ دەكرێن.
جێگری سكرتێری ئەنجومەنی سەركردایەتی یەكێتیی نیشتمانیی كوردستان دەڵێت: "پێشنیازی مەكتەب و ئۆرگانەكان بۆ رێكخستنەوە و زانینی كێشە و گرفتەكان، تا وەكو بە چارەسەرە جێبەجێ بكرێت لە پێناوی گەشەپێدانی زیاتری سەرجەم ئۆرگانەكانی یەكێتیی".
ئەم زنجیرە كۆبوونەوانەی ئەنجومەنی سەركردایەتی یەكێتیی نیشتمانیی كوردستان بەردەوام دەبن تا ئۆرگانەكان رێكدەخرێنەوە.
PUKMEDIA