دوکان.. ئامادەکاری بۆ رۆژانی جەژن دەکرێت

ئەمرۆ چوار شەممە لایەنە پەیوەندیدارەکانی قەزای دوکان کۆبوونەوەیەکیان ئەنجامدا تایبەت بە ئامادەکاری بۆ رۆژانی جەژن، قائیمقامی قەزای دوکانیش لەو بارەیەوە راگەیاند، لە کۆبوونەوەکەدا رۆڵی هێزە ئەمنییەکان و لایەنی تەندروستیش دیاریکراوە لە پێناو سەلامەتی گیانی ئەو گەشتیار و هاووڵاتیانەی کە روو لە قەزاکە دەکەن.

سیروان سەرحەد قائیمقامی قەزای دوکان بە PUKmedia ی راگەیاند  : بە ئامادەبوونی سەرۆکی شارەوانی و بەڕێوەبەری گەشتوگوزار و بەڕێوەبەری نەخۆشخانەی شەهید غەریب هەڵەدنی بەمەبەستی ئامادەکاری بۆ رۆژانی جەژن کۆبونەتەوە، لەگەڵ هاتنی هەر بۆنەیەکدا لیژنەی ئەمنی و لایەنە خزمەتگوزاری و تەندروستییەکان ئامادەکاری دەکەن بۆ پێشوازی لەهاوڵاتیان و گەشتیاران، کە بەڕێژەیەکی بەرچاو روو لە ناوچە گەشتیارییەکانی سنوری قەزای دوکان دەکەن.

ئەوەشی خستەڕوو: لە کۆبوونەوەکەدا جگە لە جەخت کردنەوە لە رۆڵی هێزە ئەمنییەکان و ئامادەکارییان، لایەنە خزمەتگوزاری و تەندروستییەکانیش رۆڵیان دیاری کراوە و لە خزمەت هاوڵاتیان و گەشتیاراندا دەبن، هاوکات سەرۆکایەتی شارەوانی راسپێردرا وەک چۆن لە رابردووداو بەتایبەت لە بۆنەکاندا رۆڵی بەرچاویان هەبووە لە خزمەتکردن و پاککردنەوەی شووێنە گەشتیاریەکان، لەم بۆنەیەشدا لە رێگەی تیمەکانیانەوە سەردانی ناوچە گەشتیارییەکان بکەن و گرنگی بە پاک راگرتنی شوێنە گەشتیاریەکان بدەن .

وتیشی: هێزەکانی بەرگری شارستانی و تیمی مەلەوانیش لەئەرکدادەبن لە پێناو سەلامەتی گەشتیاران و پێدانی رێنمایی پێیان، بەتایبەت لەسەر رۆخی زێی دوکان و دەریاچەی دوکان، تا بەدوور بن لە رووداوەکانی خنکان، هەروەها پۆلیسی دارستان و ژینگەی قەزاکەش هەماهەنگ و هاوکاری هێزەکانی ئاسایش و پۆلیس دەبن .

ئاماژەشی بەوەدا: لیژنەی هاوبەشی قائیمقامیەت و لیژنەکانی گەشتوگوزاریش بۆ رۆژانی جەژن لە ئەرکدادەبن، چاودێری بازاڕ و شوێنە گشتییەکان دەکەن و بەدواداچوون بۆ ئەو رێنماییانە دەکەن کە پێشتر جەختیان لێکراوەتەوە .

ئەوەش وت: داوا لە هاوڵاتیان و گەشتیاران دەکەین پابەندی رێنماییەکان بن و رێز لە سروشت و ژینگەی ناوچەکە بگرن و گرنگی بە پاکوخاوێنی شوێنە گەشتیارییەکان بدەن.

PUKmedia بێستون شارەستێنی