پەڕلەمانتارێكی یەكێتی: پۆستەكانی عیراق و هەرێم بەرامبەرن

پەڕلەمانتارێكی یەكێتی رایدەگەیەنێت، پۆستەكانی عیراق و هەرێم بەرامبەرن و پارتی لە كاندیدەكەی سەرۆك كۆماردا هەڵە‌ی كردووە و ئەگەر ئەوان لە بەغدا شەڕی پۆست دەكەن یەكێتیش دەتوانێت لە كوردستان وەك دووەم حزب داوای ئیستحقاقی خۆی بكات.

شیرین یونس ئەندامی پەرلەمانی كوردستان لە فراكسیۆنی یەكێتی بە PUKmedia ی رایگەیاند: بەشاهێدی دۆست و نەیارەكانیشمان یەكێتیی نیشتمانیی كوردستان، هەمیشە بەشی لەخۆی كردوەتەوە و داوێتییە لایەنەكانی دیكە، وەك هەمووشمان دەزانین یەكێتی لەپێناوی كۆمەڵێك باوەڕ دروستبووە و تا ئێستاش لە مەبدەئە نیشتیمانییەكانی خۆی لای نەداوە هەر بەهۆی ئەم هەستی نیشتیمانییەش رێز لەلایەنەكانی دیكە دەگرێت و نایەوێت پێداگری تەواو لەسەر مافەكانی بكات، بەڵام بیرمان نەچێت لەگەڵ ئەوەشدا كاتێك لایەنی بەرامبەر نابەرپرسیارانە ئەو هەستە نیشتیمانیانەمان بەكاربهێنێت ئەوا سنووری بۆ دادەنێین و ناهێڵین سنوور ببەزێنێت.

وتیشی: دواهەمین بابەتیش بابەتی سەرۆكایەتی كۆمارە، كە نابێت لەبیرمان بچێت سەرۆكی ئەنجومەنی نوێنەران مافی عەرەبی سونەیە و سەرۆكی ئەنجومەنی وەزیرانیش هی عەرەبی شیعەیە، بەڵام بەداخەوە پارتی دەستی داوەتە یارییەكی ترسناك ئەوەش بچووككردنەوە و بەحزبی كردنی پۆستی سەرۆك كۆماری عیراقە، ئەگەر بۆ پارتی بچێتەسەر خولێكی دیكە عەرەب ئەو پۆستە لەپارتیش وەردەگرێتەوە و ئیتر هەیبەتی كورد لە عیراق ژێر پێ دەكەوێت.

شیرین یونس راشیگەیاند: هەڵەیەكی دیكەی پارتی دیموكراتی كوردستان، كاندیدكردنی كەسێكە بۆ پۆستی سەرۆك كۆمار كە پێشتر لەسەر گەندەڵی لە پۆستەكەی لە حكومەتی عیراق دورخراوەتەوە و متمانەی لێوەرگیراوەتەوە و بەلای عیراقییەكانەوە شایستەی ئەو پۆستە نییە.

ئەوەشی راگەیاند: دەبێت پارتی ئەوەش بزانێت ئەگەر ئەوان لە بەغدا شەڕی پۆست دەكەن یەكێتیش دەتوانێت لە كوردستان وەك دووەم حزب داوای ئیستحقاقی خۆی بكات.

PUKmedia تایبەت