راگرتنی ئۆتۆمبێل لەناو شاردا قەدەغە دەكرێت

شارەوانی كەلار رایدەگەیەنێت، بەھۆی ناڕەزایەتی ھاووڵاتیانەوە، بڕیاریانداوە راگرتنی ئۆتۆمبیلی بارهەڵگر لەناو گەڕەكەكانی شاردا قەدەغە بكرێت.

شارەوانی كەلار رایگەیاند: بەھۆی ناڕەزایەتی زۆری ھاووڵاتیانەوە لەبارەی راگرتنی ئۆتۆمبێلی بارھەڵگر لە نێو گەڕەك و شەقامەكان و دروستكردنی ئاستەنگی بۆ ھاووڵاتیان و جوڵەی ئۆتۆمبێل لە ناو شاردا بڕیاریانداوە راگرتنی ئۆتۆمبیل لەناو گەڕەكەكانی شاردا قەدەغە بكرێت.

شارەوانی كەلار ئەوەشی راگەیاندووە: كە لە رێگەی بانگەوازی ئاشكرا و بە شێوەی بانەوانی جێگەی وەستانی ئۆتۆمبێلی بارهەڵگری بەكرێ داوە و لە ئێستادا پاش تەواوبوونی رێكارەكانی كراوەتەوە و لە كاردایە.

ئاماژەی بەوەشداوە: لە پاش كردنەوەی گەراجی ئۆتۆمبێلی بارهەڵگر سەرۆكایەتی شارەوانی كەلار بە هەماهەنگی بەڕێوبەرایەتی هاتوچۆی ئیدارەی گەرمیان ئاگاداری شۆفێرانی ئۆتۆمبێلی بارهەڵگر دەكاتەوە كە ئۆتۆمبێلەكانیان نەهێننە نێو گەڕەكانەوە، چونكە توشی لێپێچینەوەی یاسایی دەبنەوە.

PUKmedia زمناكۆ یەحیایی