سلێمانی..لیژنه‌ هاوبه‌شه‌كان 77 هه‌زار شوێن به‌سه‌ر ده‌كه‌نه‌وه‌

قائیمقامی سلێمانی راده‌یگه‌یه‌نێت: لیژنه‌ هاوبه‌شه‌كانی قائیمقامیه‌تی سلێمانی له‌ساڵی (2021)دا زیاتر له‌ (77) هه‌زار سه‌ردانیان بۆ شوێنه‌كان كردوه‌ و ده‌شڵێت: ده‌ستبه‌سه‌ر (836) تۆن كاڵاوشمه‌كی خراپ و ماوه‌به‌سه‌رچودا گیراوه‌.
ئاوات محه‌مه‌د، قائیمقامی قه‌زای مه‌ڵبه‌ندی سلێمانی رایگه‌یاند: لیژنه‌ هاوبه‌شه‌كانی قایمامیه‌تی سلێمانی له‌ساڵی (2021)دا (77) هه‌زار و (814) سه‌ردانیان بۆ دوكان و بازاڕ وشوێنه‌گشتییه‌كان ئه‌نجامداوه‌، له‌ئه‌نجامی ئه‌و به‌سه‌ركردنه‌وانه‌شدا (7) هه‌زار (857) پسوڵه‌ی سه‌رپێچییان تۆماركردوه‌، كه‌به‌شێكی زۆری سه‌رپێچییه‌كان كه‌مته‌رخه‌می خاوه‌نی شوێنه‌كان بووه‌، نه‌ك چاوچنۆكی به‌ده‌ستهێنان پاره‌ به‌شێوه‌ی نایاسایی.
وتیشی: به‌هۆی جێبه‌جێ نه‌كردنی ‌مه‌رجه‌كانی ته‌ندروستی و ڤێتێرنه‌ری و رێنماییه‌كانی دیكه‌ی كاركردن وه‌ هه‌روه‌ها پابه‌ندنه‌بون به‌رێكاره‌كانی خۆپارێزی له‌ڤایرۆسی كۆرۆنا، لیژنه‌ هاوبه‌شه‌كانی قائیمقامیه‌تی سلێمانی (730) شوێنیان داخستوه‌ و (100) شوێنیشیان داوه‌ته‌ دادگا و (7) هه‌زار و (59) پسوڵه‌ی ئاگاداركردنه‌وه‌شیان له‌ساڵی (2021) تۆماركردوه‌.
ئاماژه‌ی بۆ ئه‌وه‌كرد: له‌ئه‌نجامی پشكنییه‌ به‌رده‌وامیه‌كانی لیژنه‌ هاوبه‌شه‌كان بۆ ئه‌و كاڵاوشمه‌ك و خوارده‌مه‌نیانه‌ی رۆژانه‌ هاوڵاتیان به‌كاریده‌به‌ن، توانیویانه‌ ده‌ست به‌سه‌ر (836) تۆن و (2) كیلۆگرام بگرن و دواتر له‌لایه‌ن لیژنه‌ی تایبه‌تمه‌نده‌وه‌ وله‌ده‌ره‌وه‌ی ناوچه‌ی نیشته‌جێبون له‌ناوبراون.

رزگار قسیم
راگه‌یاندنی قائیمقامیه‌تی سلێمانی
PUKmedia