خوێندنی باڵا: به‌بێ كارتی ڤاكسین مامه‌ڵه‌ی هاووڵاتیان ڕایی ناكرێت

وه‌زاره‌تی خوێندنی باڵا و توێژینه‌وه‌ی زانستی ڕایده‌گه‌یه‌نێت: له‌ ڕێكه‌وتی (١/٢/٢٠٢٢) به‌دواوه‌ پێویسته‌ هاووڵاتیان له‌كاتی سه‌ردانیان بۆ وه‌زاره‌ت كارتی وه‌رگرتنی ڤاكسینیان پێ بێت، به‌پێچه‌وانه‌وه‌ ڕێگه‌یان پێنادرێت سه‌ردانی وه‌زاره‌ت بكه‌ن بۆ ڕایكردنی مامه‌ڵه‌كانیان.
وه‌زاره‌تی خوێندنی باڵا و توێژینه‌وه‌ی زانستی به‌ ئاماژه‌ كردن به‌ بڕیاری سه‌رۆكایه‌تی ئه‌نجومه‌نی وه‌زیران و لێژنه‌ی باڵای ڕوبه‌ڕوبه‌نه‌وه‌ی كۆرۆنا، له‌ گشتاندنێكدا به‌ژماره‌ (١٣٨٨) له‌ ڕێكه‌وتی (٢٣/١/٢٠٢٢) چه‌ند بڕیارێكی بۆ پاراستنی سه‌لامه‌تی گیانی ھاوڵاتیان و فه‌رمانبه‌ران و مامۆستایان له‌ داموده‌زگاكانی وه‌زاره‌تی خوێندنی باڵا و توێژینه‌وه‌ی زانستی ده‌ركرد:

یه‌كه‌م: ئه‌و فه‌رمانبه‌رانه‌ی دیوانی وه‌زاره‌ت كه‌ پێكوته‌ (ڤاكسینی) دژه‌ كۆرۆنایان وه‌رگرتوه‌، پێویسته‌ تاكو ڕۆژی پێنجشه‌مه‌ ڕێكه‌وتی (٢٧/١/٢٠٢٢) وێنه‌یه‌ك له‌ ناسنامه‌ یاخود كارتی وه‌رگرتنی پێكوته‌ (ڤاكسین)ی دژه‌ كۆرۆنا، بۆ ده‌زگای سه‌رپه‌رشتی و دڵنیایی جۆری/ به‌ڕێوه‌به‌رایه‌تی ته‌ندروستی و سه‌لامه‌تی له‌ دیوانی وه‌زاره‌ت بنێرن.

دوه‌م: ئه‌و فه‌رمانبه‌رانه‌ی دیوانی وه‌زاره‌ت پێكوته‌ (ڤاكسینی) دژه‌ كۆرۆنایان وه‌رنه‌گرتوه‌، به‌بێ تێستی كۆرۆنا كه‌ (٤٨) سه‌عاتی به‌سه‌ردا تێپه‌ڕنه‌بوبێت، ڕێگه‌ی پێنادرێت بێته‌ ده‌وام و به‌نه‌هاتو هه‌ژمار ده‌كرێت، له‌ڕۆژی ده‌رچونی ئه‌م نوسراوه‌.

سێیه‌م: له‌ دوای ڕێكه‌وتی (١/٢/٢٠٢٢) به‌دواوه‌ هیچ كه‌سێك ڕێگه‌ی پێ نادرێت سه‌ردانی به‌ وه‌زاره‌ته‌كه‌مان بكات به‌بێ هه‌بونی كارتی ڤاكسین یان ئه‌نجامدانی تێستی كۆرۆنا كه‌ (٤٨) سه‌عاتی به‌سه‌ردا تێپه‌ڕنه‌بوبێت.

جێگه‌ی ئاماژه‌ بۆكردنه‌ له‌لایه‌ن تیمی به‌ڕێوه‌به‌رایه‌تی ته‌ندروستی و سه‌لامه‌تی له‌ وه‌زاره‌ته‌كه‌مان ڕاستاندن بۆ به‌ڵگه‌نامه‌كان ده‌كرێت ئه‌گه‌ر ڤاكسینی وه‌رنه‌گرتبێت ڕێگه‌یان پێ نادرێت بێنه‌ ناو دیوانی وه‌زاره‌ت.
PUKmedia