ئۆڵۆمپی عیراق بە چوار كوردەوە دەچێتە كەمپێكی مەشق لەتوركیا

بڕیارە ئێوارەی ئەمڕۆ یەك شەممە لە رێگەی فڕۆكەخانەی نێودەوڵەتی بەغدادەوە، وەفدی هەڵبژاردەی ئۆلۆمپی عیراق گەشتی وڵاتی توركیا ئەنجامبدەن بە مەبەستی كەمپێكی مەشق و راهێنان و چەند یارییەكی دۆستانە.

هەژار مەعروف، رێكخەری یارییە دۆستانەكانی هەڵبژاردەی عیراق رایگەیاند، گەشتەكەی ئۆڵۆمپیی عیراق لە پاش كەمپێكی چەند رۆژە دێت لە شاری بەغدا و جیاكردنەوەو دەستنیشانكردنی 26 یاریزان دێت لە لایەن سكۆپی راهێنەری چیكی كە لە  نێو یاریزانەكان چوار كورد هەیە ئەوانیش ئەحمەد سەرتیپ لە زەورا و محەمەد دلاوەر لە نەورۆز و عیماد عیسا لە زاخۆ دەچنە كەمپەكەی توركیاوە میرخان دۆسكی لە ئینسبۆرگی نەمسایەوە.

لەو كەمپە ئۆلۆمپیی عیراق سێ یاری دۆستانە ئەنجامدەدات، لە 26 مانگ بەرامبەر مۆتریس ئۆدیسای ئۆكرانی یاریدەكات و سێ رۆژ پاش ئەوەش بەرامبەر ئیترامی كازاخستانی و لە سەرەتاكانی مانگی شوباتیش بەرامبەر یانەیەكی توركی یاریدەكات .

PUKmedia هەرێز جەمال