بافڵ جه‌لال تاڵه‌بانی پیرۆزبایی له‌ نوری مالیكی ده‌كات

به‌بۆنه‌ی به‌ستنی هه‌ژده‌یه‌مین كۆنگره‌ی حزبی ده‌عوه‌ی ئیسلامی و هه‌ڵبژاردنه‌وه‌ی نوری مالیكی به‌ ئه‌مینداری ئه‌و حزبه‌، بافڵ جه‌لال تاڵه‌بانی بروسكه‌یه‌كی پیرۆزبایی ئاڕاسته‌ی نوری مالیكی كردووه‌، ئه‌مه‌ده‌قه‌كه‌یه‌تی:

برای به‌ڕێزم نوری مالیكی، ئه‌مینداری گشتی حزبی ده‌عوه‌ی ئیسلامی.
به‌بۆنه‌ی به‌ستنی هه‌ژده‌یه‌مین كۆنگره‌ی حزبه‌ تێكۆشه‌ره‌كه‌تان و هه‌ڵبژاردنه‌وه‌تان به‌ ئه‌مینداری حزبی ده‌عوه‌ی ئیسلامی پیرۆزباییتان لێده‌كه‌م، هیودارم هه‌میشه‌ له‌ به‌ره‌وپێشچوون و گه‌شه‌كردندا بن. دڵنیاین ئه‌م هه‌نگاوه‌ به‌رپرسیارێتی گه‌وره‌ ده‌خاته‌ ئه‌ستۆی به‌ڕێزتان و حزبه‌ تێكۆشه‌ره‌كه‌تان كه‌ مێژوویه‌كی گه‌شی هه‌یه‌ له‌ خه‌بات له‌ دژی دیكتاتۆری و زوڵم و زۆری رژێمی له‌ناوچوو، هه‌روه‌ك چۆن به‌رپرسیارێتییه‌كی دیكه‌شتان بۆ زیاد ده‌كات له‌ پته‌وتركردنی په‌یوه‌ندی له‌گه‌ڵ سه‌رجه‌م هێز و لایه‌نه‌ خه‌باتگێڕه‌كانی گۆڕه‌پانی سیاسی عیراق له‌پێناو به‌رژه‌وه‌ندی گه‌ل و به‌رقه‌راربوونی ئاشتی و ته‌بایی و برایه‌تی له‌ وڵاتدا.
هه‌ر به‌م بۆنه‌یه‌شه‌وه‌ دووپاتی دۆستایه‌تی و په‌یوه‌ندی پته‌وی نێوان یه‌كێتیی نیشتمانیی كوردستان و حزبی ده‌عوه‌ ده‌كه‌ینه‌وه‌ له‌پێناو هێنانه‌دی ئامانجه‌ باڵاكانی گه‌لی عیراق و پاراستن و درێژه‌پێدانی په‌یوه‌ندی دۆستانه‌ و كاری پێكه‌وه‌ییمان.

  دووباره‌ پیرۆزباییتان لێده‌كه‌م

براتان
بافڵ جه‌لال تاڵه‌بانی

PUKmedia