riklam

كێن ئه‌وانه‌ی ده‌توانن ژه‌می سێهه‌می ڤاكسین وه‌ربگرن ؟

عیراق 07:26 PM - 2022-01-15

توێژه‌رو شاره‌زایه‌كی بواری كۆرۆنا ته‌ئكیدی له‌سه‌ر ئه‌و توێژانه‌ كرده‌وه‌ كه‌ده‌توانن ژه‌می سێیه‌می ڤاكسین وه‌ربگرن.

ده‌رمانساز د. ئوسامه‌ عانی توێژه‌رو شاره‌زای بواری كۆرۆنا به‌ PUKmedia ی راگه‌یاند: به‌پێی رێنماییه‌كانی وه‌زاره‌تی ته‌ندروستی فیدڕاڵ ژه‌می سێیه‌می ڤاكسین ده‌درێت به‌و توێژانه‌ی جێی مه‌به‌ستن و ئه‌و توێژانه‌ش كه‌سانی به‌ساڵاچوو، كارمه‌ندانی ته‌ندروستی و هه‌موو ئه‌وانه‌ ده‌گرێته‌وه‌ كه‌ نه‌خۆشی درێژخایه‌نیان هه‌یه‌.

عانی روونیشی ده‌كاته‌وه‌ كه‌ مه‌رجه‌ ئه‌وانه‌ی دۆزی سێیه‌می ڤاكسین وه‌رده‌گرن ماوه‌ی 6 مانگ به‌سه‌ر وه‌رگرتنی دۆزی دووه‌می ڤاكسینه‌كه‌دا تێپه‌ڕ بووبێت.

راشیگه‌یاند: به‌شێك له‌سه‌نته‌ره‌ ته‌ندروستییه‌كان وه‌ك كارئاسانییه‌ك دوای تێپه‌ڕبوونی 6 مانگ به‌سه‌ر دۆزی دووه‌مدا دۆزی سێیه‌می ڤاكسین به‌و كه‌سانه‌ ده‌ده‌ن كه‌كاره‌كانیان وا ده‌خوازێت  و به‌ریه‌ككه‌وتنی زۆریان له‌گه‌ڵ هاووڵاتیاندا هه‌یه‌و له‌و كاتانه‌دا چاوپۆشی له‌ته‌مه‌ن و نه‌خۆشییه‌ درێژخایه‌نه‌كان ده‌كرێت، ئه‌وه‌ش ده‌بێت به‌گوێره‌ی راپۆرتی ئه‌و پزیشكه‌ بێت كه‌ له‌سه‌نته‌ره‌ ته‌ندروستییه‌كه‌دا كار ده‌كات و مه‌رجیش نییه‌ پزیشكه‌كه‌ ره‌زامه‌ندی له‌سه‌ر پێدانی دۆزی سێیه‌می ڤاكسینه‌كه‌ بدات.

عانی ئاشكراشیكرد، له‌رووی زانستییه‌وه‌ ده‌كرێت دوو جۆر ڤاكسینی جیاواز به‌كاربهێنرێت و هیچ كێشه‌یه‌كی نییه‌، به‌ڵام باشتر وایه‌ دۆزی سێیه‌م له‌جۆری ڤاكسینی فایزه‌ر بێت، چونكه‌ له‌زۆربه‌ی سه‌نته‌ره‌كاندا ده‌ستده‌كه‌وێت.
عانی پێشی وایه‌، له‌ماوه‌ی داهاتوودا ره‌زامه‌ندی له‌سه‌ر وه‌رگرتنی دۆزی سێیه‌می ڤاكسین بدرێت و هه‌موو كه‌سێك بگرێته‌وه‌و چاوپۆشی له‌هه‌موو ئه‌و مه‌رجانه‌ بكرێت كه‌ پێشتر باسی لێوه‌كرابوو.

PUKmedia تایبه‌ت

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket