ته‌میمی: بڕیاره‌كه‌ی دادگای فیدڕاڵ كاریگه‌ری له‌سه‌ر سوێندخواردنی په‌رله‌مانتاران نابێت

شاره‌زایه‌كی یاسایی ئه‌مڕۆ شه‌ممه‌ 15- 1- 2022، وایده‌بینێت ئه‌گه‌ر بێتوو دادگای فیدڕاڵ پشتگیریی له‌ داوای راگرتنی كاری ده‌سته‌ی سه‌رۆكایه‌تی ئه‌نجومه‌نی نوێنه‌ران بكات ئه‌مه‌ به‌مانای هه‌ڵوه‌شاندنه‌وه‌ی هه‌ڵبژاردنی ده‌سته‌ی سه‌رۆكایه‌تیه‌كه‌ دێت و ده‌بێت جارێكی تر رێكاره‌كان بۆ خۆپاڵاوتن و ده‌نگدان له‌سه‌ریان دووباره‌ بكرێنه‌وه‌.

د.عه‌لی ته‌میمی شاره‌زای یاسایی به‌ PUKmedia ی راگه‌یاند: ئه‌مری وه‌لائی بۆ راگرتنی كاری ده‌سته‌ی سه‌رۆكایه‌تی ئه‌نجومه‌نی نوێنه‌ران په‌یوه‌سته‌ به‌و سكاڵایانه‌وه‌ كه‌ له‌به‌رده‌م دادگای باڵای فیدڕاڵی پێشكه‌ش كران و بڕیاری كۆتاییش واتا تا ئه‌و كاته‌ی ئه‌م سكاڵانه‌ یه‌كلایی ده‌كرێنه‌وه‌ كه‌ په‌یوه‌سته‌ به‌ شه‌رعیه‌تی دانیشتنی یه‌كه‌مه‌وه‌، ئه‌گه‌ر هاتوو دادگا سكاڵاكانی ره‌تكرده‌وه‌ به‌مانای كۆتایهاتنی ئه‌م پرسه‌ ده‌گه‌یه‌نێت و خۆ ئه‌گه‌ر هاتوو سكاڵاكاران داواكانیان برده‌وه‌ ئه‌مه‌ش به‌مانای ئه‌وه‌ ده‌گه‌یه‌نێت ئه‌مره‌ وه‌لائییه‌كه‌ له‌گه‌ڵ بڕیاری داواكه‌ ده‌بنه‌ بڕیاری كۆتایی.

راشیگه‌یاند: ئه‌گه‌ر دادگای باڵای فیدڕاڵی فه‌رمانی وه‌لائییه‌كه‌و داوای سكاڵاكاران په‌سه‌ند بكات به‌مانای پووچه‌ڵكردنه‌وه‌ی هه‌ڵبژاردنی ده‌سته‌ی سه‌رۆكایه‌تی و دووباره‌كردنه‌وه‌ی رێكاره‌كانی خۆپاڵاوتن و ده‌نگدان دێت له‌سه‌ریان، ئاماژه‌شی به‌وه‌دا كه‌ ئه‌م فه‌رمانه‌ وه‌لائییه‌ ده‌ست بۆ ماوه‌ كاتییه‌كانی ده‌ستوور نابات ئه‌وه‌ی كه‌په‌یوه‌سته‌ به‌هه‌ڵبژاردنی سه‌رۆك كۆمارو كاندیدكردنی سه‌رۆكی ئه‌نجومه‌نی وه‌زیران، مه‌گه‌ر دادگای فیدڕاڵی بڕیاری كۆتایی بدات و رێكاره‌كانی دوای 9/1 و هه‌موو مورافه‌عات و بڕیاره‌ ده‌ركراوه‌كانی دوایی هه‌ڵبوه‌شێنێته‌وه‌.

جه‌ختیشی كرده‌وه‌ كه‌ بڕیاره‌كه‌ كاریگه‌ری له‌سه‌ر سوێندخواردنی په‌رله‌مانتاران نابێت چونكه‌ ئه‌و بابه‌ته‌ تانه‌ی له‌سه‌ر نه‌دراوه‌.

PUKmedia تایبه‌ت