وه‌زیری پێشمه‌رگه‌: سه‌رۆك وه‌زیرانی عیراق دڵنیای كردینه‌وه‌

وه‌زیری پێشمه‌رگه‌و وه‌زیری به‌رگری عیراق و وه‌زیری ناوخۆی هه‌رێم، یاوه‌ری موسته‌فا كازمی، سه‌رۆك وه‌زیرانی عیراق بوون، له‌سه‌ردانه‌كه‌یدا بۆ میحوه‌ری (گوێر ـ مه‌خمور) و گوندی لهیبان. 

له‌كۆبوونه‌وه‌یه‌كیشدا له‌گه‌ڵ فه‌رمانده‌ و ئه‌فسه‌رانی باڵای هێزی پێشمه‌رگه‌ وسوپای عیراقی، سه‌رۆك وه‌زیران جه‌ختیكرده‌وه‌، له‌ پته‌وكردنی زیاتری ئاستی هه‌ماهه‌نگییه‌كانی نێوان سوپای عیراق و هێزی پێشمه‌رگه‌ له‌و ناوچانه‌یه‌دا، دووپاتیشی كرده‌وه‌ كه‌، هاوكارێكی باشی نزیكبوونه‌وه‌ی زیاتری هێزه‌كان ده‌بێت و ئامانجیانه‌، ره‌گی تیرۆر و تیرۆریستانی داعش به‌ته‌واوی ده‌ربهێنرێت. 

له‌میانی به‌سه‌ركردنه‌وه‌ی گوند (لهێبان) و به‌سه‌ركردنه‌وه‌ی دانیشتوانی گونده‌كه‌و هێزه‌كانی پێشمه‌رگه‌ و سوپای عیراق، سه‌رۆك وه‌زیران، رایگه‌یاند: خوێنی عیراقییه‌كان به‌كورد و عه‌ره‌ب و توركمان و ته‌واوی پێكهاته‌كانی هه‌رزان نیه‌ و له‌گه‌ڵ هێزه‌ ئازاكانمان له‌سوپای عیراقی و پێشمه‌رگه‌ و هێزه‌كانی تر، تیرۆرستان تێكده‌شكێنینه‌وه‌.

له‌ باره‌یه‌شه‌وه‌ شۆڕش ئیسماعیل وه‌زیری پێشمه‌رگه‌ وتی: به‌ر له‌ماڵئاوایكردنی كازمی، دڵنیاییكردینه‌وه‌ له‌سه‌ر ئه‌ركبینی هه‌ردوو لیوای هاوبه‌شی نێوان سوپا و پێشمه‌رگه‌ و له‌وێشه‌وه‌ سه‌رۆكی ئه‌ركانی سوپای عیراق و فه‌رمانده‌ سه‌ربازییه‌ باڵاكانی راسپارد، هه‌نگاوه‌كانیان له‌وباره‌یه‌وه‌ له‌گه‌ڵ هێزی پێشمه‌رگه‌ خێرا بكه‌ن.

PUKmedia راگه‌یاندنی وه‌زاره‌تی پێشمه‌رگه‌