ته‌ئكید له‌تێپه‌ڕاندنی كێشه‌كان به‌ رێگه‌ی دایالۆگ كرایه‌وه‌

د. به‌رهه‌م ساڵح، سه‌رۆك كۆماری عیراق ئه‌مڕۆ سێشه‌ممه‌ 30 تشرینی دووه‌می 2021 پێشوازیكرد له‌ عه‌ممار حه‌كیم، سه‌رۆكی هاوپه‌یمانی هێزه‌كانی ده‌وڵه‌تی نیشتمانی و له‌ باره‌ی بارودۆخی گشتی و پێشهاته‌ سیاسییه‌كانی وڵات گفتوگۆیانكرد.

له‌ دیداره‌كه‌دا جه‌ختكرایه‌وه‌ له‌ پێویستی به‌ھێزكردنی ئاسایش و سه‌قامگیری وڵات و پاراستنی ئارامی و ئاشتی كۆمه‌ڵایه‌تی و پشتیوانیكردنی له‌ هێزه‌ ئه‌منییه‌كان بۆ ریشه‌كێشكردنی پاشماوه‌كانی داعشی تیرۆرست و كاركردن له‌ پێناو سازان و یه‌كخستنی یه‌كریزی نیشتمانی و دیالۆگ و به‌یه‌كگه‌یشتن و تێپه‌ڕاندنی چه‌قبه‌ستوویی سیاسی و سه‌رخستنی رێگه‌چاره‌ی نیشتمانی و ده‌ستووری به‌ جۆرێك به‌رژه‌وه‌ندییه‌ باڵاكانی وڵات بپارێزێت.

هه‌روه‌ها دووپاتكرایه‌وه‌ له‌ پاراستنی پرۆسه‌ی دیموكراسی و چاره‌سه‌ركردن و یه‌كلایكردنه‌وه‌ی تانه‌ و سكاڵاكان له‌ پرۆسه‌ی هه‌ڵبژاردنه‌كان به‌پێی یاسا و له‌ رێگه‌ی ده‌سته‌ی دادوه‌ری تایبه‌تمه‌ند به‌ شێوه‌یه‌كی دادپه‌روه‌ر و پیشه‌ییانه‌ بۆ ئه‌وه‌ی ده‌رئه‌نجامه‌ یاسایی و ده‌ستوورییه‌كانی رێگه‌ خۆشبكات به‌ ئاڕاسته‌ی دامه‌زراندنی په‌رله‌مان و حكومه‌تێك كه‌ داوا ره‌واكانی خه‌ڵك بۆ ژیانێكی باشتر بھێنیته‌دی.

PUKmedia