مه‌خموور.. جوتیاران ناتوانن سود له‌ زه‌وییه‌كانیان وه‌ربگرن

به‌رده‌وامبوونی ره‌وشی ئێستای ناوچه‌ دابڕاوه‌كان و چاره‌سه‌رنه‌كرنی كێشه‌كانی نێوان هه‌رێم و به‌غدا، جگه‌ له‌ كێشه‌ی ئه‌منی و هه‌ڕه‌شه‌ی تیرۆرستان، جوتیارانی ئه‌و ناوچانه‌ به‌تایبه‌تی له‌ سنووری قه‌زای مه‌خموور زه‌ره‌رمه‌ندی یه‌كه‌من و زۆربه‌یان ناتوانن سوود له‌ زه‌وییه‌كانیان وه‌ربگرن.

غازی فه‌یسه‌ڵ كارگێری مه‌ڵبه‌ندی قه‌ره‌چوخی یه‌كێتیی نیشتمانیی كوردستان. به‌ PUKmedia ی راگه‌یاند: سن،وری قه‌زای مه‌خموور و ناوچه‌كانی قه‌راج و كه‌ندێناوه‌ به‌یه‌كێك له‌ ده‌وڵه‌مه‌ندترین ناوچه‌ی كشتوكاڵی له‌ كوردستان و عیراق داده‌نرێت، به‌تایبه‌تی بۆ به‌رهه‌مه‌كانی گه‌نم و جۆ، كه‌چی جوتیارانی ئه‌و سنووره‌ ناتوانن سوود له‌و زه‌ویه‌ به‌ پیته‌یان وه‌ربگرن.

وتیشی: هۆكاری سود وه‌رنه‌گرتنی جوتیاران له‌ زه‌وییه‌كانیان بۆ ره‌وشی ئه‌منی و ئه‌و بارودۆخه‌ ده‌گه‌ڕێته‌وه‌ كه‌ ماوه‌یه‌كه‌ به‌سه‌ر ناوچه‌كه‌دا هاتووه‌، ئه‌ویش هه‌ڕه‌شه‌ی تیرۆرستان و خواستی به‌شێك له‌هێزه‌ عیراقییه‌كانه‌ بۆ دووباره‌ ته‌عریبكردنه‌وه‌ی ناوچه‌كه‌.

كارگێره‌كه‌ی مه‌ڵبه‌ندی قه‌ره‌چوخ ئاماژه‌ی به‌وه‌شكرد: ئێستا كه‌ وه‌رزی پایزه‌ و كاتی كێڵانی زه‌وییه‌ كشتوكاڵییه‌كانه‌ بۆ چاندنی گه‌نم و جۆ، كه‌چی به‌شێكی زۆری جوتیارانی سنووری مه‌خموور و قه‌راج نه‌یانتوانیوه‌ ده‌ست به‌كاره‌كانیان بكه‌ن، چونكه‌ له‌ سه‌لامه‌تی خۆیان دڵنیانین ، هاوكات هێزه‌كانی ناوچه‌كه‌ وه‌كو پێویست كاریان بۆ پاراستنیان نه‌كردووه‌.

غازی فه‌یسه‌ڵ پێشیوابوو، مانه‌وه‌ی ره‌وشی جوتیاران و خه‌ڵكی ناوچه‌كه‌ به‌گشتی و به‌ده‌نگه‌وه‌ نه‌هاتنی هه‌ردوو حكومه‌تی هه‌رێم و به‌غدا،  كاریگه‌ری له‌سه‌ر مانه‌وه‌ی دانیشتوانی ئه‌و ناوچانه‌ ده‌بێت و مه‌ترسی چوڵبوونیان لێده‌كرێت، به‌تایبه‌تی ئه‌وه‌ دووساڵه‌ وشكه‌ساڵییه‌و زیانی زیاتر به‌ جوتیاران كه‌وتووه‌.

PUKmedia ته‌ها عه‌بدوڵڵا