به‌دواداچوونی لیژنه‌كانی په‌رله‌مان له‌باره‌ی خۆپیشاندانی خوێندكاران ده‌خرێته‌ڕوو

ڕۆژی چوارشه‌ممه‌ 1-12-2021 په‌رله‌مانی كوردستان كۆده‌بێته‌وه‌ و خوێندنه‌وه‌ بۆ پڕۆژه‌ یاسایه‌ك ده‌كات و له‌ سه‌ر پڕۆژه‌یاسایه‌كی دیكه‌ش ده‌نگدان ده‌كات.
له‌ڕاگه‌یه‌نراوێكی سه‌رۆكایه‌تی په‌رله‌مان هاتووه‌ كه‌ له‌و كۆبوونه‌وه‌یه‌دا  به‌دواداچوونی هه‌ردوو لیژنه‌ی (ناوخۆ و ئاسایش و ئه‌نجوومه‌نه‌ خۆجێیه‌كان) و لیژنه‌ی (په‌روه‌رده‌ و خوێندنی باڵا و توێژینه‌وه‌ی زانستی)، سه‌باره‌ت به‌ خۆپیشاندانی خوێندكاران ده‌خرێته‌ڕوو. 

به‌رنامه‌ی كاری دانیشتنی ژماره (٩)ی ئاساییی خولی پایزه ڕۆژی ٢٠٢١/١٢/١
به‌رنامه‌ی كار
به‌پێی حوكمی مادده‌ی (٥) و بڕگه‌ی (یه‌كه‌م) له مادده‌ی (١٦) و بڕگه‌ی (سێیه‌م) له مادده‌ی (١٨) و بڕگه‌كانی (یه‌كه‌م و دووه‌م و سێیه‌م و چواره‌م و پێنجه‌م) له مادده‌ی (٢٠) و مادده‌كانی (٤٧، ٤٨) و بڕگه‌ی (یه‌كه‌م) له‌ مادده‌ی (٥٢) و مادده‌كانی (٥٤، ٥٥، ٥٦، ٥٧) له په‌یڕه‌وی ناوخۆی په‌رله‌مانی كوردستان-عێراق، ده‌سته‌ی سه‌رۆكایه‌تیی په‌رله‌مان بڕیاریدا به‌رنامه‌ی كاری دانیشتنی ژماره (٩)ی ئاسایی خولی پایزه‌ی ساڵی سێیه‌م له ‌خولی پێنجه‌می هه‌ڵبژاردنی په‌رله‌مان، له كاتژمێر (١١)ی پێشنیوه‌ڕۆی ڕۆژی چوارشه‌ممه‌ ڕێكه‌وتی ٢٠٢١/١٢/١ به‌م شێوه‌یه بێت:

یه‌كه‌م: ده‌نگدان له‌سه‌ر پڕۆژه‌یاسای (كۆمپانیا ئه‌منییه‌ تایبه‌ته‌كان له‌ هه‌رێمی كوردستان-عێراق)، به‌پێی حوكمی مادده‌كانی (٩٠، ٩١، ٩٣، ٩٦، ٩٧) له‌ په‌یڕه‌وی ناوخۆی په‌رله‌مانی كوردستان.

دووه‌م: خستنه‌ڕووی به‌دواداچوونی هه‌ردوو لیژنه‌ی (ناوخۆ و ئاسایش و ئه‌نجوومه‌نه‌ خۆجێیه‌كان) و لیژنه‌ی (په‌روه‌رده‌ و خوێندنی باڵا و توێژینه‌وه‌ی زانستی)، سه‌باره‌ت به‌ خۆپیشاندانی خوێندكاران.

سێیه‌م: خوێندنه‌وه‌ی دووه‌م بۆ پڕۆژه‌یاسای (سه‌رپه‌رشتیكردنی پڕۆژه‌كانی كشتوكاڵی له‌ هه‌رێمی كوردستان)، به‌پێی حوكمی مادده‌كانی (٨٧، ٨٨، ٨٩) له‌ په‌یڕه‌وی ناوخۆی په‌رله‌مانی كوردستان.
PUKmedia