فراكسیۆنی یه‌كێتی: سه‌نگه‌ری پشتیوانی له‌ داواكاری خه‌ڵك چۆڵناكه‌ین

جێگری سه‌رۆكی فراكسیۆنی یه‌كێتیی نیشتمانیی كوردستان له‌ په‌رله‌مانی كوردستان، ته‌ئكیدده‌كاته‌وه‌ ده‌بێت په‌رله‌مان رێز له‌ ده‌نگی ده‌نگده‌ران و خواستی خه‌ڵك بگرێت.

ئێواره‌ی ئه‌مڕۆ 26-10-2021، له‌ كۆنگره‌یه‌كی رۆژنامه‌نووسیدا لوقمان وه‌ردی جێگری سه‌رۆكی فراكسیۆنی یه‌كێتیی نیشتمانیی كوردستان له‌ په‌رله‌مانی كوردستان رایگه‌یاند: وه‌ك فراكسیۆنی یه‌كێتیی نیشتمانیی كوردستان به‌هیچ شێوه‌یه‌ك سه‌نگه‌ری پشتیوانی له‌ له‌ داواكارییه‌كانی خه‌ڵك چۆڵناكه‌ین.

راشیگه‌یاند: به‌هه‌موو شێوه‌یه‌ك پشتیوانی داوا ره‌واكانی میلله‌ته‌كه‌مانین له‌ داواكاری سێیه‌كه‌مه‌كان و مامۆستایانی وانه‌بێژو سه‌رجه‌م داواكارییه‌ ره‌واكانی میلله‌ته‌كه‌مان، وتیشی: له‌سه‌ر حكومه‌ته‌ كێشه‌ی سوته‌مه‌نی چاره‌سه‌ربكات و پێویسته‌ سوته‌مه‌نی ته‌واو بۆ پاڵاوگه‌كانی هه‌رێمی كوردستان دابین بكات و كاری جددی بكات بۆ دابه‌زاندنی نرخی سومه‌ته‌مه‌نی و كارئاسانی بۆ هاووڵاتییان .

هه‌روه‌ها وتی: په‌رله‌مانی كوردستان موڵكی لایه‌نێكی سیاسی دیاریكراو گروپێك نییه‌، به‌ڵكو به‌رهه‌می خوێنی شه‌هیدان و قوربانیدانی میلـله‌ته‌كه‌مانه‌ بۆیه‌ به‌هیچ شێوه‌یه‌ك نابێت بكرێته‌ شوێنی موزایه‌ده‌، به‌ڵكو ده‌بێت شوێنی به‌رگریكردن و پشتیوانی بێت له‌ مافی میلله‌ته‌كه‌مان و تێیدا رێز له‌ ده‌نگی ده‌نگده‌ران و خواستی میلله‌ته‌كه‌مان بگیرێت.

ئاماژه‌ی به‌وه‌شدا، وه‌زاره‌تی سامانه‌ سروشتییه‌كان به‌هیچ شێوه‌یه‌ك ئه‌ركی خۆی جێبه‌جێنه‌كردووه‌ له‌ دابینكردنی سوته‌مه‌نی و خزمه‌تكردنی هاووڵاتییان، پێویسته‌ په‌رله‌مانی كوردستان وه‌ك ده‌سه‌ڵاتی یاسادانان و ئه‌ركی چاودێریكردنی كاره‌كانی حكومه‌ت له‌ هۆكاره‌كانی گرانبوونی سوته‌مه‌نی و دروستبوونی قه‌یرانه‌كان له‌ وڵاتدا بكۆڵێته‌وه‌و له‌سه‌ر حكومه‌تی هه‌رێمیشه‌ كاربۆ هه‌رزانكردنی سوته‌مه‌نی بكات.

PUKmedia تایبه‌ت