بافڵ تاڵەبانی:حكومەتێك بنیادبنێین لەئاست چاوەڕوانییەكانمان بێت

بافڵ تاڵەبانی، ھاوسەرۆكی یەكێتیی نیشتمانیی كوردستان لە ھەولێر چاویكەوت بە ماسیو تولەر، باڵیۆزی ئەمریكا لە عیراق.
لە دیدارێكدا دەرباز كۆسرەت رەسوڵ، كارگێڕی مەكتەبی سیاسی ئامادەیبوو، گۆڕانكارییە سیاسییەكان و قۆناغی دوای ھەڵبژاردن لە عیراق و چاكسازییەكانی یەكێتی گفتوگۆیان لەبارەوە كراو ھەردوولا ھاوڕابوون لەسەر پەنابردن بۆ گفتوگۆی بنیادنەرانە لەسەر بنەمای پاراستنی مافی ھەموو نەتەوەو پێكھاتەكان، و چاكسازیكردن لەدامەزراوەكان و پێكھێنانی حكومەتێك كە لەگەڵ خواستی ھەموولایەك بێت و ببێتە مایەی خزمەتكردن و ئاوەدانی و سەقامگیری زیاتر.
ھەر لە دیدارەكەدا ھاوسەرۆك روونیكردەوە سەرباری سەرنج و تێبینییەكان لەسەر ھەڵبژاردن و دەرئەنجامەكان، بەڵام دەتوانین بەئیرادەیەكی بەھێزەوە كاربكەین بۆ پێكھێنانی حكومەتێك كە رەنگدانەوەی گلەیی و ناڕەزایی و پێویستییەكانی ئەمڕۆی عیراق و ھەرێم بێت، و ھەموو لایەنەكان پێكەوە ھاوكاربین تا دەسەڵاتی جێبەجێكردن ئەركەكانی كە خزمەتكردن، چاكسازی راستەقینە و رووبەڕووبوونەوەی گەندەڵییە لەم ھەلومەرجەدا وەك خۆی جێبەجێی بكات و رێگربین لەوەی ململانێیە سیاسییەكان كاریگەری لەسەر حكومەتی داھاتوو دروستبكات و شەقام بجوڵێندرێت بۆ بەرژەوەندی حزبی.
بافڵ تاڵەبانی ئاماژەی بەھەڵوێستی یەكێتی كردو رایگەیاند: زەمینە لەبارە كە وەك كورد خۆمان رێكبخەینەوەو بەیەكڕیزی لەگەڵ لایەنە عیراقییەكان لەسەر بنەمای ژیانی ھاوبەش، شەراكەت و تەوافق كە بەرژەوەندی گشتی تێدا رەچاوبكرێت گفتوگۆبكەین و پێكەوە حكومەتێك بنیادبنێن كە لە ئاست چاوەڕوانییەكانمان بێت.
سەبارەت بەچاكسازی و رەوتی رێكخستنەوەی ژیانی حزبی یەكێتی، ھاوسەرۆك بەوردی دوا و وتی: لە ئێستادا یەكێتی سەرلەنوێ بۆ ئەركەكانی خەباتی حزبی، نەتەوەیی، كوردستانی، عیراقی و ھەرێمی خۆی سازدەداتەوەو دەمانەوێت یەكێتییەك بنیادبنێینەوە كە یەكێتی مام بێت و لە ئاست خەبات و قوربانیدانی ھەموو ئەوانە بێت كە ماندووبوون بەم حزبەوە بۆیە گۆڕانكاری و چاكسازی بۆ ئەو ئامانجە بووە و بەردەوام دەبین تا یەكێتی یەكێتی ھەموو كۆمەڵانی خەڵك بێت و یەكێتی بێت بۆ خزمەتكردن و بوژاندەوەی زیاتری ھەرێم.
PUKmedia