زیاتر لە 43 هەزار خوێندكار لەزانكۆ و پەیمانگاكان وەرگیران

وەزارەتی خوێندنی باڵاو توێژینەوەی زانستی ئەنجامی زانكۆلاینی بۆ وەرگرتنی خوێندكاران لە زانكۆ و پەیمانگاكان بڵاوكردەوە و رایگەیاند، 43 هەزار و 277 خوێندكار وەرگیران و 82% ی دەرچووانیش لە زانكۆ و پەیمانگا حكومییەكان وەرگیراون.

سەعات 10ی ئەمڕۆ 2021-10-25، لە كۆنگرەیەكی رۆژنامەوانیدا وەزارەتی خوێندنی باڵا و توێژینەوەی زانستی، وردەكاری و داتای وەرگیراوانی لە زانكۆ و پەیمانگا حكومییەكان لەهەرێمی كوردستان بۆ ساڵی نوێی خوێندنی (2021-2022) راگەیاند و خەتاب ئەحمەد بەڕێوەبەری گشتی خوێندن و بەدواداچوان ئاماژەی بەوەدا: كە ئەمساڵ 63 هەزار و 324 خوێندكاری پۆلی 12 دەرچوون و 82% ی دەرچووان كە داواكاریان پێشكەش كردووە لە زانكۆ و پەیمانگا حكومییەكان وەرگیراون، هاوكات  18%ی ئەو خوێندكارانە وەرنەگیراون كە ژمارەیان دەكاتە حەوت هەزار 943 خوێندكار.

وتیشی: 62% خوێندكاران لەناو خوێندنی خۆڕایدا وەرگیراون واتا ئەو كورسیانەی كە بەخۆڕاین و 21% لەخوێندنی پارالێڵ وەرگیراون و 17% لە خوێندنی ئێواران وەرگیراون.

راشیگەیاند: چوار هەزار و 67 كورسی بە بەتاڵی ماونەتەوە و وەرنەگیراوان دەتوانن داواكاری پێشكەش بكەن و لەسەر ئەو كورسییە بەتاڵانە بخوێنن.

ئەوەشی راگەیاند: لە سەعات 11 ی ئەمڕۆوە لینكی ئەنجامی زانكۆلاین كارا دەبێت و وەرگیراوان دەتوانن ئەنجامەكانی لێوەرگرنەوە.

لەم لینكەوە ئەنجامی زانكۆلاین وەربگرە...

PUKmedia تایبەت