مه‌رج نیه‌ هه‌رێم و به‌غدا به‌یه‌ك یاسای هاتوچۆ كاربكه‌ن

به‌رێوه‌به‌ری  په‌یوه‌ندییه‌كانی هاتوچۆی هه‌رێم ئاشكریده‌كات  له‌هه‌رێم كار بۆ ئاماده‌كردنی پڕۆژه‌یاسایه‌كی تازه‌ی هاتوچۆ ده‌كرێت، ئاماژه‌ به‌وه‌شده‌كات هه‌رێم و به‌غدا حكومه‌ت و په‌رله‌مانی تایبه‌ت به‌خۆیان هه‌یه‌ و هه‌ریه‌كه‌یان ده‌توانن به‌یاسایه‌ك له‌بواری هاتوچۆ كاربكه‌ن.

عه‌مید ئه‌سعه‌د مه‌ڵا كه‌ریم به‌رێوه‌به‌ری په‌یوه‌ندییه‌كانی هاتوچۆی  گشتی هه‌رێمی كوردستان به‌ PUKmedia ی راگه‌یاند: هه‌ریه‌كه‌ له‌ حكومه‌تی هه‌رێمی كوردستان و حكومه‌تی  فیدراڵ له‌ بواری هاتوچۆ به‌ دوو یاسای جیاواز  كارده‌كه‌ن، چونكه‌ هه‌ریه‌كه‌یان حكومه‌ت و په‌رله‌مانی تایبه‌ت به‌خۆی هه‌یه‌.

روونیشیكرده‌وه‌: ئه‌و یاساییه‌ی هاتوچۆ كه‌ له‌ هه‌رێمی كوردستان كاری پێ ده‌كرێت بۆسه‌رده‌می حوكمی پۆڵ بلیمه‌ر حاكمی مه‌ده‌نی ئه‌و كاته‌ی عیراق ده‌گه‌ڕێته‌وه‌، ئه‌وه‌ی حكومه‌تی فیدراڵیش بۆ ئه‌م ساڵانه‌ی دوایی ده‌گه‌ڕێته‌وه‌.

راشیگه‌یاند: به‌هۆی ئه‌وه‌ی ئه‌و یاسایه‌ی له‌هه‌رێم كاری پێده‌كرێ، كه‌موكوری زۆری تێدایه‌و پێویستی به‌ گۆڕانكاری هه‌یه‌، له‌كاتی ئێستا هه‌وڵێك هه‌یه‌ تاكو پڕۆژه‌یاسایه‌كی تازه‌ی هاتوچۆ له‌هه‌رێم  ئاماده‌بكرێت، به‌جۆرێك له‌گه‌ڵ ژماره‌ی ئێستای ئۆتومبێل و ئه‌و گۆڕانكاریانه‌ بگونجێ كه‌ له‌بواری هاتۆچۆ  روویداوه‌.

 ئه‌و لێسراوه‌ی هاتوچۆی هه‌رێم ئاماژه‌ی به‌وه‌شكرد: ئه‌وان هیچ زانیاریه‌ك نیه‌ له‌وه‌ی یاسایه‌كی تازه‌ له‌ حكومه‌تی فیدراڵ بۆ هاتوچۆ ده‌ربچێت و هه‌رێمی كوردستانیش بگرێته‌وه‌، ئه‌و بابه‌ته‌ زیاتر په‌یوه‌ندی به‌ ناوچه‌كانی دیكه‌ی عیراق جگه‌ له‌ هه‌رێمی كوردستانه‌وه‌ هه‌یه‌.

PUKmedia  ته‌ها عه‌بدوڵڵا