بافڵ تاڵەبانی سەرەخۆشی لە مام حەمیدی گومرگ دەكات

بەهۆی كۆچی دوایی خاتوو وەردەی هاوسەری مام حەمیدی گومرگەوە، بافڵ تاڵەبانی ھاوسەرۆكی یەكێتی پرسەنامەیەك ئاڕاستەی مام حەمیدی گومرگ، پێشمەرگەی دێرین و دۆستی دێرینی سەرۆك مام جەلال دەكات كە ئەمە دەقەكەیەتی:

مامی بەڕێزمان مام حەمیدی گومرگ، پێشمەرگەی دێرین و دۆستی دێرینی سەرۆك مام جەلال.

بۆ كۆچی دوایی خاتوو (وەردە)ی ھاوسەرتان، پرسەو ھاوخەمی قوڵی خۆمان ئاڕاستەی جەنابتان و خانەوادە سەربەرز و تێكۆشەرەكەتان دەكەین.

مام حەمید ھەر لەسەرەتای تێكەڵبوونی مام بە خەباتی چەكداری لە دەستەی پاسەوانی بووە و پێشمەرگەی ھەمەدان و سەرەتاكانی كۆمەڵە و زیندانی سیاسی بووە، كە بەدرێژایی بەشداری لە خەباتی چەكداری خاتوو وەردەی ھاوسەری ھاوڕێگاو ھاوخەباتی بوو، وەك ژنێكی ئازا و خۆڕاگر خزمەتی شۆڕشی كرد و پشوودرێژانە لەگەڵ نەھامەتییەكاندا دەژیا.
كە كۆچی دوایی ئەم ژنە تێكۆشەرە جێی نیگەرانیمانەو لە خوای گەورە داواكارین رۆحی شادبێت و ئێوەش تەمەن درێژو تەندروست بن.

بافڵ تاڵەبانی
ھاوسەرۆكی یەكێتیی نیشتمانیی كوردستان

PUKmedia تایبەت