قوباد تاڵه‌بانی: ده‌بێت به‌هێزی یه‌كێتی و گۆڕان له‌م هه‌ڵبژاردنه‌دا ڕه‌نگبداته‌وه‌

ئێواره‌ی ئه‌مڕۆ 27-9-2021، به‌ ئاماده‌بوونی قوباد تاڵه‌بانی سه‌رۆكی هاوپه‌یمانی كوردستان و كاندیدانی هاوپه‌یمانی كوردستان و چه‌ندین به‌رپرسی حزبی و كادیرو ئه‌ندام و لایه‌نگرانی یه‌كێتیی نیشتمانیی كوردستان و بزووتنه‌وه‌ی گۆڕان له‌ شاره‌زوور كه‌رنه‌ڤاڵی ناساندنی كاندیدانی هاوپه‌یمانی كوردستان له‌ شاره‌زوور به‌ڕێوه‌چوو.

له‌ سه‌ره‌تای كه‌رنه‌ڤاڵه‌كه‌شدا چرۆ حه‌مه‌شه‌ریف كاندیدی ژماره‌ 20 له‌ بازنه‌ی 3 له‌ هاوپه‌یمانی كوردستان له‌به‌رده‌می جه‌ماوه‌ری ئاماده‌بوو خۆی ناساندو داوای له‌ هاووڵاتییانی سنووره‌كه‌ كرد، متمانه‌ی خۆیانی پێشببه‌خشن بۆ ئه‌وه‌ی له‌ په‌رله‌مانی عیراق به‌رگری له‌ مافه‌ ده‌ستووری و یاساییه‌كانی هاووڵاتییانی هه‌رێمی كوردستان بكات.

پاشان قوباد تاڵه‌بانی سه‌رۆكی هاوپه‌یمانی كوردستان وته‌یه‌كی پێشكه‌شكردو رایگه‌یاند: هاوپه‌یمانی كوردستان له‌ دوو هێزی سه‌ره‌كی پێكدێت كه‌ یه‌كێتیی نیشتمانیی كوردستان و بزووتنه‌وه‌ی گۆڕانه‌ له‌ژێر چه‌تری هاوپه‌یمانی كوردستانداو له‌سه‌ر رێبازه‌ مه‌زنه‌كه‌ی سه‌رۆك مام جه‌لال و كاك نه‌وشیروانه‌، و ده‌یه‌وێت به‌ به‌هێزییه‌وه‌ بچێته‌ به‌غداو شه‌ڕی بودجه‌و مووچه‌و به‌رگری له‌ مافه‌ ده‌ستوریی و یاساییه‌كانی میلله‌ته‌كه‌مان بكات. 

وتیشی: ئه‌م هه‌ڵبژاردنه‌ په‌یوندی به‌ چاره‌نووسی كورده‌وه‌ هه‌یه‌ بۆیه‌ داواتان لێده‌كه‌ین، له‌ رۆژی 10ی 10 هه‌مووتان بچنه‌سه‌ر سندوقه‌كانی ده‌نگدان و ده‌نگ به‌ هاوپه‌یمانی كوردستان و كاندیده‌كانی بده‌ن تا بتوانین زۆرترین كاندید بنێرینه‌ په‌رله‌مانی عیراق و له‌وێ به‌ به‌هێزییه‌وه‌ به‌رگری له‌ مافه‌كانی میلله‌ته‌كه‌مان بكه‌ین .

قوباد تاڵه‌بانی راشیگه‌یاند: ناوچه‌كه‌ له‌ گۆڕانكاری به‌ده‌وامدایه‌و له‌ چوار ساڵی داهاتووشدا گۆڕانكاری زۆر گه‌وره‌ له‌ ناوچه‌كه‌دا رووده‌دات، بۆیه‌ ئه‌گه‌ر ئێمه‌ وه‌ك كورد له‌ به‌غدا یه‌كڕیز و یه‌ك ده‌نگ و به‌هێزبین ده‌توانین به‌ به‌هێزییه‌وه‌ به‌رگری له‌ مافه‌ ده‌ستوورییه‌كانی میلله‌ته‌كه‌مان بكه‌ین و به‌یه‌كڕیزی و یه‌ك ده‌نگی له‌ به‌غدا شه‌ڕی به‌ده‌ستهێنانی شایسته‌ داراییه‌كانی هه‌رێم بكه‌ین و پشكی هه‌رێم له‌ بودجه‌و مووچه‌ به‌ده‌ستبهێنین كه‌ ئه‌مه‌ش هۆكارێكی سه‌ره‌كی ده‌بێت بۆ گه‌ڕاندنه‌وه‌ی سه‌قامگیری زیاتر بۆ ناوچه‌كه‌.

PUKmedia تایبه‌ت