هێزەکانی پێشمەرگە کار بۆ سەرکەوتنی هاوپەیمانی دەکەن

ئەمڕۆ لەبارەگای هێزەکانی حەفتا لەشارۆچکەی چوارقوڕنە کۆبوونەوەی بەرفراوانی ئەفسەر و پلەدارانی لیواکانی هێزی پشمەرگەی سنوورەکە بۆ پشتیوانی لە لیستی هاوپەیمانی کوردستان و سەرخستنی کاندیداکانی سازکرا.

لەدەسپێکی کۆبوونەوەدا کە ژمارەیەک لەئەندامانی مەکتەبی سیاسی و سەرکردایەتی و لێپرسراوی مەڵبەندی "٢٤"ـی ڕێکخستنی ڕاپەڕینی یەکێتی نیشتمانی کوردستان ئامادەی بوون ،قادر عەزیز کارگێڕی مەکتەبی سیاسی یەکێتی لەبارەی پرسی هەڵبژاردن بۆ ئامادەبوان دوا و ڕاگەیاند ؛ هێزەکانی پێشمەرگە لەهەموو وێستگەیەکی خەباتدا کارکتەری گرنگی ئەرکە قورسەکان بوونە، ڕاشیگەیاند ئەگەر دوێنێ بەچەک پارێزگاریتان لەیەکێتی و پرەنسیپە چەسپاوەکانی کردبێ، ئەوا بەدڵنیاییەوە ئەمڕۆ ئەو ئەرکە بەدەنگ لەبەرژەوەندی یەکێتی و میللەتەکەمان بە بڕیاری ڕاست و مەدروس لەقازانجی هاوپەیمانی کوردستان جێبەجێ دەکەن.

پاشانیش" بورهانی سەعید سۆفی " ئەندامی مەکتەبی سیاسی و سەرپەرشتیاری زۆنی ڕاپەڕینی کەمپەینی هەڵبژاردن لەبارەی نەبەردیەکانی هێزەکانی پێشمەرگە قسەی کرد و جەختی لەوە کردەوە کە هێزەکانی پێشمەرگە وەک کوڕانی ڕۆژانی سەخت هەمیشە پارێزەری ئازادیی و دەسکەوتەکانی هەرێم بوون ، بەدڵنیاییشەوە بەجۆش و خرۆشەوە خۆیان و کەس و کار و هاوڕێ و دۆستان و دراوسێکانیان دەبەنە سەر سندوقی دەنگدان و لیستی هاوپەیمانی کوردستان  سەردەخەن، "هەڤاڵ بورهان"یەکێتی بە داکۆکیکاریی مافە دەستوریەکان و شایستە سیاسی و داراییەکانی هێزی پێشمەرگەش لەقەڵەم داو و ڕایگەیاند کە بە ناردنی زۆرترین نوێنەری یەکێتی و هاوپەیمانی ، هەموو ئەو دەسکەوت و مافانە پارێزراوتر چەسپاوتر دەبن.

لەبارەی میکانیزمەکانی دەنگدان و دەنگدانی تایبەت و گشتیەوە هەڤاڵ "عەبدوڵڵا کانی بەردی" ڕونکردنەوەیەکی پێویستی دا و بەخۆناساندن و ڕونکردنەوەی کارنامەی کاندیدانی لیستی هاوپەیمانی کوردستان کۆبوونەوەکە کۆتایی هات.

PUKmedia