قوباد تاڵه‌بانی: به‌رده‌وامده‌بین له‌ ره‌خساندنی هه‌لی كاری زیاتر بۆ گه‌نجان

ئێواره‌ی ئه‌مڕۆ 25-9-2021، به‌ ئاماده‌بوونی قوباد تاڵه‌بانی جێگری سه‌رۆكی حكومه‌تی هه‌رێمی كوردستان و چه‌ندین به‌رپرسی حكومی و حزبی، ئاهه‌نگی ده‌رچووانی زانكۆی ئه‌مریكی له‌ سلێمانی به‌ڕێوه‌چوو.

هه‌رله‌و ئاهه‌نگه‌دا قوباد تاڵه‌بانی جێگری سه‌رۆكی حكومه‌تی هه‌رێم وته‌یه‌كی پێشكه‌شكردو رایگه‌یاند: ئه‌مڕۆ لێره‌ین له‌ زانكۆی ئه‌مریكی له‌ سلێمانی بۆ ئاهه‌نگی ده‌رچوونی ژماره‌یه‌ك خوێندكار كه‌ له‌ پاشه‌ڕۆژدا ئه‌م وڵاته‌ ده‌توانێت سود له‌ تواناكانیان وه‌ربگرێت، رۆڵی گرنگ بگێڕن له‌ ئاوه‌دانكردنه‌وه‌ی كوردستان و عیراقدا.

قوباد تاڵه‌بانی راشیگه‌یاند: زانكۆی ئه‌مریكی كه‌ناوی گه‌وره‌ترین و به‌هێزترین وڵاتی هه‌ڵگرتووه‌، به‌رهه‌می خوێنی شه‌هیدانه‌، بۆیه‌ ده‌بێت شانازییه‌كی گه‌وره‌ی پێوه‌بكه‌ین، كه‌ له‌ ئێستادا گه‌نجانمان له‌م زانكۆیه‌ به‌زانستێكی سه‌رده‌میانه‌و به‌شێوازێكی مۆدێرن راده‌هێنرێن و په‌روه‌رده‌ ده‌كرێن بۆ خزمه‌تكردنی وڵاته‌كه‌مان.

جێگری سه‌رۆكی حكومه‌تی هه‌ێم وتیشی: كوردستان و عیراق پێویستی به‌ تواناكانی خوێندكارانی ده‌رچووی زانكۆی ئه‌مریكی و سه‌رجه‌م زانكۆكانی تری كورستان هه‌یه‌، بۆیه‌ ئه‌م خوێندكارانه‌ی ئه‌مڕۆ ده‌رده‌چن و بڕوانامه‌یان پێده‌درێت ده‌توانن رۆڵیان هه‌بێت له‌ بنیاتنانه‌وه‌ی وڵاته‌كه‌مان.

 ئاماژه‌ی به‌وه‌شدا، وه‌ك حكومه‌تی هه‌رێم به‌رده‌وام ده‌بن له‌ره‌خساندنی هه‌لی كاری زیاتر بۆ ده‌رچووانی زانكۆو په‌یمانگاكان، وتیشی: پێویسته‌ نوێگه‌ری و داهێنان له‌ بواری خوێندنی باڵادا بكرێت و زانكۆكانمان به‌ بازاڕی كاره‌وه‌ گرێ بدرێن.

هه‌روه‌ها وتی: گه‌نجانی ئه‌مڕۆ داهاتووی وڵاتن، بۆیه‌ ده‌بێت گرنگی زیاتر به‌ خۆپه‌روه‌رده‌كردن و ده‌وڵه‌مه‌ندكردنی خۆیان بده‌ن به‌ زانست و پێشكه‌وتنی سه‌رده‌م، تاكو بتوانن رۆڵی گرنگ و كاریگه‌ریان هه‌بێت له‌ خزمه‌تكردن و بنیاتنانه‌وه‌ی وڵاته‌كه‌یان.

قوباد تاڵه‌بانی رووی كرده‌ خوێندكارانی ده‌رچووی زانكۆی ئه‌مریكی و پێی راگه‌یاندن عیراق و كوردستان پێویستی به‌ تواناكانی ئێوه‌یه‌ بۆیه‌ ده‌بێت رۆڵتان هه‌بێت له‌ بنیاتنانه‌وه‌ی عیراق و كوردستان، داواشتان لێده‌كه‌م به‌شداری پرۆسه‌ی هه‌ڵبژاردن بكه‌ن، له‌به‌ر ئه‌وه‌ی ده‌نگدانی ئه‌مجاره‌ چاره‌نووسسازه‌ بۆ وڵاته‌كه‌مان ده‌تووانن له‌ رێگه‌ی ده‌نگه‌كانتانه‌وه‌ ژیانێكی باشتر بۆ خۆتان دابین بكه‌ن.

PUKmedia