حاڵەتی گیانلەدەستدان لەكاتی منداڵبوون تۆماردەكرێت

د.ئەحمەد زویتین، سەرۆكی نێردەی رێكخراوی تەندروستی جیهانیی لەعیراق، ئەمڕۆ یەكشەممە 19ی ئەیلولی 2021 رایگەیاند لە هەر سەد هەزار لەو دایكانەی مناڵی تازەلەدایكبووییان دەبێت، 34 حاڵەتی گیانلەدەستدان تۆماركراون و هەروەها لەهەر هەزار منداڵێكی تازە لەدایكبوو 14 حاڵەتی گیانلەدەستدان لەعیراق هەبووە.

زویتین لەمیانی بەشداریكردنی لە ئاهەنگی یادی رۆژی جیهانی سەلامەتی نەخۆش كە لەبارەگای وەزارەتی تەندروستی فیدڕاڵ بەڕێوەچوو، راشیگەیاند: رێكخراوی تەندروستی جیهانی هەموو هەوڵێك دەدات لەپێناو كەمكردنەوەی رێژەی گیانلەدەستدان لەنێو دایكان و مناڵان و كارمەندانی تەندروستیدا، بەگوێرەی تازەترین ئامار كەتایبەتە بەعیراق لەلایەن تەندروستی جیهانییەوە دەرچووە، لەهەر سەد هەزار لەو دایكانەی مناڵی تازەلەدایكبووییان دەبێت ، 34 حاڵەتی گیانلەدەستدان تۆماركراون و هەروەها لەهەر هەزار منداڵێكی تازەلەدایكبوو 14 منداڵی تازە لەدایكبوو گیانیان لەدەستداوە.

راشیگەیاند: هەرچەندە ئەم ژمارانە بەراورد بەساڵانی رابردوو رێژەیەكی نزمە، بەڵام پێویستە هەموو هەوڵەكانمان یەكبخەین بۆ هێنانەدی رێژەیەكی لەوە باشتر ئەوەش لەڕێگەی باشتركردن و پەرەپێدانی زیاتر دەبێت بە دامودەزگاكانی تەندروستی و كارمەندو پزیشكەكانی بەشی منداڵبوون و پزیشكانی مناڵانی تازەلەدایكبوو، هەروەها مامان و پەرستیارەكان ئەوەش لەسەر بنەمای پێوەرەكانی باشتركردنی تەندروستی دایكان و مناڵانی تازە لەدایكبوو.

لای خۆیەوە، ریتا كۆلومبیا، بەڕێوەبەری سندوقی نەتەوە یەكگرتووەكان بۆ دانیشتوان، ستایشی رۆڵ و هەوڵەكانی وەزارەتی تەندروستی فیدڕاڵ و راسپاردەكانی وەزیری كردو جەختیشی لەسەر ئامادەبوونی سندوقی نەتەوە یەكگرتووەكان كردەوە لەپشتیوانی وەزارەتی تەندروستی و بەتایبەتیش ئەوەی پەیوەندی بە دایك و مناڵەوە هەیە.

PUKmedia بەدواداچوون