قوباد تاڵه‌بانی: هاوپه‌یمانی كوردستان هاوپه‌یمانی سه‌رۆك مام جه‌لال و كاك نه‌وشیروانه‌

ئێواره‌ی ئه‌مڕۆ 14-9-2021، به‌ ئاماده‌بوونی قوباد تاڵه‌بانی سه‌رۆكی هاوپه‌یمانی كوردستان و كاندیدانی هاوپه‌یمانی له‌ كورددستان له‌ بازنه‌ی 4ی سلێمانی و چه‌ندین فه‌مانده‌و كادیرو ئه‌ندام و لایه‌نگرانی یه‌كێتیی نیشتمانیی كوردستان و بزووتنه‌وه‌ی گۆڕان كه‌رنه‌ڤاڵی ناساندنی كاندیدانی هاوپه‌یمانی كوردستان له‌ پاركی ده‌روازه‌ی راپه‌ڕین، له‌ رانیه‌ به‌ڕێوه‌چوو.

له‌سه‌ره‌تای كه‌رنه‌ڤاڵه‌كه‌شدا، هه‌ریه‌ك له‌ كاندیدانی هاوپه‌یمانی كوردستان له‌ سنووره‌كه‌ كه‌ بازنه‌ی 4 ی سلێمانییه‌و ژماره‌یان سێ كاندیدن خۆیان ناساند، ئه‌وانیش غه‌ریب ئه‌حمه‌د كاندیدی ژماره‌ (20)و به‌ردریه‌ حسێن كاندیدی ژماره‌ (28)  و به‌كر بایز كاندیدی ژماره‌ (23)ن، له‌به‌رده‌می جه‌ماوه‌ری شاری رانیه‌ی ده‌روازه‌ی راپه‌ڕین، خۆیان ناساند.

پاشان قوباد تاڵه‌بانی سه‌رۆكی هاوپه‌یمانی كوردستان وتارێكی پێشكه‌شكردو رایگه‌یاند: هاوپه‌یمانی كوردستان، هاوپه‌یمانی سه‌رۆك مام جه‌لال و كاك نه‌وشیروانه‌ بۆیه‌ ده‌بێت هه‌موومان هه‌وڵی سه‌رخستنی بده‌ین.

 سه‌رۆكی هاوپه‌یمانی كوردستان وتیشی: هاتووین لێره‌وه‌ له‌ناو خزم و كه‌سوكاری خۆماندا چه‌خماخه‌ی داستانێكی تر، لێبده‌ین، ئه‌ویش چه‌خماخه‌ی هاوپه‌یمانی كوردستانه‌و له‌ ژێر دروشمی به‌یه‌كه‌وه‌ به‌هێزترین جێبه‌جێبكه‌ین.

وتیشی: له‌ ماوه‌ی رابردودا به‌ ته‌نها له‌ ده‌ڤه‌ری راپه‌ڕین 30 پڕۆژه‌ی گه‌وره‌و بچوك و 180 پڕۆژه‌ی جۆراو جۆرمان فراوان و نۆژه‌نكردووه‌ته‌وه‌، بۆیه‌ به‌ڵێن ده‌ده‌ین ، ئه‌گه‌ر هاوپه‌یمانی كوردستان سه‌ربخه‌ین ده‌توانین ژماره‌یه‌كی زۆر كاندیدی كاریگه‌رو به‌ توانا بنێرینه‌ په‌رله‌مانی عیراق تا بتوانن شه‌ڕی مووچه‌و بودجه‌ بكه‌ن خزمه‌تێكی زیاتر به‌ هاووڵاتییان و سنووره‌كه‌ بكه‌ین، هه‌روه‌ها وتی داواتان لێده‌كه‌م بۆ گه‌ڕاندنه‌وه‌ی هاوسه‌نگی هێز ده‌نگ به‌ هاوپه‌یمانی كوردستان بده‌ن .

قوباد تاڵه‌بانی راشیگه‌یاند: ئێمه‌ به‌ یه‌كڕیزی و یه‌ك ده‌نگی له‌ به‌غدا شه‌ڕی یه‌كڕیزی و مافه‌كانی خه‌ڵكی كوردستان ده‌كه‌ین ، هه‌روه‌ها وتی: داواتان لێده‌كه‌ین ده‌نگ به‌ هاوپه‌یمانی كوردستان بده‌ن، بۆئه‌وه‌ی بتوانیان شه‌ڕی موچه‌و بودجه‌ی بكه‌ین و مافه‌ ده‌ستوریی و یاساییه‌كانی هاووڵاتییانمان بپارێزین وتیشی: ده‌نگ به‌ هاوپه‌یمانی كوردستان بده‌ن بۆ ئه‌وه‌ی كه‌سانی كاریگه‌رو باش بنێرینه‌ به‌غدا تا شه‌ڕی موچه‌و بودجه‌ قوتی هاووڵاتییانمان بكه‌ن.

PUKmedia تایبه‌ت