riklam

قوباد تاڵه‌بانی: به‌ریتانیا پشتیوانی پرۆسه‌ی چاكسازی هه‌رێم بكات

کوردستان 02:30 PM - 2021-09-14

قوباد تاڵه‌بانی جێگری سه‌رۆك وه‌زیران پێشوازی كرد له‌ ده‌یڤد هه‌نت، كونسوڵی گشتی نوێی به‌ریتانیا له‌ هه‌رێمی كوردستان و جه‌یمی هامیڵ ـ ی جێگری و له‌باره‌ی كۆمه‌ڵێك پرسی جێگه‌ بایه‌خی هه‌ردوولا گفتوگۆیان كرد. 

له‌ كۆبوونه‌وه‌یه‌كدا ئه‌مڕۆ 14-9-2021 له‌ هه‌ولێر، قوباد تاڵه‌بانی وێڕای پیرۆزبایی له‌ ستافی نوێی كونسوڵخانه‌ی به‌ریتانیا، داوای كرد كاربكه‌ن له‌ پێناو ده‌سته‌به‌ركردنی پشتیوانی به‌ریتانیا بۆ پرۆسه‌ی چاكسازی و په‌ره‌پێدانی حوكمڕانی له‌ كوردستان بۆ ئه‌وه‌ی بتوانرێت له‌و ڕێگه‌یه‌وه‌ خزمه‌تگوزاری باشتر پێشكه‌ش به‌ كۆمه‌ڵانی خه‌ڵكی كوردستان بكرێت. 

هه‌ردوولا هاوڕابوون له‌باره‌ی گرنگی هه‌ڵبژاردنی 10ی مانگی داهاتوو، جه‌ختیشیان كرده‌وه‌ ده‌بێت به‌شێوازێكی ته‌ندروست و پاكوبێگه‌رد به‌ڕێوه‌بچێت. وه‌فده‌ به‌ریتانییه‌كه‌ ئاماده‌یی وڵاته‌كه‌یان ده‌ربڕی بۆ ڕه‌وانه‌كردنی چاودێر بۆ هه‌ڵسه‌نگاندنی چۆنییه‌تی به‌ڕێوه‌چوونی پرۆسه‌كه‌ و دڵنیابوونه‌وه‌ له‌ جێبه‌جێكردنی به‌ندو باوه‌ یاسایی و دیموكراسییه‌كان. 

قوباد تاڵه‌بانی داوایكرد به‌ریتانیا گه‌رمتر له‌جاران په‌یوه‌ندییه‌ دوو قۆڵییه‌كان له‌گه‌ڵ هه‌رێمی كوردستان بباته‌ پێشه‌وه‌، وه‌فده‌كه‌ش پابه‌ندی وڵاته‌كه‌یان دووپات كرده‌وه‌ به‌ درێژه‌دان به‌ هاوكارییه‌كان و په‌یوه‌ندییه‌كان و باشتركردنیان له‌ قۆناغی داهاتوودا به‌تایبه‌ت پاش كشانه‌وه‌ی هێزه‌ شه‌ڕكه‌ره‌كانی ئه‌مریكا و هاوپه‌یمانان له‌ كۆتایی ئه‌م ساڵ. 

جێگری سه‌رۆك وه‌زیران داوای له‌ كونسوڵخانه‌ی به‌ریتانیا كرد له‌سه‌ردان و چالاكییه‌كانیاندا سه‌رجه‌م ده‌ڤه‌ر و ناوچه‌ جیاجیاكان كوردستان به‌سه‌ر بكه‌نه‌وه‌ و چالاكییه‌كانیان ته‌نها له‌ سه‌نته‌ری شاره‌ گه‌وره‌كاندا چڕ نه‌كه‌نه‌وه‌، وه‌فده‌كه‌ش به‌ گرنگییه‌وه‌ پێشنیاره‌كه‌یان وه‌رگرت.

PUKmedia 

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket