14-9 یەکەم رۆژی دەستپێکردنی پڕۆسەی خوێندنە

قوباد تاڵه‌بانی جیگری سه‌رۆكی ئه‌نجومه‌نی وه‌زیران، سه‌رۆكایه‌تی كۆبوونه‌وه‌یه‌كی بۆردی په‌روه‌رده‌ و خوێندنی باڵای كرد كه‌ تایبه‌ت بوو به‌ ده‌ستپیكردنه‌وه‌ی پرۆسه‌ی خوێندنی ساڵی 2021_ 2022 له‌‌گه‌‌ڵ چه‌‌ند بابه‌‌تێكی تری تایبه‌‌ت به‌ ڕه‌وشی ‌خوێندن و قوتابیان.

قوباد تاڵه‌بانی جیگری سه‌رۆكی ئه‌نجومه‌نی وه‌زیران ئه‌مڕۆ (23ی ئابی 2021) له‌ هه‌ولێر، سه‌رۆكایه‌تی كۆبوونه‌وه‌ی بۆردی په‌روه‌رده‌ و خوێندنی باڵای كرد به‌ ئاماده‌بوونی وه‌زیرانی خوێندنی باڵا و توێژینه‌وه‌ی زانستی و په‌روه‌رده‌ له‌گه‌ڵ سه‌رۆكی دیوانی ئه‌نجومه‌نی وه‌زیران و سه‌رۆكی فه‌رمانگه‌ی هه‌ماهه‌نگی و به‌دواداچوون و، باس له‌ چه‌ند بابه‌تێكی تایبه‌ت به‌ خوێندن كرا.  

سه‌ره‌تای كۆبوونه‌وه‌ باس له‌ ئاماده‌كارییه‌كان و دابینكردنی پێداویستییه‌كانی خوێندن و خوێندكاران كرا  له‌‌ناو پۆله‌‌كان، له‌گه‌ڵ پابه‌ند بوون به‌ ڕێنماییه‌كانی ته‌ندرووستی و خۆپارێزی له‌ ڤایرۆسی كۆرۆنا.
جێگری سه‌رۆكی ئه‌نجومه‌نی وه‌زیران، جه‌ختی كردوه‌؛ حكومه‌ت پێداویستییه‌كانی ده‌ستپێكردنی پرۆسه‌ی خوێندن دابین ده‌كات بۆ ئه‌وه‌ی له‌ 14/ 9/ 2021 خوێندن له‌ قوتابخانه‌كان  ده‌ستپێبكات و ئه‌و ڕێكه‌وته‌ش بۆ ده‌ستپێكردنه‌وه‌ی پرۆسه‌كه‌ كرایه‌ بڕیار. 

لای خۆیه‌وه‌ وه‌زیری په‌روه‌رده‌ ئاماژه‌ی به‌وه‌دا كه‌ ئه‌وان وه‌ك وه‌زاره‌ت و مامۆستایان و فه‌رمانبه‌ران ئاماده‌ن بۆ ده‌ستپێكردنه‌وه‌ی پرۆسه‌ی خوێندن، هه‌روه‌ها رایگه‌یاند؛ ئه‌مڕۆ ئه‌نجامی تاقیكردنه‌وه‌ گشتییه‌‌كانی خولی یه‌‌كه‌‌می پۆلی دوازده‌‌ راده‌گه‌یه‌نرێت.

هه‌ر له‌ كۆبوونه‌وه‌كه‌ وه‌زیری خوێندنی باڵا و توێژینه‌وه‌ی زانستی باسی له‌ ئاماده‌كارییه‌كان كرد بۆ ده‌ستپێكردنه‌وه‌ی خوێندن له‌ زانكۆ و په‌یمانگان و رایگه‌یاند؛ خوێندنی باڵا له‌ماوه‌ی نێوان 1/9  تاوه‌كو 25/9 خوێندن ده‌ستپێده‌كات له‌ناو هۆڵه‌كانی زانكۆ. هه‌روه‌ها وتیشی "به‌پێی  رۆژژمێری زانكۆیی زانكۆكان ئاماده‌كارییه‌كانیان ده‌ست پێكردوه‌ و به‌ ڕه‌چاوكردنی رێنماییه‌ ته‌ندروستییه‌كان ده‌وام ده‌ست پێده‌كات". 
دواتر ئاماره‌كانی توانای زانكۆ و په‌یمانگاكانی خرانه‌ڕوو بۆ وه‌رگرتنی خوێندكارانی نوێ و خوێندنی باڵا بۆ ئه‌مساڵی خوێندن.

  ھه‌‌روه‌‌ھا له‌ كۆبوونه‌وه‌كه‌ بۆچوونه‌كانی په‌یوه‌ست به‌ قبوڵ مه‌ركه‌زی (ناوه‌‌ندی) خرانه‌ڕوو له‌گه‌ڵ چۆنییه‌تی رێكخستنه‌وه‌ی پرسی وه‌رگرتنی خوێندكاران له‌ زانكۆ و په‌یمانگاكان به‌ شێوازێك كه‌ له‌گه‌ڵ سه‌رده‌م و پێویستی بازاڕ بگونجێت، به‌شداران جه‌‌ختیان له‌‌ گرنگی خوێندنی پیشه‌‌یی كرده‌وه‌ و هاوڕابوون پێویسته‌‌ زیاتر په‌‌ره‌‌ی پێبدرێت.

PUKmedia