بەریتانیا پەرە بە پەیوەندییە زانستییەكانی لەگەڵ هەرێم دەدات

وەزیری خوێندنی باڵا و توێژینەوەی زانستی رایدەگەیەنێت، لەبواری زانستی و ئەكادیمی و پەرەپێدانی تواناكان و خوێندنی باڵا، وەزارەتەكەمان چەندین پڕۆژەی زانستی هاوبەشی لەگەڵ زانكۆ و دامەزراوە زانستییەكانی وڵاتی بەریتانیا هەیە.

ئەمڕۆ سێ شەممە رێكەوتی (2021/8/3) د. ئارام محەمەد قادر وەزیری خوێندنی باڵا و توێژینەوەی زانستی لەگەڵ مێلانی سمارت كونسوڵی گشتی بەریتانیا لە هەرێمی كوردستان كۆبۆوە.

لە كۆبوونەوەیەكدا كە بریكاری وەزارەت و راوێژكار و بەڕێوەبەرانی گشتی ئامادەیبوون، كونسوڵی گشتی بەریتانیا لە هەرێمی كوردستان خۆشحاڵی خۆی نیشاندا بۆ سەردانی وەزارەتی خوێندنی باڵا و توێژینەوەی زانستی و باسی لە ئەرك و كاری هاوبەشی زانكۆكانی بەریتانیا كرد لەگەڵ زانكۆ و دامەزراوەكانی هەرێمی كوردستان.
 
لە وتەیەكیشدا وەزیری خوێندنی باڵا و توێژینەوەی زانستی باسی لە پەیوەندییەكانی حكومەت و گەلی كوردستان لەگەڵ وڵاتی بەریتانیا كرد و بۆ ئەمەش وتی: لە قۆناغی داهاتوودا دەمانەوێت پەیوەندییەكانمان بۆ ئاستێكی فراوانتر پەرەپێبدەین، بەو پێیەی وەزارەتەكەمان لە ڕابردوودا زۆرترین پڕۆژەی زانستی هاوبەشی لەگەڵ زانكۆ و دامەزراوەكانی وڵاتی بەریتانیا هەبووە و ، زۆرترین وەبەرهێنانی زانستی لە بوارەكانی پەرەپێدانی تواناكان و  توێژینەوەی هاوبەش و ئاڵوگۆری ئەكادیمی لەگەڵ زانكۆكانی بەریتانیا هەبووە بۆیە خوازیارین ئەم پەیوەندییە زانستییانە فراوانتر بن و بوارەجیاجیاكانی تایبەت بەگەشەپێدانی كەرتی خوێندنی باڵا لەخۆ بگرێت.
 
د. ئارام محمد قادر بە كونسوڵی بەریتانیای ڕاگەیاند: بەشێكی گرنگ و ستراتیژی كاری ئێە لە كابینەی نۆیەمی حكومەتی هەرێمی كوردستان بریتیە لە فراوانكردنی پانتایی خوێندنی تەكنیكی و پیشەیی لە هەرێمی كوردستان، لەو چوارچێوەیەشدا بەپێویستی دەزانین كەناڵێكی ڕاستەوخۆ و باشتر لەگەڵ بازاری كاری كوردستان ئەنجام بدەین، بۆ جێبەجێكردنی ئەم ئامانجانە پێویستمان بە شارەزایی و لێهاتویی و توانا زانستییەكانی بەرتانیا هەیە، بۆ ئەوەی سود لە ئەزمون و توانای ئەو وڵاتە وەربگرین.
هەروەها وەزیری خوێندنی باڵا باسی لە پلانی وەزارەت بۆ ڕیفۆرمی سیستمی ناوەندیی وەرگرتنی خوێندكاران و قوتابیان كرد، بۆ ئەمەش وتی بەشداری و هەماهەنگی شارەزایانی بەریتانیا زۆر یارمەتیدەر دەبن لە سەرخستنی ئەم پرۆژەیە.
تەوەرێكی دیكەی گفتوگۆكان تایبەت بوون بە فروانكردن و بەهێزكردنی ڕۆڵ و پێگەی ژنان لە كایەی ئەكادییمی و سەركردایەتیكردنی دامەزراوەكانی خوێندنی باڵا لە هەرێمی كوردستان، لەم چوارچێوەیەشدا كونسوڵی گشتی بەریتانیا ئامادەیی وڵاتەكەی نیشان دا بۆ هاوكاریكردنی وەزارەتی خوێندنی باڵا و توێژینەوەی زانستی لەم دەستپێشخەرییە، لەم چوارچێوەیەشدا بڕیاردرا كۆمەڵێك پرۆژە و چالاكی هاوبەش ئەنجام بدرێت و دەرفەتی ڕاهێنانی توانای سەركردایەتیكردن بۆ ژنانی نێو دامەزراوە ئەكادیمییەكانی هەرێمی كوردستان لەلایەن زانكۆكانی بەریتانیاوە بڕەخسێنرێت.
PUKmedia  راگەیاندنی وەزارەتی خوێندنی باڵاوتوێژینەوەی زانستی