دەنگ و شوناس

‎گۆڤه‌ند ره‌جه‌ب

سه‌ره‌ڕاى ئه‌و هه‌موو ئاسته‌نگانه‌ى بۆى دروستكرا،  هه‌ڵبژاردنى ئه‌نجومه‌نى پارێزگاكان بەڕێوەچوو، له‌و سۆنگه‌یه‌شه‌وه‌، ده‌نگده‌رانى كورد له‌هه‌موو ناوچه‌ دابڕێنراوه‌كان: كه‌ركوك، نه‌ینه‌وا، خانه‌قین، مه‌خمور، خورماتوو، به‌ده‌نگه‌كانیان جارێكى تر چاره‌نووسى ئه‌و ناوچانه‌یان دایه‌وه‌ ده‌ست نوێنه‌رانى كوردو سه‌رله‌نوێ کوردستانیبوونی هه‌موو ئه‌و ناوچانه‌یان سه‌لمانده‌وه‌.

كوردانى ناوچه‌ دابڕێنراوه‌كان، به‌ده‌نگه‌كانیان به‌هه‌موو نه‌یارانیان وت ئه‌و ناوچانه‌ خاكی كوردانه‌و هیچ دژایه‌تى و داگیركارییه‌ك ئه‌وراستیه‌ ناگۆڕێت و بە ده‌نگ و به‌خوێن پارێزگاری له‌وناوچانه‌ ده‌‌كات.

‌‌‎كورد، له‌و ناوچانه‌، پرۆسه‌ى ده‌نگدانیان گۆڕى بۆ كه‌رنه‌ڤاڵى نه‌ته‌وه‌یی و جه‌ژنى سه‌ركه‌وتن، سه‌لماندیان کە نه‌ ته‌عریب و ته‌بعیس، نه‌ راگواستن، نه‌ گرتن و ئازاردان، ساردیان ناكاته‌وه‌ له‌به‌رگریكردن له‌خاكى باب و باپیریان.

‎جارێكی تر ڕۆڵه‌كانی نیشتمان سه‌لماندیان كه‌ چۆن له‌رابردوو به‌خوێن پارێزگاریان له‌ خاك وئاو ئاڵاو وڵاتیان كردوه‌، به‌ده‌نگه‌كانیان مره‌كه‌بی شكۆ و وه‌فاو سه‌روه‌رییان له‌په‌نجه‌یان داو بڕوا و متمانه‌ی خۆیان به‌خشییه‌وه‌ حزبی شه‌هیدان، تاشه‌ڕى كوردستانى بوونى ئه‌و ناوچانه‌یان بۆ بكات.