Desteya Perwerdeyê vekirina peymangehên mamosteyan didomîne

Rêveberiya Xweser bi vekirina peymangehên gihandina mamosteyan û li gorî bername û sîstemên zanîngehên nû hewldana avakirina perwerdeyeke baş dike.

Ji bo gihandina kadroyên perwerdeyê, Rêveberiya Xweser a Bakur û Rojhilatê Sûriyê li herêmên xwe peymangeheke nû ya mamosteyan vekir, 9 Kanûna 2021` li bajarê Hesekê Desteya Perwerde û Fêrkirinê ya Rêveberiyê peymangeke mamosteyan vekir.
Li herêma Cizîrê ev yekemîn peymangehe tê vekirin, piştî peymangehên Reqa û Minbicê ev a sêyemîn e.
Li gorî hevseroka Desteya Perwerde û Fêrkirinê Kewser Doko, Rêveberiya Xweser bi vekirina van peymangehan armanc dike qada perwerdeyê bi pêş bixe .peymangeh ji 7 beşên sereke pêk tên ku ew jî zimanê kurdî, îngilîzî, zanist (fîzîk û kîmya), wênexêzî, bîrkarî û werzîş in.
Dema xwendinê li Peymangeha Mamosteyan 2 sal e û li ser 5 werzan hatiye dabeşkirin. Derbarê mamostetiyê de hevserokê peymangehê amadekirina mamosteyan li Hesekê Azad Mehmûd got: "Peymangeha Mamosteyan xwendekaran di hemû aliyên zanistî û pratîkî de amade dike."

Desteya Perwerde û Fêrkirinê ya Rêveberiya Xweser a Bakur û Rojhilatê Sûriyê li herêma Cizîrê dê peymangeheke din veke, lê dema wê diyar nekir, bi vî awayî dê hejmara peymangehan bibe 4.

PUKmedia