Îsraîl ji bo me xwe nake neyarê gelên navçeyê

Hozan Efrînî

Wezîreke Îsraîlê di dauyaniyeke xwe de ragihand ku kurdan ji wan xwestiye ku di warên mirovî û dîplomasî de alîjar bin û wan jî ew daxwaz pejirandiye û destek dane kurdên Rojavayê Kurdistanê,

Dibe ku hinek çalakvan an jî kes û aliyên kurdî alîkarî ji hinek kesayetiyên cuhî an jî Îsraîlî bi riya facebook an jî ku di dema serdanên wan ji Îsraîlê re wek kes û çalakvan xwestibin, lê mixabin bawer nakim ji bilî alîkariyên mirovî ti alîkariyên din bidin gelê kurd.

Ji ber ku di Rojhilata Navîn de, Ereb û Tirk û Faris û Ecem ji gelê kurd pirtir û bihêztirin û bi yasaya navneteweyî tevdigerin lê mixabin gelê kurd heya niha ne xwedî yasa û desture, ne xwedî welat û dewleteke desturî ku ji aliyê UNê ve hatibe pejirandin, ji ber wê yekê jî, Îsraîl xwe nake dijminê Tirkan û Êraniyan û Ereb û Îslamiyên cîhanê ji bo xatrê gelê kurd.
Wek em hemû dizanin ku Rêkevtina Cezaîrê ya pîs navûdeng ku şoreşa gelê kurd li Başûrê Kurdistanê hilweşand, bi alîgiriya Îsraîlê û Amerîkayê pêkahatibû.
Her çiqas Nemir Mila Mistefa Barzanî bi hemû awayekî hewil da û çiqas hevkarî dixwest û dostaniya Îsraîlê jî dikir, lê mixabin Îsraîlê tenê karên xwe ên bazirganiyê li gel Tirk û Êran û ereban birêve dibir û berjewendiyên xwe bi ser her tiştî re dijmêre.

Dema ku ez vê nivîsê dinivîsim, bila her kes bizanibe ku em ne neyarê Îsraîlê û gelê wê ne û ne jî neyarê cuhiyên cîhanê ne. Lê hêviya me ji alîkariya Îsraîlê pir lawaze, ji ber ku Îsraîl jî neçare ku gelê xwe û berjewendiyên xwe di herêm û navçeya Rojhilata Navîn de bi hûrgilî biparêze û berjewendiyên xwe di Rojhilata Navîn de biparêze.

Lê car car ew daxuyaniyên agrîn ku hinek berpirsên Îsraîlê ji kenal û ragiahndinan re didin, ez bawer im ne cihê baweriyê ne, ji ber ku eger rast dikin, bila di saziya fermî ya Neteweyên Yekbûyî ku cihê pejirasndina biryar û çarenivîsên doza gelên cîhanê ye (UN)ê de bikin proje û doza kurd bikin bernameya xwe û pêşkêş bikin û xwedî lê derkevin û rêkevtinên xwe ên bazirganî û leşkerî bi Tirkiyê re kêm û qelis bikin û fişar li ser Tirkiyê çê bikin û xwedî li wan soz û gotinê xwe ên ku derbarê kurdan de tînin ser ziamn derkevin.

Hozan Efrînî