Li Efrînê demsala çinîna zeytûnanên bê xwedî ye

Baxên Zeytûnên Efrîna bêkes

Weke her sal li herêma Efrînê, demsala çinîna zeytûnan di meha cotmehê de, dest pê dike û xelkê Efrînê bi giştî di her sê mehan de, dibin xwedî kar û îş û berhemên xwe derdixînin holê û aboriya herêma Efrînê pêş dikeve.

Li herêma Efrînê bêtir ji 25 milyon darên zeytûnê hene, ji wan 15 milyon dar berhemdarin û 5 milyon jî li ber berhemê ne û 5 milyon darên din jî biçûk û nûhdarin.

Gelê Kurd li herêma Efrînê, di cotmehê de, dest bi çinîna zeytûna dike û digel xwediyê kargehan jî peymanan dikin taku zeytûnên xwe bi asanî bibin û bikin zeyt û ronê zer.

Zeytûna Efrînê yekek ji zeytûnên here binirx yên li asata Sûriyê ye, di sala 2008`an de, di pêşangeheke navdewletî ya zeytûnan li welatê Îtaliyayê, Sûriyê li nav welatên Ereban yê yekem bû, di Sûriyê de jî, herêma Efrînê ya yekem bû di başbûn û pakbûn û tama wê de, ev tê wê wateyê ku hem ax û hem jîngeha mEfrînê ji navçeyên din yên welatên Erebî paktir û xweşiktir e û ev jî vedigere ser rastiya bixêrbûna axa Efrînê ji kar û barên keştûkaliyê re.

Lê wek tê gotin ku li Herêma Efrînê ya dagîrkirî, piştî dagîrkirina wê ji aliyê Tirkiyê ve bi alîkariya Rûsiyayê, demsala çinîna zeytûnanên bê xwedî ye û heya niha kes çarenivîsa berhemên zeytûnên xwe nizane. Ev yek xelkên Efrînê bi giştî nîgerankiriye, ji ber ku komên çete ên bi navê opozisyona Sûrî û bi palpişta Tirkiyê li gor xwe tevdigerin û heya niha çarenivîsa berhemên zeytûnan ne diyar e.

PUKmedia