Daxuyaniya piştgiriya li Hêzên Rojavayê Kuridstanê

Daxuyaniya piştgiriya li Hêzên Rojavayê Kuridstanê

Komîteya Rêxistinî ya kampanya “Yekîneyên Parastinê, hêzên niştimanî ne” li bajarê Qamîşloyê bi daxuyaniyekê piştîvanî ji bo YPG`ê xwest û wêneyek ji wê gihîşte PUKmedia`yê ku ev jî naveroka wê ye;

DAXUYANÎ JI BO RAYA GIŞTÎ
Weke erkeke me ya neteweyî, niştimanî û mirovahî, her wiha weke berpirsiyariya dîrokî ya li ser milê me rewşenbîr, ragihîner û çalakvanan dikeve, em piştgiriya xwe ji hêzên me yên niştimanî YPG-YPJ re nîşan didin.
Wan hêzan tiştê herî giranbuha li gel xwe ji bo parastina xak û rûmeta Rojava û Bakurê Sûriyayê pêşkêş kirin û hîn jî pêşkêş dikin..
Em bi helwesteke tund, tewanbariyên li dijî van hêzan napejirînin; ev hêzên ku hemû pêkhateyên neteweyî û etnîkî diparêzin û ji hemû pêkhateyên Rojava û Bakurê Sûriyayê digirin nava xwe. Her wiha em li ser wê yekê tekez dikin ku em li hember hemû aliyên ku dixwazin tometa terorê bi hêzên me bixînin û têxin lîsteya terorê de disekinin, ji ber ku hinek aliyên Sûrî û di nav de jî hinek kesayetên kurd ên girêdayî wan jî hene, ev demek dirêj e û li ser hemû astan hewil didin berxwedaniya hêzên me reş bikin.
Li gor vê yekê, em weke Yekîtiya Nivîskarên Kurd-Sûriya, Yekîtiya Rewşenbîran, Komeleya Çandî ya Suryanî, Yekîtiya Ragihandina Azad û her wiha ji kesên çalakvan û rojnamevanên serbixwe radigihînin ku em kampanyeke bi navê “Yekîneyên Parastinê, hêzên niştimanî ne” dest pê dikin. Kampanya me dê li ser erdê û her wiha bi rêbazê elektironîk jî xebata xwe bike. Li gor vê yekê em hemû sazî û kesayetên niştimanperwer li Rojava û Bakurê Sûriyayê, her wiha li beşên din ên Kurdistanê û derve vedixwînin ku beşdarî kampanyaya me bibin û li ser wê îmze bikin, ji bo ku her kes helwesta xwe li hember hewildanên reşkirinê û kesên li pey van hewildanan disekinin nîşan bidin.
Komîteya Rêxistinî ya kampanya “Yekîneyên Parastinê, hêzên niştimanî ne”
Qamişlo 2-2-2017

PUKmedia