مۆزه‌خانه‌ی ئه‌رمینیا و زانكۆی هه‌ڵه‌بجه‌ ڕ‌ێككه‌وتنامه‌ی لێكتێگه‌یشتن ئیمزا ده‌كه‌ن

بۆ یه‌كه‌مجار له‌عیراق وڕ‌ۆژهه‌ڵاتی ناوه‌ڕ‌استدا دامه‌زراوه‌ی مۆزه‌خانه‌ی جینۆسایدی ئه‌رمینیا و زانكۆی هه‌ڵه‌بجه‌ ڕ‌ێككه‌وتنامه‌ی لێكتێگه‌یشتنیان ئیمزا كرد.

رۆژی سێشه‌ممه‌ رێكه‌وتی 4-5-2021 به‌ ئاماده‌بونی د. مه‌هاباد كامل عه‌بدوڵڵا سه‌رۆكی زانكۆی هه‌ڵه‌بجه‌ و د. هاروتیون ماروتیان سه‌رۆكی دامه‌زراوه‌ی جینۆسایدی ئه‌رمینیا، هه‌ردوو زانكۆی هه‌ڵه‌بجه‌و دامه‌زراوه‌ی مۆزه‌خانه‌ی جینۆسادی ئه‌رمینیا رێكه‌وتنامه‌ی لێكتێگه‌یشتنیان  ئیمزاكرد.

كۆبونه‌وه‌كه‌ به‌هۆكاری رێگرییه‌كانی ڤایرۆسی كۆرۆناوه‌ به‌شێوه‌ی ئۆنلاین به‌ڕ‌ێوه‌چوو كه‌ تێیدا هه‌ریه‌ك له‌راگره‌كانی كۆلێژی یاسا و كارگێڕ‌ی و كۆلێجی زانسته‌ مرۆڤایه‌تیه‌كان و به‌ڕ‌ێوه‌به‌ری په‌یوه‌ندیه‌ ئه‌كادیمیه‌ نێوده‌وڵه‌تیه‌كانی زانكۆی هه‌ڵه‌بجه‌و یاریده‌ده‌ری سه‌رۆكی دامه‌زراوه‌ی مۆزه‌خانه‌ی جینۆسادی ئه‌رمینیا ئاماده‌ی بوون.

له‌ده‌ستپێكی كۆبونه‌وه‌كه‌دا سه‌رۆكی زانكۆی هه‌ڵه‌بجه‌ به‌ تێرو ته‌سه‌لی باسی له‌ گرنگی ناوه‌ڕ‌ۆكی رێكه‌وتنامه‌ی لێكتێگه‌یشتنی نێوان هه‌ردو دامه‌زراوه‌كه‌ كرد تایبه‌ت به‌ بابه‌تی جینۆسایدی گه‌لانی كورد و ئه‌رمه‌ن.

 بۆ ئه‌و مه‌به‌سته‌ش داواكار بوو كه‌ دامه‌زراوه‌ ئه‌رمینیه‌كه‌ هاوكاری ته‌واوه‌تی زانكۆی هه‌ڵه‌بجه‌ بكات له‌ سه‌رپێشخستنی سه‌نته‌ری جینۆساید و ئه‌زمونی دوورودرێژی خۆیان و ئه‌رمینیا له‌گه‌ڵ زانكۆی هه‌ڵه‌بجه‌دا به‌ش بكه‌ن.

له‌ته‌وه‌رێكی تری كۆبونه‌وه‌كه‌دا، سه‌رۆكی دامه‌زراوه‌ی مۆزه‌خانه‌ی جینۆسادی ئه‌رمینیا باسی له‌وه‌ كرد كه‌ ئه‌مه‌ یه‌كه‌م رێكه‌وتننامه‌ی لێكتێگه‌یشتنیانه‌ له‌گه‌ڵ دامه‌زراوه‌یه‌كی زانستی وه‌ك زانكۆ له‌رۆژهه‌ڵاتی ناوه‌ڕ‌است و عیراقدا و بۆ ئه‌و مه‌به‌سته‌ به‌ڵێنی هه‌موو جۆره‌ هاریكاریه‌كی ته‌كنیكی و زانستی كرده‌وه‌ بۆ سه‌رپێخستنی سه‌نته‌ری جینۆسایدی زانكۆی هه‌ڵه‌بجه‌و ئه‌نجامدانی كاری ئه‌كادیمی هاوبه‌شی فره‌چه‌شنه‌.

هه‌ریه‌ك له‌ئاماده‌بوانی كۆبونه‌وه‌كه‌ سه‌رنج و تێبینی خۆیان له‌سه‌ر چۆنێتی خستنه‌ بواری جیبه‌جێكردنی رێكه‌وتنامه‌ی لێكتێگه‌یشتنه‌كه‌ خسته‌ڕوو و بڕ‌یاردرا كه‌ هه‌ماهه‌نگی ته‌واو له‌ نێوان هه‌ردولادا هه‌بێت بۆ ئه‌و مه‌به‌سته‌.

PUKmedia

Screenshot 2021-05-04 184344.jpg

4/5/2021 18:48:00