په‌یامی خاتوو گه‌لاوێژ بۆ ئێزدییه‌كان

له‌ یادی كه‌وتن و جینۆسایدی ئێزدییه‌كاندا خاتوو گه‌لاوێژ په‌یامێك ئاراسته‌ی ئیزدییه‌كان ده‌كات.

پێنج ساڵ به‌سه‌ر  جینۆسایدی ئێزدییه‌كان تێپه‌ڕده‌بێت و خاتوو گه‌لاوێژ بۆ  ئه‌م كاره‌ساته‌ په‌یامێك له‌ ژێر ناونیشانی (برینێك له‌ قووڵایی ویژدانی مرۆڤایه‌تیدا)  بۆ ئێزدییه‌كان ده‌نووسێت.

خاتوو گه‌لاوێژ ئێزدییه‌كان به‌ پێكهاته‌یه‌كی ره‌سه‌نی نه‌ته‌وه‌ی كورد ناوده‌بات و كه‌ ئه‌وانیش له‌به‌رده‌م جه‌ور و سته‌می رۆژگاره‌ زۆر سه‌خته‌كاندا خۆڕاگربوون و له‌گه‌ڵ ئه‌وه‌شدا به‌رگرییان له‌ مانه‌وه‌ و ناسنامه‌ی ره‌سه‌نی خۆیان كردووه‌.

له‌ كۆتای په‌یامه‌كه‌شیدا خاتوو گه‌لاوێژ داوا له‌ هه‌موو لایه‌كی ناوخۆیی و ده‌ره‌كی و نێوده‌وڵه‌تی ده‌كات هاوكاربن بۆ كه‌مكردنه‌وه‌ی ئازاری به‌ سوێی ئێزدییه‌كان و ئه‌و برینه‌ی كه‌ له‌قووڵایی ویژدانی مرۆڤایه‌تیدایه‌.

 ده‌قی په‌یامه‌كه‌ی خاتوو گه‌لاوێژ:
برینێك له‌ قووڵایی ویژدانی مرۆڤایه‌تیدا

ئه‌مڕۆ پێنج ساڵ به‌سه‌ر ئه‌و تاوانه‌دا تێده‌په‌ڕێت كه‌ گروپێكی خوێنڕێژی نامۆ به‌ هه‌موو بیروباوه‌ڕ و به‌هایه‌كی مرۆڤایه‌تی، ده‌رهه‌ق به‌ ئێزدی-یه‌كان كردیان، ئه‌و ئێزدییانه‌ی كه‌ پێكهاته‌یه‌كی ره‌سه‌نی نه‌ته‌وه‌ی كوردن و له‌به‌رده‌م جه‌ور و سته‌می رۆژگاره‌ زۆر سه‌خته‌كاندا، نه‌ك هه‌ر خۆڕاگر بوون، به‌ڵكو سه‌رسه‌ختانه‌ به‌رگرییان له‌ مانه‌وه‌ و ناسنامه‌ی ره‌سه‌نی خۆیان كردووه‌.

به‌داخه‌وه‌ له‌و په‌لاماره‌ وه‌حشیگه‌رییه‌دا و به‌به‌رچاوی جیهانی دیموكراسی و مرۆڤایه‌تییه‌وه‌، گروپێكی هه‌ڵتۆقیو له‌ژێر ناوی پیرۆزی ئیسلامدا كوشتوبڕێكیان به‌سه‌ر خه‌ڵكی ره‌شوڕووتی ئێزدیدا هێنا كه‌ مه‌گه‌ر هه‌ر له‌سه‌ده‌ ره‌ش و سه‌رده‌مه‌ تاریكه‌كانی مێژوودا له‌ وێنه‌ی هه‌بووبێت.

له‌و تاوانه‌ زۆر قێزه‌ونه‌دا كه‌ تاهه‌تایه‌ مرۆڤ و مرۆڤایه‌تی نه‌فره‌تی لێده‌كات، قه‌تڵوعامی ژن و منداڵ و پیاو و پیروپه‌ككه‌وته‌كان كرا، ئه‌وه‌ی نه‌كوژرا وه‌ك دیلی جه‌نگ، پیاوه‌كانیان سه‌ربڕران و كیژۆڵه‌ و ژنه‌كانیش كران به‌ سه‌بایا و له‌ بازاڕه‌كاندا هه‌رزانفرۆشكران و ده‌ستاوده‌ستیان پێكرا، ئه‌وه‌یش كه‌ رزگاری بوو (به‌پێی په‌تی و به‌ سه‌ری رووتی) ئاواره‌ و ده‌ربه‌ده‌ری باشووری كوردستان و په‌رتوبڵاوی وڵاتانی دنیا بوون. ئێستایش چاره‌نووسی هه‌زاران مرۆڤی ئێزدی نادیاره‌، كه‌س نازانێت كوژراون یان دیل یاخود سه‌رگه‌ردانی وڵاتانن.

له‌م رۆژه‌دا هه‌ر ئه‌وه‌نده‌مان بۆ ده‌كرێت، رێز له‌ قوربانیانی ئه‌و كاره‌ساته‌ جه‌رگبڕه‌ بنێین. داوا له‌ هه‌موو لایه‌كی ناوخۆیی و ده‌ره‌كی و نێوده‌وڵه‌تی بكه‌ین هاوكاربن بۆ كه‌مكردنه‌وه‌ی ئازاری به‌ سوێی ئه‌و برینه‌ی كه‌ له‌قووڵایی ویژدانی مرۆڤایه‌تیدایه‌. نه‌فره‌ت له‌ تیرۆر بكه‌ین و هه‌موو هه‌وڵێكمان بۆ ئاستی و پێكه‌وه‌ژیان و رێزگرتن بێت له‌ بیروباوه‌ڕی جیاواز.

گه‌لاوێژ

PUKmedia

3/8/2019 21:08:00