مەلا بەختیار: یەكێتی و پارتی خۆیان نەگۆڕن بەدیلی خراپتر دروستدەبێت

مەلا بەختیار رایگەیاند: تا دوو هەڵبژاردنی تر یەكێتی ‌و پارتی‌و لایەنەكان خۆیان نەگۆڕن، بەتایبەتی یەكێتی، گەورەترین زەرەر دەكەن‌و ئەلتەرناتیڤی خراپتر دروستدەبێت.

حزبایەتی لەسەردەمی جیهانگیریدا، ناونیشانی ئەو كۆڕە بوو كە ئێوارەی دوێنێ 17ی تەموزی 2019، بەڕێوەبەرێتی رۆشنبیریی‌و هونەریی دەربەندیخان، بۆ مەلا بەختیار، سیاسەتمەدارو رۆشنگەری بەڕێوەبرد.

بە پێناسەكردنی چەمكی جیهانگیریی، چۆنێتی سەرهەڵدانی، رەهەندو كاریگەرییەكانی جیهانگیری لەسەر مرۆڤ، كۆمەڵ، نەتەوە، سیستەم، بازاڕ، دەسەڵات، پەیوەندییە چینایەتی‌و كۆمەڵایەتییەكان، سیاسەت‌و ئایدۆلۆجیا، فەلسەفەو رێكخراو، مەلا بەختیار كۆڕەكەی دەستپێكردو  ئاماژەی بۆ ئەوەكرد، ئەم چەمكانە سەبارەت بەئەدەبیاتی ئێمە تازەن‌و وتی: پاشكۆیەتی بۆ رابردوو، بەر بەستەكانی كۆنەپارێزی نابێ‌ رێگەمان لێبگرێت ئەو بۆچونانەی پێویستن بۆ سەردەم، ئەركەكانی سەدەم‌و ململانێكان نەخەینەڕوو، لەترسی ئەوەی نەكا بۆچوونە باوەكان‌و خۆپارێزو كۆنەپەرستەكان قبوڵی نەكەن.

بۆیە قسەكردن یاخود ئازادی لەقۆناغە سەختەكانی وەكو ئەم قۆناغی بونیادنانەی دیموكراسی لەوڵاتی ئێمەدا، ئازایەتی دەوێت‌و رایگەیاند:ئازادی ‌و دیموكراسی لەوڵاتی ئێمەدا، خۆشاردنەوەی ناوێ‌ لەپشتی دێو جامەی كۆنەپارێزیی، یان نەوێران بۆ ئەوەەی پێویستە دەرببڕدرێت.

وتیشی: بەداخەوە تا ئێستا وەكو پێویست، نە دەسەڵات، نە سیستەمی ئێمە لەناو پرۆسەی جیهانگیریی ‌و گۆڕانكارییەكانی جیهانگیریدا نییەو لەوەش خراپتر، حزبە سیاسییەكانمان وەكو پێویستە لەچەمك ‌و بنەماكانی جیهانگیریی، ورد نەبوونەتەوەو قوڵنەبونەتەوە‌و سیاسەت، ئایدلۆجژیان‌و ژیانی حزبایەتی خۆشیان بەپێی ئەركەكانی جیهانگیریی رێكنەخستووە!

مەلا بەختیار، لەدرێژەی شرۆڤەكردنەكانیشدا بۆ جیهانگیری، ئاماژەی بۆ ئەوە كرد، كە: تێنەگەیشتن لەجیهانگیریی بۆ كەسێك- تاكێك ئاسانە‌و زیانەكەی كەمە، بەڵام تێنەگەیشتن لەجیهانگیری لەلایەن حزبی گەورەو دەسەڵاتەوە، لەلایەن سەندیكاو رێكخراوە گەورەكانەوە، مەترسیدارە‌و وتی: كاتێك سیستەمەكان هەموویان چوونەتە ناو جیهانگیرییەوە ناكرێ‌ حزبەكەت، حزبێكی كلاسیكی، چەمكی كلاسیكی، تێگەیشتنێكی كلاسیكی بۆ ئێستا هەبێت. واتە: لەڕوانگەی رابردووەوە سەیری ئێستا كردن، هەڵەیەكی گەورەیەو لەئێستاشەوە تەنها سەیركردنی رابردوو، هەڵەیەكی گەورەترە. 

پاشئەوەشی ئاماژەی بەچۆنێتی داڕشتنی چەمكی (جیهانگیری) كردو ئەو زاراوەو وشە كوردییانەی كە سودی لێ بینیوە بۆ داڕشتنی ئەم چەمكە، رونیكردەوە، كە جیهانگیری هەموو سنورەكان دەبەزێنێت‌و ستراتیجێكی هەمە رەهەندییەو هەموو بوارەكانی ژیان دەگرێتەوە، لەبنچینەدا ئابوری دەگرێتەوەو لەئیدارەدا فەلسەفەی سیاسی‌و لەكەلتوریشدا، گۆڕینی كەلتوری كۆن دەگرێتەوەو لەكۆمەڵایەتیشد، هەڵتەكاندنی هەموو بنەما كۆمەڵایەتیەكانی رابردوو دەگرێتەوەو لەئازادیەكانیشدا، تاك ئازاد دەكات، لەهەموو هەژمون‌و كاریگەرییەكانی رابردوو، واتە تاكی رابردوو دەهێنێتە ئەم سەردەمەو لەم سەردەمەشدا، خەونی تاك دەبێت بەخەونی ئاییندەیەكی باشتر.  

لەبارەی دەسەڵاتی هەرێمی كوردستان و جیهانگیریەوە، رایگەیاند: حكومڕانی و دەسەڵاتی سیاسی لەهەرێمی كوردستان لەجیهانگیری تێنەگەیشتون، لەوانیش خراپتر حزبەكان سیاسەت و ستراتیژیان لەسەر بنەمای گۆڕانكاریەكانی جیهانیگری دانەڕشتوە. بۆیە تێنەگەیشتن لەجیهانگیری لەلایەن حزب و رێكخراوەكانەوە زۆر مەترسیدارە.

بەشی دووەمی كۆڕەكەی مەلا بەختیار تایبەت بوو بەحزبایەتی و حزبایەتیش لەسەردەمی جیهانگیریدا، لەوبارەیەوە ئاماژەی بەوەكرد: كە ئێستا لەئەوروپا گۆڕانكاری بەسەر شێوازی حزبایەتی و خەباتی سەندیكایی و رێكخراوەكاندا هاتوەو ئەوان بەتەواوی خۆیان لەگەڵ جیهانگیریدا گونجاندوە، بەڵام بەداخەوە لەعیراق و كوردستاندا هێشتا بەشێوازی كۆن و كلاسیكی حزبایەتی دەكەین. 

مەلا بەختیار، زیاتر وتی: حزبایەتی لەعیراقدا لەئەشكەوتی پەنجاكاندایە، ئێمە كەمێك باشترین، بۆیە حزبەكانی هەرێمی كوردستان، ئەوپەڕەكەی دوو خولی تری هەڵبژاردنیان لەبەردەمدایە، بۆئەوەی گۆڕانكاری لەخۆیاندا بكەن و لەگەڵ سەردەمەكەدا خۆیان بگونجێنن، ئەگەرنا ئەم بازنە داخراوەی حزبایەتی كۆتای دێت، ئەوە كۆتایی دێت كە كوڕ و خزمەكانیان كۆنتڕۆڵی ئەم دەڤەر و ئەملاوئەولا بكەن. وتیشی "ئەم قسەیەم بۆ تۆمار بكەن، ئەمڕۆ 17/7/2019یە، ئەگەر تا دوو خولی هەڵبژاردنی تر یەكێتی و پارتی خۆیان نەگۆڕن بەتایبەتی یەكێتی، بەدیلی خراپترو فەوزایەكی گەورە لەهەرێمی كوردستاندا دروستدەبێت. ئەگەر خۆمان نەگۆڕین، بەرەو گەندەڵی زیاتر هەنگاو دەنێنین پاكەكانیش پیس دەبن و ئەوكات كێشەی گەورە لەكوردستاندا دروستدەبێت".

وتیشی "ئێستا خواستی خەڵك گۆڕانكاری بەسەردا هاتوە، خەمی ئەوەیەتی كە ئایا تۆ گەندەڵی لەناودەبەیت یان نا؟ یاسا سەروەر دەكەیت یان نا؟ سیستمی پەروەردە دەگۆڕی و ئازادی ژن دەستەبەر دەكەیت؟ چاودێری بازاڕ دەكەیت و قۆرخكاری ناهێڵیت و مافی بەركارەكان دەپارێزیت؟ ئەمانە خەمی نوێن، بۆیە گەندەڵی هاندەری سەرەكی ناڕەزایەتی خەڵكە و دەبێت روبەڕووی ببینەوە".

لەكۆتایی كۆڕەكەشدا، مەلا بەختیار جارێكی دیكە جەختی لە گۆڕانكاری ژیانی حزبایەتی لەكوردستان كردەوەو بەتایبەتی یەكێتی و هیوای خواست كۆنگرەی ئایندەی یەكێتی بەزووی وەكو كۆنگرەی گۆڕانكاری ئەنجام بدرێت سەرەپا گۆڕانكاری لەحزبەكەدا بێنێتەدی.

لەدرێژەی بابەتەكەیدا، مەلا بەختیار، رونیشیكردەوە، لەو رۆژەی سەرمایەداری، لەسەدەی رابردوو، لەسەرمایەدارییەكی كۆنەوە، لەپەیوەندی بەرهەمهێنان‌و هێزی كارەوە كە گواستییەوە بۆ ئەوەی ببێت بەسەرمایەدارییەك كە بگوازێتەوە بۆ جیهان، لەسەر دوو بنچینە دروستبوو. بنچیەكیان ئەوەیە دەستی كار بە هەزران بەكار بهێنێت‌و بنچینەی دووەمیش ئەوەیە، كە كەرەستەی خاو بە هەرزان بكڕێت. لەكوێش ئەمەی دەستبكەوتایە، بەئاسانی، یان بە لەشكر، بە كوشتار یان بەداگیركردن، ماڵوێرانكردن هەتا دەگاتە بەكارهێنانی چەكی كمیایی، بەكاردەهێنا. هەم بۆ ئەوەی دەستی هەرزان بخاتە كار، هەم بۆ ئەوەی كەرەستەی هەزران بكڕێت، بۆ ئەوەی كۆمپانیا گەورەكانی ئەوكاتە بخاتە گەڕو ئیتر لەوساوە، بناغەكانی جیهانگیری وەكو سەرمایەداری سەریهەڵدا.

پاشئەوەشی لەبەشێكی تری بابەتەكەیدا، سەرهەڵدانی سیستەمی نوێی جیهان رونكردەوە‌و تێڕوانینی بیرمەندان‌و بیروڕا فەلسەفییەكان‌و ئەو مللانێیانەشی خستەڕوو، كە دەیانویست چوارچێوەیەك بۆ سەردەمی دوای جەنگی دووەمی جیهانی تیۆریزە بكەن‌و وتی: ئەو دیاردانەی لەدوای جەنگی  سارد سەریانهەڵدەداو ویسترا لەسیستەمی نوێدا قەتیس بهێڵدرێتەوە، بەپێچەوانە زۆر فراوانتر بوون لەسیستەمی نوێی جیهان، بۆیە گۆڕیان بۆ ئەم چەمكە تازەیە، كە جیهانگیرییە‌و وتیشی:

لەرابردوودا، ژیانی ئابوری لەسەر بەرهەمهێنانی پیشەسازی دەچوو بەڕێوە، بەرهەمهێنانی پیشەسازی هەموو ژیانی بەڕێوەدەبرد، بەڵام لەجیهانگیریدا بابەتێكی نوێ‌ هاتۆتە پێشەوە و هێندەی نەماوە ببێت بەئەلتەرناتیڤ، ئەویش بەرهەمهێنانی مەعریفەیە. واتە بەرهەمێهانی مەعریفی‌و قازانجە مادییەكانی، بەرهەمێهانی مەعریفی‌و كاریگەرییەكانی، پەلوپۆكانی‌و هەژمونەكانی زۆر زیاترە لەبەرهەمهێنانی پیشەسازی، كە دنیا دەخاتە ژێر قازانج‌و كاریگەربی‌و بازاڕی خۆیی‌و هەموو مرۆڤایەتیش ناچار دەكات، بچێتە ناو تۆڕی بەرهەمهێنانی مەعریفەوە‌و نموونە زیندووەكانیشی بەداتا خستەڕوو، كاریگەرییەكانیشی لێكدایەوە‌و لەو دیدەشەوە رایگەیاند: رووداوەكان لەسەر من‌و تۆ ناوەستێ‌، گۆڕینی پەیوەندی كۆمەڵایەتی لەسەر هیچ حزبێك‌و دەسەڵاتێك ناوەستێ‌، تێگەیشتنەكان‌و هزرەكان، فەلسەفەكان، گۆڕینی كەلتورەكان، لەسەر هیچ دەستور‌و ئایدۆلۆجییەتێك، لەسەر مەقاماتی باڵای  هیچ حزب‌و دەوڵەتێك ناوەستێ‌‌و هەمووی لەگۆڕاندایە. 

پرسیارەكان‌و وردەكارییەكانی ژیان، كە دەبێ‌ تاكی ئەم سەردەمە تێی بگات، بەشێكی تری بابەتی كۆڕەكەی بوو، كە تیایدا مەلا بەختیار، جەختیكردەوە: هیچ كەسێكمان وەك تاك، تاكی جاران نین و نابێ‌ خۆمان بخەڵەتێنین! هەموو ئەوانەشی پێیانوایە ئێستاش بەهەموو هێزی خۆیان دەتوانن دابونەریتی رابردوو بپارێزن، دڵنیایان دەكەم لەخۆ هەڵخەڵەتاندن شتێكی تر نییە! چونكە بەشێك لەئەقڵ، لەپەیوەندییەكان، لەبەرژەوەندییەكانی تاك كەوتۆتە ژێر كاریگەری شۆڕشی پەیوەندییەكان‌و زانیارییەكا‌و تەكنیكی سەردەم‌و وتیشی: ئومێدەوارم پرسیارێك لەلای هەمووان دروست بێ كە نە نەتەوەكەمان وەكو رابردوو بیردەكاتەوە، نە دەسەڵاتەكەمان دەتوانێ‌ وەكو رابروو بێت، نە حزبەكانمان، نە چینەكانمان، نە سرودی نیشتمانەكەمان، نە بازاڕو دووكان‌و قەیسەرییەكانمان، نە مۆڵەەكانیش ناتوانن وەكو رابردوو بن. چونكە نەتەوەكەمان، كۆمەڵەكەمان، چین‌و فكرو فەلسەفەشمان لەكارلێكداین لەگەڵ ئەو گۆڕانكارییانەی كە هەیە. بەڵام ئایا جێگای خۆمان لەناو ئەم گۆڕانكارییانەدا كردۆتەوە؟ نەخێر. ئایا دەبێت لەئاییندە جێگەیخۆمان بكەینەوە یان نا؟ بەڵێ‌ دەبێ‌ جێگەی خۆمان بكەینەوە‌و بەدڵنیایشەوە دەوڵەت نامێنی لەسەر زەوی، نەتەوە نامێنێ‌، چینێك نامێنێ‌، تاكێكیش نامێنێ‌ لەسەر زەوی، لەدەسەڵی ئاییندە نەچێت ناو ئەو چوارچێوەیەوە‌و تەئكیدیشی كردەوە: یەك فەلسەفەی كۆن، یەك بڕوای  كۆن، یەك ئایدلۆجییەتی كۆن، یەك حزب‌و رێكخراو سەندیكای كۆن، یەك گروپی كۆن نامێنێ‌ لەسەر بنەمای بەرنامەی رابردوو بیەوێ‌ ئێستاش ململانێ‌‌و خەبات‌و خزمەت بكات،  چونكە ناتوانێ‌ خزمەت بكات‌و گۆڕانكاری بكات‌و كاریگەری هەبێ‌، ئەگەر خۆی لەگەڵ گۆڕانكارییەكانی ئەم سەردەمە نەگونجێنێ‌‌و نەچێتە ناو شۆڕشی زانیارییەكان‌و پەیوەندیەكانی ئەم سەردەمەوە.

لەبەشی دووەمی بابەتی كۆڕەكەشیدا سەبارەت بە حزبایەتی، مەلا بەختیار بە ئاماژەكردن بۆ ئەوەی: هەموو ئەوانەیباوەڕیانوایە حزبایەتی پێش شۆڕشی پیشەسازی هەیە، ئەوا ئەوانە لەدنیا تێنەگەیشتوون‌و بەجێماون!‌و وتی: مەدەنییەت لەدوای شۆڕشی پیشەسازی لەدایكبووەو سەندیكا‌و رێكخراوەكانیش دیسانەوە، لەدوای سەرمایەدار سەریانهەڵداوەو حزبایەتیش باڵاترین ئایدلۆجییەتی رێكخستنی خەباتی كۆمەڵایەتی‌و سیاسی‌و نەتەوەیە، ئەمەش لەناوەڕاستی سەدەی نۆزدەهەمەوە تا ئێستا.

وتیشی: هەموو ئەو وڵاتانەی حزبایەتی تێدا نییە، لەمێژوودا دەوڵەتە مردوەكانن هەتا ئێستا‌و نمونەی لیبیای هێنایەوە‌و سەرەنجامەكەی بۆ ئازادی حزبایەتی گێڕایەوە‌و هاوكات جیاوازی حزبایەتی لەدوای یەكەم‌و دووەم جەنگی جیهانی شرۆڤە كردو لەدو دیدەشەوە وتی: لەدوای شۆرششی ئۆكتۆبەرەوە هەتا دەگاتە ناوەڕاستی جەنگی ساردیش، خەباتی چینایەتی، ئایدۆلۆجی‌و فەلسەفی، زۆر توند بووەو دوو مەعسكەر‌و دوو هاوپەیمانێتی  هەبووە، ئەوانیش هاوپەیمانێتی وارشۆ و ئەتڵەسی‌و لەو ململانێیەشدا سەرەنجام هەموو ئەو دەوڵەتانەشی پڕوپاگەندەی سۆشیالیسیتیان دەكرد تێكوپێك شكان. بۆ؟ ئەگەرچی لەهەموو دەوڵەتانی سۆشیالیستی برسییەكی تێدا نەبوو، بەڵام لەبەرئەوەی ئازادی تێدا نەبوو تێكشكان. ئەمەش خاڵێكی ئێجگار گرنگە. دووەم خاڵیش ئەوەیە، لەژیانی ئابوریی‌و كۆمەڵایەتیشدا، چینێك نەبوو بەناوی چینی بۆرجوای نیشتمانی، یان سەرمایەداری نیشتمانی. بۆیە ئەگەر سەرمایەداری نیشتمانی لەوڵاتێكدا نەبێ‌، واتە مامانی وەرچەرخانە گەورەكان لەو وڵاتەدا نەماوەو ئیتر هیچ لەدایك نابێت. چونكە هەرچی وەرگۆڕانە گەورەكانی مێژووە، بۆرجوای نیشتمانی دروستیكردووە. بەپێچەوانەشەوە هەموو ئەو هەوڵانەی كرێكاران لەسەدو پەنجا ساڵی رابردوودا داویانە، بۆ ئەوەی ئەلتەرناتیڤی دیموكراسی یان بۆرجوزای‌و سەرمایەداری بهێننە پێشەوە، بەحزب، بەئایدلۆجییەت‌و سەندیكاشەوە، هەموو ئەوانە شكستیخوارد. لەبەرئەوەی پرۆسەی بونیادنانی دیموكراسی، پرۆسەی ئازادییەكان، مەدەنییەكان، مافی ژن لەدنیادا تەنها لەناو پرۆسەی دیموكراسیدا بەدیدێت.‌و بەپێچەوانەوە هەموو رێگاكانی تر نەزۆكن. هەربۆیە مەعەسكەری وەكو ئۆرۆپای رۆژهەژهەڵات دەڕوخێت، هەربۆیە كۆریا داتەپی، كاسترۆ ئاوابوو، فكری گیڤارا نەما، ماوتسی تۆنگ لەمێژوودا كۆتایهات! لەبەرئەوەی لەدەرەوەی پرۆسە مێژووییەكە، پرۆسەیەكی دەستكرد دروستبوو، یان تیۆرییەكی دابڕاو لەراستییە كۆمەلایەت‌وی چینایەتییەكان دروستبوو. هەموو پرۆسە دابڕاو ‌و تیۆریی‌و ئایدۆلۆجی‌و پەتییەكان شكستیانخوارد، بەپێچەوانەوە هەموو ئەوانە مانەوە كە لەناو كۆمەڵدا خۆیان دەڕسكێن‌و دورست دەبن‌و گۆڕانكاریش دروستدەكەن.

لەدرێژەی تەوەری دووەمیشدا، جەختیكردەوە: گۆڕانكاری گەورە بەسەر سیستەمی حزبایەتی، سەندیكایی، رێكخراوەیی لەجیهاندا هاتووەو خۆیان لەگەڵ گۆڕانكارییەكانی جیهاندا گونجاندووە‌و وتیشی: كە پەیوەندی كۆمەڵایەتی دەگۆڕێ‌، بیكردنەوەی خەڵكیش دەگۆڕێ‌، كە ژێرخانی ئابوری دەگۆڕێ‌، بیكردنەوەی خەڵكیش دەگۆڕێ‌.

مەلا بەختیار، هەر لەبارەی حزبایەتییەوە و لەعیراق ئاماژەی بۆ ئەوەكرد، كە حزبایەتی لەعیراق لە ئەشكەوت پەنجاكاندایەو ئەگەرچی لەكوردستاندا باشترین‌و گۆڕانكاریمان بەسەردا هاتووە، بەڵام هێشتا ئەوەش كەمە لەپێویست ئەم سەردەمە. بۆیە ئەم حزبانەی كوردستان، ئەو پەڕی دوو خولی تری هەڵبژاردنیان لەبەردەمدایە هەتا بەمجۆرە سیاسەت بكەن! بەو جۆرە كوڕو كەسوكاریان بەئاشكراو بەنهێنی، بەهەڕەشەو گوڕەشە كۆنتڕۆڵی ئەم كۆمپانیاو ئەو كۆمپانیا‌و ئەم دەڤەرو ئەو دەڤەر بكەن! بۆیە تەنها ئەوپەڕی دوو خولی تر  ئەم بازنە داخراوەی بیركردنەوەی سیاسی، ئابوری، ئایدۆلۆجی، كۆمەڵایەتی ئەم حزبانە بچێتە سەر. بۆیە دەڵێم تا دوو هەڵبژاردنی تر، یەكێتی‌و پارتی‌و لایەنەكان خۆیان نەگۆڕن، بەتایبەتی یەكێتی، گەورەترین زەرەر دەكەن‌و ئەلتەرناتیڤی خراپتر دروستدەبێت‌و فەوزایەكی گەورە لەكوردستاندا دروستدەبێت. چونكە ئەلتەرناتیڤ كە بە پەلەپەل دروستدەبێت، بەبێئەوەی رەسەنایەتییەكەی لەناو ململانێ‌ كۆمەڵایەتییەكان هەبێ‌‌و بەبیئەوەی لەناو بۆتەی خوڵقاوی ئایدۆلۆجی، فەلسەفی، سیاسی قاڵوقوڵ ببوبێ‌‌و لەناو پرۆسەكەدا لەدایك نەبێ‌‌و بەڵكە بەهۆی قەیران یان ناڕەزایەتییەكەوە دروستدەبێت، ئەوا هەم ئەلتەرناتیڤە رەسەنەكە لەناو دەبات‌و هەم خۆیشی ناتوانێ‌ سەركەوتن بەدەستبهێنێت. چونكە پرۆسەی ئەلتەرناتیڤ، پرۆسەیەكی مێژوییە، نە لەپڕ و نە بە بڕیار‌و نە بەكاریزمای هیچ كەسێكیش دروست نابێ‌‌و ئێمەش كە هەین، هەموومان لەناو هەلومەرجی گۆڕاودا بووین بەوەی كە هەین، بۆیە با كەسمان لەخۆمان بایی نەبین. ئەگەرچی بەداخەوە هەندێك لەخۆیان بایی بوون، لەكاتێكدا هەموومان بەهۆی پێشمەرگە قارەمانەكان‌و شەهیدو ئەنفال‌و كیمیاباران‌و بەدبەختییەكانەوە، ئێمە بووین بەئێمە! ئەگەرنا ئێمە، ئێمەنین! 

بەڵام بەداخەوە، بەشێك لەهەموو حزبەكان، لەهەموو دەسەڵاتەكان، مێشكیان بەتاڵبووە‌و بیركردنەوەیان بەتاڵبووە لەئاكاری سیاسی‌و وابەستەیی سیاسی‌و لەو بەڵێنانەی كە بەمیللەتەمانیانداوە. بۆیە ئەگەر خۆمان نەگۆڕین، ئەوا لەلایەكەوە ئەم حزبانە بەرەو گەندەڵتر دەڕۆین، كە هەین. پاكەكانیش نامێنن‌و لەلایەكی تریشەوە فەوزایەك گەورە رەنگە چاوەڕوانمان بكات‌و دوور نییە قازانجمان، سەری مایەشمان بخوات..!

وتیشی: بۆیە ئومێدەوارم، نەك هەر حزبەكان، بەڵكو هەموو رووناكبیرەكان، رەخنەگرەكان، هەموو ئەوانەی لەناو خەباتی مەدەنیدا خەبات دەكەن، لەباتی ئەوەی چەمكە كلاسیكییەكان دووبارە بكەینەوە، وردتر بچینە ناو چەمكە نوێیەكان‌و لەو چەمكانەشەوە بیر لەڕەخنەگرتن بكەینەوەو فشار ببەین بۆ ئەوەی گۆڕانكاری لەهەموو ئاست‌و ئاراستەكان رووبدات‌و حزبایەتی، رێكخراوەكان، سەندیكاكان بخەینەوە شوێنی خۆی‌و راشیگەیاند: كارەساتە حزبێك تێنەگات، نە چینەكان، نە نەتەوە، نە كۆمەڵە‌و نە تاكەكانیشی وەكو خۆیان ماون! لەبەرئەوەی كاریگەرییەكانی دەرەوەی حزب زۆر فراوانترن لەكاریگەرییەكانی ناو حزب. ئەمەش یەكێكە لەو هۆكارانەی خەڵك لێمان تەكیوەتەوە‌و بیركردنەوەی خەڵكیش گۆڕانی بەسەردا هاتووە. خاڵێكی تریش ئەوەیە، ئەم حكومەتەو حزبەكان‌و رەفتاری هەندێك لەلێپرسراوەكان، بەگوێرەی دڵی خەڵك نییە‌و بەگوێرە پەیامەكان نییە كە بەخەڵك دراون‌و بگرە زۆر بەپێچەوانەشەوەیە.

 ئومێدیشی خواست هەمووان لەناو ئەو پرۆسەی گۆڕانكارییانەدا ئەركی نەتەوەیی، دیموكراسی، مەدەنی، دادپەروەیمان هەیە‌و خەبات‌و خەمی سەرەكیش بۆ میللەتەكەمان بووە بەوەی گەندەڵی لەناو دەبەیت یان نا؟ مشەخۆری لەناو دەبەیت یان نا؟ سیستەم و فلەسەفەی پەروەردە دەگۆڕێ‌ یان نا؟ لەدنیاو بازاڕ تێدەگەین یان نا؟ چاودێری بازاڕ دەكرێت‌و مشەخۆری كەم دەكرێت یان نا؟ بۆیە تەنانەت شوێن‌و ئامانج‌و دروشمەكانیش گۆڕاوە‌و

رایگەیاند: ئومێدەوارم سەردەمەكە لەهەموو بوارێكەوە وەكو یەك بخوێنینەوەو حزبایەتی لەهەموو بارێكەوە بگوازینەوە بۆ ئەم سەردەمەو كۆنگرەی ئاییندەی یەكێتی‌و حزبەكانی تریش، خوێندنەوەیان هەبێت‌و كۆنگرەی یەكێتیش كۆنگرەی گۆڕانكارییەكان بێت بەهەموو چەمكەكانی، تێگەیشتنەكانی‌و سەراپا گۆڕانكاری بێت‌و بۆخۆشم هەڵگری دروشمی كۆنگرەی گۆڕانكاریم. كە دەشڵێم گۆڕانكاری مەبەستم ئەوەنییە كام مەسئول دەگۆڕێت یان نا! بەڵكو مەبەستم ئەوەیە حزبەكەم بگۆڕم. چونكە حزبەكەم نەگۆڕم مەترسیدارەو رەنجم بە بادا دەڕوات! مێژووم دەڕوات، لەبەرئەوەی حزبی گەورە گەورە هەبووە لەمێژووداو كۆتایی پێهاتووە. بۆیە سەردەمەكە جیهانگیرییە ئومێدمە حزبەكەشمان حزبی جیهانگیری بێت، رێكخراو سەندیكاو تاكەكانیش لەسەردەمی جیهانگیریدا سیاسەت بكەین.

PUKmedia راگەیاندنی لێپرسراوی دەستەی كارگێڕی 

18/7/2019 09:58:00