دوو كەشتی گەورەی نەوت لەكەنداو كرانە ئامانج

لەكەنداوی عومان دوو گوێزەرەوەی زەبەلاحی نەوتی خاو كرانە ئامانج و بەهۆیەوە نرخی نەوتی خاو لەبازاڕە جیهانییەكان بەرزبوویەوە. 

لەبارەی رووداوەكەشەوە، میدیای ئێران هەواڵەكەیان لەئاژانسی هەواڵی (یو نیوز) بڵاوكردوەتەوە كە رایگەیاندوە: بەیانی ئەمڕۆ 13ی حوەزیرانی 2019، دوو تەقینەوەی بەهێزی یەك لەدوای یەك لەدەریای عومان بیستراوە كە دوو گوێزەرەوەی زەبەلاحی نەوتی خاوی كردوەتە ئامانج.

ئاژانسەكە ئاماژەی بەوەشداوە دوو  گوێزەرەوە نەوتییەكە داوای بەهاناوەچوونیان كردوە لە دەریاوانە پاكستانی و عومانیەكان.

هاوكات كۆمەڵەی ئاسایشی دەریایی بەریتانیا هۆشداریداوە لەروودانی رووداوێكی دیارینەكراوە لە كەنداوی عومان.

دوای تەقینەوەكانیش، نرخی نەوتی خاو لەبازاڕەكانی جیهان بەشێوەیەكی بەرچاو بەرزبوەتەوەو نرخی بەرمیلێك نەوتی خاوی برێنت 4% و نەوتی خاوی ئەمریكاش  3% بەرزبوونەتەوە.

PUKmedia ئاژانسەكان 

13/6/2019 10:03:00