PUKmedia نوسینگهی مهکتهبی راگهیاندن- تاران 13:18:10 2010-07-27
پێنجهمین فێستیڤاڵی نێودهوڵهتی شانۆی سهرشهقام له رۆژانی کۆتایی مانگی 9/2010 له شاری مهریوان بهڕێوهدهچێت.
"فاتيح بادپهروا" بهرپرسی ئهنجومهنی شانۆی مهریوان له وتووێژێکی تایبهت لهگهڵ پهیامنێری نوسینگهی مهکتهبی راگهیاندن له تاران وێڕای راگهیاندنی ئهم ههواڵه وتی: ئهم فێستیڤاڵه بۆ پێنجهمینجار له شاری مهریوان بهڕێوهدهچێت و تیایدا چهندین گروپی شانۆیی ههڵبژێردراو له شارهکانی ئێرانهوه بهشداردهبن، فێستیڤاڵی ئهمساڵ له سێ بهشدا بهڕێوهدهچێت که بریتین له بهشی کێبڕکێ، بهشی فێرکاری و بهشی نێودهوڵهتی.
ههروهها وتی: له بهشی کێبڕکێدا چهندین گروپی شانۆیی له ناوچه جیاوازهکانی ئێرانهوه داوای بهشدارییان کردووه، که لهچاو ساڵانی پێشوودا ژمارهیان زۆر زیاتره و تاکو 20 رۆژی داهاتوو ناوی ئهو گروپانه که ئیزنی بهشداری له فێستیڤاڵیان پێدهدرێت رادهگهیهنرێت، بۆ بهشی نێودهوڵهتیش لانی کهم 3 تا 5 گروپی شانۆیی له وڵاتانی بیانییهوه بهشداردهبن.
بادپهروا راشیگهیاند، که ئهم فێستیڤاڵه له ساڵانی پێشوودا به ماوهی 4 رۆژ بهڕێوهدهچوو، بهڵام ئهمساڵ رۆژانی بهڕێوهچوونی فێستیڤاڵ درێژ دهکرێتهوه بۆ 5 یان 10 رۆژ.
بڕیاریشه ئهم گروپه شانۆییانهی که لهم فێستیڤاڵهدا ههڵدهبژێردرێن جگه له خهڵاتکردن، بنێردرێنه بهشی کێبڕکێی فێستیڤاڵی نێودهوڵهتی فهجر که ساڵانه له تارانی پایتهختی کۆماری ئیسلامی ئێران بهڕێوهدهچێت.
گهورهکردنی فۆنت
