2010-07-25     16:30:00   PUKmedia
ئه‌مڕۆ 25/7 مام جه‌لال سه‌رۆك كۆماری عیراق چاوی كه‌وت به‌ سه‌ید عه‌لی ئاغا محه‌مه‌دی یاریده‌ده‌ری ئابوری جێگری یه‌كه‌می سه‌رۆك كۆماری ئیسلامی ئێران و وه‌فدی یاوه‌ری.
له‌دیدارێكدا سه‌رۆك تاڵه‌بانی پێداگری عیراقی له‌سه‌ر فراوانكردن و په‌ره‌پێدانی په‌یوه‌ندییه‌ دووقۆڵییه‌كان له‌گه‌ڵ ئێرانی دراوسێ له‌بواره‌كانی سیاسی، ئابوری، كلتوری دووپاتكرده‌وه‌، ئاماژه‌شی دا به‌پێویستی فراوانكردنی قه‌باره‌ی ئاڵوگۆڕی بازرگانی له‌نێوان هه‌ردوو وڵاتدا.
سه‌رۆك تاڵه‌بانی پێزانینی عیراقی بۆ حكومه‌ت و گه‌لی ئێران ده‌ربڕی له‌تێكۆشانی دژی دیكتاتۆریه‌ت و سوپاسی پشتگیرییه‌كه‌شی كردن بۆ عیراق له‌میانه‌ی گواستنه‌وه‌ی وڵاتدا بۆ قۆناغی تازه‌.
له‌لایه‌ن خۆیانه‌وه‌ ئه‌ندامانی وه‌فده‌كه‌ ویستی كۆماری ئیسلامی ئێرانیان بۆ پته‌وكردنی دۆستایه‌تی و هاوكاری له‌گه‌ڵ كۆماری عیراق به‌تایبه‌ت له‌بواری ئابوری دووپاتكرده‌وه‌.
محه‌مه‌دی ئاماژه‌ی به‌وه‌شدا كه‌ چانسی زۆر له‌ئارادایه‌ بۆ وه‌به‌رهێنان له‌عیراق له‌چه‌ند بواردا وه‌ك گواستنه‌وه‌و كاره‌با كه‌ ئه‌مانه‌ش جێی بایه‌خی كۆمپانیا ئێرانییه‌كانن.