یەكێتی هەڵوێستی خۆی لەسەر كۆبوونەوەكەی بارزانی راگەیاند

.

یەكێتی رایدەگەیەنێت بەوەفدێك بەشداری كۆبوونەوەی بارزانی لەگەڵ لایەنە سیاسیەكان دەكات.

سەعدی ئەحمەد پیرە ئەندامی مەكتەبی سیاسی یەكێتیی نیشتمانیی كوردستان بە PUKmediaی راگەیاند: یەكێتی بەوەفدێك بەشداری كۆبوونەوەی لایەنەكان لەگەڵ بارزانی دەكات.

وتیشی: هەر كۆبوونەوەو گفتوگۆیەك بۆ باشتركردنی بارودۆخی سیاسی و ئابوری كوردستان بێت، یەكێتی لەبەر بەرژەوەندی گشتی بەشداری تێدا دەكات.

هەر لەبارەی كۆبوونەوەكەو بەشداریكردنیشەوە، هەریەك لەبزوتنەوەی گۆڕان و كۆمەڵی ئیسلامی رایانگەیاند كە نوێنەریان بەشداری لەو كۆبوونەوەیەدا ناكات كە بڕیارە لەنێوان لایەنەكانی سیاسیەكانی هەرێم و مەسعود بارزانیدا بەڕێوەدەچێت.

لەوبارەیەشەوە شۆڕش حاجی وتەبێژی بزوتنەوەی گۆڕان بەمیدیای رەسمی گۆڕانی رایگەیاندوە: بەشداری كۆبونەوەكەی سبەینێی مەسعود بارزانی و لایەنە سیاسییەكان ناكەین، چونكە بڕوامان وایە بەر لە هەموو پرسێك پێویستە پەرلەمان كارابكرێتەوە، هەروەها پێویستە ژیان و گوزەرانی‌ هاووڵاتیان باش بكرێت.

هاوكات رێبوار حەمەد وتەبێژی رەسمی كۆمەڵی ئیسلامیش بە PUKmediaی راگەیاند: كۆمەڵی ئیسلامی بەشداری كۆبوونەوەی لایەنە سیاسیەكانی هەرێم لەگەڵ مەسعود بارزانی ناكات.

PUKmedia گۆران وەهاب