ئه‌و كه‌سانه‌ی بۆ سه‌رۆكی ئێران ناویان په‌سه‌ند كراوه‌

ئه‌و هه‌شت كه‌سه‌ی تائێستا ناوه‌كانیان په‌سه‌ندكراوه‌

ئه‌مڕۆ 21-5 کاتی یاسایی شورای نیگه‌هبانی ئێران بۆ په‌سه‌ندکردنی ناوی کاندیداکانی یازده‌هه‌مین خولی سه‌رۆکایه‌تی کۆمار کۆتایی هات و ئه‌م شورایه‌ ناوی په‌سه‌ندکراوه‌کانی داوه‌ته وه‌زاره‌تی ناوخۆ که ئه‌وانیش 48 سه‌عات کاتیان له‌به‌رده‌ستدایه بۆ ئه‌وه‌ی ناوه‌کان رابگه‌یه‌نن و دوای راگه‌یاندنی ناوه‌کانیش هه‌ڵمه‌ته‌کانی هه‌ڵبژاردن ده‌ست پێبکات.

به‌ڵام ئاژانسه‌کانی ئێران به تایبه‌ت ئاژانسی میهر له هه‌واڵێکدا به پێی سه‌رچاوه‌ تایبه‌ته‌کانی خۆی که زۆربه‌ی ئاژانس و ماڵپه‌ڕه‌کانی دیکه‌ش رایانگه‌یاندووه شورای نیگه‌هبان ناوی 8 که‌سی بۆ کێبڕکێی کۆتایی هه‌ڵبژاردنی کۆتایی سه‌رۆکایه‌تی کۆمار په‌سه‌ندکردووه که بریتین له: غولامعه‌لی حه‌دادعادل سه‌رۆک پێشووی په‌رله‌مان، سه‌عید جه‌لیلی سکرتێری ئه‌نجومه‌نی ئاسایشی نه‌ته‌وه‌یی، موحسن ره‌زایی فه‌رمانده‌ی پێشووی سوپای پاسداران، حه‌سه‌ن روحانی سکرتێری پێشووی ئه‌نجومه‌نی ئاسایشی نه‌ته‌وه‌یی، محه‌مه‌دره‌زا عارف جێگری پێشووی سه‌رۆک کۆمار، محه‌مه‌دباقر قاڵیباف سه‌رۆکی شاره‌وانی تاران، محه‌مه‌د غه‌ره‌زی وه‌زیری پێشووی گه‌یاندن، عه‌لی‌ئه‌کبه‌ر ویلایه‌تی وه‌زیری پێشووی ده‌ره‌وه.

به‌ڵام ئه‌وه‌ی که سه‌رنجی کارناسان و خه‌ڵکی بۆلای خۆی راکێشاوه په‌سه‌ندنه‌کردنی ناوی هه‌ریه‌که له ‌هاشمی ره‌فسه‌نجانی و ئیسفه‌ندیار ره‌حیم‌مه‌شایی‌ه.
هاشمی ره‌فسه‌نجانی که پێشتر 8 سال سه‌رۆک په‌رله‌مان، 8 سال سه‌رۆک کۆمار و سه‌رۆکی ئه‌نجومه‌ی خوبرگان و ئێستاش سه‌رۆکی ئه‌نجومه‌نی دیاریکردنی به‌رژه‌وه‌ندی ئێرانه، ئه‌مجاره له لایه‌ن باڵی ریفۆرمخوازه‌وه پشتیوانی ده‌کرا و ده‌وترا له‌م هه‌ڵبژاردنانه‌دا زۆرترین ده‌نگی ده‌بێت.

ئیسفه‌ندیار ره‌حیم‌مه‌شایی که‌سایه‌تی نزیک له سه‌رۆک کۆماره که به هاوڕایی ئه‌حمه‌دی‌نه‌ژاد ناوی خۆی وه‌کو پاڵێوڕاو تۆمار کرد و له لایه‌ن رکابه‌ره‌کانییه‌وه به باڵی لاده‌ر ده‌ناسرێن.

ده‌بێت چاوه‌ڕوان بین وه‌زاره‌تی ناوخۆ به‌و پێیه که وتراوه سبه‌ینێ ناوه‌کان رابگه‌یه‌نێت و ببینین ئه‌و لایه‌نه سیاسییانه‌ی که ناوی پاڵێوڕاوه‌کانيان ده‌رنه‌چووه، به تایبه‌ت سه‌رۆک کۆمار، چ رێگایه‌ک ده‌گرنه به‌ر.
ده‌شوترێت له‌وانه‌یه رابه‌ری شۆڕشی ئیسلامی ئێران داوای پێداچوونه‌وه له شورای نیگه‌هبان بکات و ناوی ئه‌م دوو که‌سه‌ش بخرێته سه‌ر ناوه‌کانی دیکه‌، به‌ڵام هه‌موو ئه‌مانه گریمانه‌ن و له چه‌ند رۆژی داهاتوودا شته‌کان ئاراسته‌یه‌کی واقیعیانه‌تر ده‌گرنه پێش.

PUKmedia به‌شی هه‌واڵی نوسینگه‌ی مه‌کته‌ب له تاران