riklam

ئه‌نستیوتی ئابووری ئه‌مریكی - كورد دامه‌زرا

ئابوری 02:17 PM - 2016-12-20
.

.

له‌پانیڵێكی كراوه‌دا ئه‌نستیتیوتی ئابووری ئه‌مریكی - كورد ی بۆ لێكۆڵینه‌وه‌و گه‌شه‌پێدان و راوێژكاری دامه‌زرا

رۆژی 19-12-2016 له‌ هۆڵی سه‌عد عه‌بدوڵڵا له‌ شاری هه‌ولێر، به‌ ئاماده‌بوونی سه‌رۆكی ئه‌نجومه‌نی ئابووری حكومه‌تی هه‌رێم و هه‌ریه‌ك له‌ وه‌زیره‌كانی شاره‌وانی و گه‌شتوگوزارو كشتوكاڵ و سه‌رۆكی ژووره‌ بازرگانی و پیشه‌سازییه‌كانی هه‌رێم و سه‌رۆكی ده‌سته‌ی گشتی گه‌شتوگوزارو سه‌رۆكی یه‌كێتی وه‌به‌رهێنه‌رانی كوردستان و ژماره‌یه‌ك له‌ وه‌به‌رهێنه‌ران و خاوه‌ن كۆمپانیاكان، ئه‌نستیتیوتی ئابووری ئه‌مریكی - كورد ی بۆ لێكۆڵینه‌وه‌و گه‌شه‌پێدان و راوێژكاری دامه‌زرا.

له‌ سه‌ره‌تای كردنه‌وه‌ی پانێڵه‌كه‌دا تارا شوان دامه‌زرێنه‌رو سه‌رپه‌رشتیاری ئه‌نستیتیۆتی ئابووری ئه‌مریكی - كوردی له‌ وته‌یه‌كیدا ئاماژه‌ی به‌ گرنگی دامه‌زراندنی ئه‌نستیوته‌كه‌ كردو وتی: كردنه‌وه‌ی ئه‌م ئه‌نستیوته‌ گرنگی تایبه‌تی خۆی هه‌یه‌ بۆ په‌ره‌پێدانی هه‌موو سێكته‌ره‌كانی كشتوكاڵ و پیشه‌سازی و بازرگانی و گه‌شتوگوزارو ژینگه‌و كاره‌باو سیستمی بانكی و وه‌به‌رهێنان و زانیاری و ته‌كنه‌لۆژیا به‌تایبه‌تی له‌كاتی ئێستادا كه‌ هه‌رێمی كوردستان روبه‌ڕووی قه‌یرانی دارایی و خراپی ره‌وشی وزه‌رانی هاووڵاتیان بووه‌ته‌وه‌.

دواتر نه‌وزاد هادی پارێزاری هه‌ولێر له‌ وته‌یه‌كیدا وێڕای ده‌ستخۆشی بۆ هه‌موو هه‌وڵه‌كانی وڵاته‌ یه‌كگرتووه‌كانی ئه‌مریكا بۆ په‌ره‌پێدانی ره‌وشی ئابووری و ئاوه‌دانكردنه‌وه‌ له‌ هه‌رێمی كوردستان وتی:  دیاره‌ هه‌وڵه‌كانی ئه‌مریكا بۆ پێشخستنی و په‌ره‌پێدانی ره‌وشی ئابووری له‌ هه‌رێمی كوردستان هه‌میشه‌ جێگای بایه‌خ بووه‌، ئێمه‌ زۆر به‌گرنگییه‌وه‌ ده‌ڕوانینه‌ هه‌موو ئه‌و هه‌وڵ و كارو چالاكیانه‌ كه‌ حكومه‌تی ئه‌مریكاو كونسوڵخانه‌ی گشتی ئه‌مریكا له‌ هه‌ولێر جگه‌ له‌ پشتگیری كردنی هێزی پێشمه‌رگه‌و سوپای عیراق دژ به‌ شه‌ڕی داعش بایه‌خی زۆریان به‌ ره‌وشی ئابووری و ئاوه‌دانكردنه‌وه‌ی هه‌رێمی كوردستان داوه‌و له‌ رابردووش درێغیان نه‌كردووه‌، هه‌روه‌ها حكومه‌تی هه‌رێمی كوردستانیش هه‌میشه‌ له‌ هه‌وڵی كاراكردن و په‌ره‌پێدانه‌ په‌یوه‌ندییه‌ ئابووری و سیاسی و فه‌رهه‌نگییه‌كانی بووه‌ بۆ باشكردنی گوزه‌ران و به‌رژه‌وه‌ندییه‌كانی خه‌ڵكی كوردستان بووه‌.

وتیشی: به‌دڵنیاییه‌وه‌ دامه‌زراندنی ئه‌م په‌یمانگه‌یه‌ جێگای ئومێدو ده‌ستخۆشییه‌ كه‌ له‌ رێگه‌ی هه‌وڵه‌كانی توێژینه‌وه‌و گه‌شه‌پێدانه‌وه‌ بتوانێت كار له‌سه‌ر ته‌واوی سێكته‌ره‌كانی ئابووری له‌ هه‌رێمی كوردستان بكات هاوشێوه‌ی هه‌موو هه‌وڵه‌كانی تر كه‌ خه‌ڵكی كوردستان و رێكخراوه‌ نێوده‌وڵه‌تییه‌كان و ئه‌مریكا ده‌یدات بۆ په‌ره‌پێدان و بوژانه‌وه‌ی ئابووری له‌ هه‌رێمی كوردستاندا.

دواتریش دارا جه‌لیل خه‌یات سه‌رۆكی ژووره‌ بازرگانی و پیشه‌سازییه‌كانی هه‌رێمی كوردستان له‌ وته‌یه‌كیدا رایگه‌یاند: له‌دوا سه‌ردانی وه‌فدی ژووره‌ بازرگانی و پیشه‌سازییه‌كانی هه‌رێمی كوردستان بۆ وڵاته‌ یه‌كگرتووه‌كانی ئه‌مریكا بۆمان ده‌ركه‌وت كه‌ بواری هاوكاری كردن و هه‌ماهه‌نگی نێوان هه‌ردوولا ئێجگار زۆرن، كه‌ ئه‌مریكا ئابوورییه‌كی به‌هێزی هه‌یه‌و له‌هه‌مانكاتیشدا هه‌رێمی كوردستان كه‌ ئێجار ده‌وڵه‌مه‌نده‌ به‌ جۆره‌ها ده‌رامه‌تی سروشتی، بۆیه‌ ده‌رفه‌تی په‌ره‌پێدان و وه‌به‌رهێنانی ئابووری هاوبه‌ش ئێجگار زۆرن و ده‌توانین په‌ره‌یان پی بده‌ین و كارێكی ئاساییشه‌ كه‌زۆر له‌وڵاتانی جیهانی روبه‌ڕووی مه‌ترسی ئابووری و قه‌یرانی دارایی ده‌بنه‌وه‌، به‌ڵام گرنگ ئه‌وه‌یه‌ كه‌ ئێمه‌ له‌ هه‌وڵه‌كانمان به‌رده‌وام بین و پلانی ئابووریمان هه‌بێت بۆ ده‌رباز بوون له‌و قه‌یرانه‌.

وتیشی: له‌ هه‌موو وڵاتێك پێویسته‌ كه‌رتی تایبه‌ت رۆڵی تایبه‌تی خۆی بگێڕێت بۆ په‌ره‌پێدانی ره‌وشی ئابووری و باشكردنی گوزه‌رانی هاووڵاتیان، بۆ ئه‌م مه‌به‌سته‌ش ئێمه‌ وه‌ك ژووره‌كه‌مان له‌ مانگی 10ی ئه‌مساڵ هه‌ستاین به‌ به‌ستنی كۆنفرانسَك بۆ باشتكردنی ره‌وشی ئابووری و بازرگانی و وه‌به‌رهێنان له‌ هه‌رێمی كوردستان، خه‌شبه‌ختانه‌ له‌ ده‌رئه‌نجامه‌كانی ئه‌م كۆنفرانسه‌دا چه‌ندین راسپارده‌و پێشنیاری گرنگی لێ هاته‌ به‌رهه‌م كه‌ مایه‌ی خۆشحاڵی و جێبه‌جێكردنیانه‌ له‌ هه‌موو بواره‌كاندا.

راشیگه‌یاند: دامه‌زراندنی ئه‌مجۆره‌ ئه‌نیستیۆته‌ له‌ كاتی ئێستادا له‌ هه‌رێمی كوردستان گرنگی و بایه‌خی تایبه‌تی خۆی هه‌یه‌ كه‌ به‌ هاوكاری و هه‌ماهه‌نگی له‌گه‌ڵ حكومه‌تی هه‌رێم و پسپۆڕو شاره‌زایان له‌ بواره‌ جیاجیاكانی ئابووری كار بۆ په‌ره‌پێدان و بووژانه‌وه‌ی ئابووری هه‌رێمی كوردستان بكرێت، چونكه‌ كه‌رتی تایبه‌ت له‌ هه‌موو دونیادا به‌ بنچینه‌ی سه‌ره‌كی بوژانه‌وه‌ی ئابووری و وه‌به‌رهێنان داده‌نرێت له‌ ته‌واوی سێكته‌ره‌ جیاجیاكاندا.

له‌ كۆتاییشدا پانێڵێك له‌ نێوان ئه‌نستیۆته‌كه‌و لایه‌نه‌ په‌یوه‌ندیداره‌كانی حكومه‌تی هه‌رێم و یه‌كێتی وه‌به‌رهێنه‌ران به‌ڕێوه‌چوو.

PUKmedia  فه‌تاح حه‌سه‌ن قه‌ڵاتی - هه‌ولێر

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket