پێشانگایه‌كی شێوه‌كاری له‌یادی یه‌كه‌مین هه‌ڵبژاردنی كوردستاندا

هه‌ولێر.. له‌یادی یه‌كه‌مین هه‌ڵبژاردنی په‌رله‌مانی كوردستاندا پێشانگایه‌كی شێوه‌كاری كرایه‌وه‌

به‌ بۆنه‌ی یه‌كه‌مین خولی هه‌ڵبژاردنی په‌رله‌مانی كوردستانه‌وه‌، رۆژی 19-5 پێشانگایه‌كی تایبه‌تی هونه‌رمه‌ندی شێوه‌كار (فه‌یسه‌ڵ عوسمان) له‌ژێر ناوی (دیمه‌نه‌كانی هه‌ست) له‌ هۆڵی به‌ڕێوه‌به‌رایه‌تی هونه‌ری شێوه‌كاری له‌ هۆڵی میدیای شاری هه‌ولێر كرایه‌وه‌.

پێشانگاكه‌ به‌ ئاماده‌بوونی هه‌ریه‌ك له‌ د.ئه‌رسه‌لان بایز سه‌رۆكی په‌رله‌مانی كوردستان و پارێزگاری هه‌ولێرو ژماره‌یه‌ك له‌ په‌رله‌مه‌نتارو وه‌زیره‌كان و لێپرسراوانی حزبی و حكومی و سه‌عدی ئه‌حمه‌د پیره‌ لێپرسراوی مه‌ڵبه‌ندی 3 ی هه‌ولێری یه‌كێتیی نیشتمانیی كوردستان و ژماره‌یه‌كی به‌رچاو له‌ رۆشنبیران و هونه‌رمه‌ندان و خوێندكاران و ژنان به‌ڕێوه‌چوو.

له‌ لێدوانێكیدا بۆ ده‌زگاكانی راگه‌یاندن د.ئه‌رسه‌لان بایز سه‌رۆكی په‌رله‌مانی كوردستان رایگه‌یاند: ده‌ستخۆشی له‌م هونه‌رمه‌نده‌ ده‌كه‌م كه‌ به‌ بۆنه‌ی هه‌ڵبژاردنی په‌رله‌مانی كوردستانه‌وه‌ ئه‌م پێشانگایه‌ی كردووه‌ته‌وه‌، كه‌ له‌م رۆژه‌دا سه‌رجه‌م كۆمه‌ڵانی خه‌ڵكی كوردستان یه‌كه‌مین هه‌ڵبژاردنی په‌رله‌مانی كوردستانیان ئه‌نجامدا كه‌ په‌رله‌مان زاده‌ی ئیراده‌و بیروبۆچوونی خه‌ڵكی كوردستان بوو.

سه‌باره‌ت به‌ كردنه‌وه‌ی پێشانگاكه‌، هونه‌رمه‌ندی شێوه‌كار فه‌یسه‌ڵ عوسمان به‌ PUKmedia ی راگه‌یاند: له‌ به‌رنامه‌مدایه‌ دوو ساڵ جارێك پێشانگایه‌كی تایبه‌ت به‌ خۆم بكه‌مه‌وه‌، سه‌رجه‌م پێشانگاكانیشم بریتین له‌ دیمه‌نه‌كانی شه‌قام، ئه‌مساڵیش شه‌قامه‌كانی شاری هه‌ولێرم ده‌ستنیشان كردووه‌ له‌به‌رئه‌وه‌ی له‌ هه‌ولێر ده‌ژیم، كه‌ به‌ شێوازی جیاجیا وه‌كو هاتوچۆی خه‌ڵك له‌ كاتی بارانباران و به‌هارو هاوین و پایزو لێك نزیكبوونه‌وه‌ی سروشت و مرۆڤ و هه‌ندێك گوزارشتی ترم تێدا ده‌ربڕیوه‌.
وتیشی: پێشانگاكه‌شم 33 تابلۆی له‌خۆگرتووه‌ كه‌ به‌ زه‌یت كارم تێدا كردووه‌.

PUKmedia  پێشڕه‌و خالید - هه‌ولێر