كێشه‌كانی خانه‌قین ده‌گه‌یه‌نرێنه‌ به‌غدا

.

وه‌فدێكی  هاوبه‌شی حزبی و ئیداری سنوری شاری خانه‌قین به‌مه‌به‌ستی به‌دواداچوون و خستنه‌ڕووی كه‌كورتی و پێداویستیه‌كانی شاره‌كه‌ سه‌ردانی شاری به‌غدایان كرد،كه‌پێكهاتبوون له‌ شێركۆ میروه‌یس لێپرسراوی مه‌ڵبه‌ندی خانه‌قین وئه‌ندامی سه‌ركردایه‌تی یه‌كێتی نیشتمانیی كوردستان كه‌ سه‌رۆكی وه‌فده‌كه‌بوو، له‌گه‌ڵ هه‌ریه‌ك له‌ مامۆستا عه‌بدلعه‌زیز حه‌سه‌ن ئه‌ندامی په‌رله‌مانی عیراق و هێمن مه‌نسور جێگری مه‌ڵبه‌ندی خانه‌قین و محه‌مه‌دی مه‌لا حه‌سه‌ن قائمقامی خانه‌قین و ژماره‌یه‌ك كه‌سایه‌تی حزبی و حكومی تر. 

شێركۆ میروه‌یس ئه‌ندامی سه‌ركردایه‌تی و لێپرسراوی مه‌ڵبه‌ندی خانه‌قین له‌باره‌ی سه‌ردانه‌كه‌یان به‌ PUKmedia ی راگه‌یاند، سه‌ردانه‌كه‌م بۆ به‌غدا به‌مه‌به‌ستی گه‌یاندنی كێشه‌ وكه‌موركوتیه‌كانی شاری خانه‌قین و ناحیه‌كانی ده‌وروبه‌ری بوون ، كه‌له‌و سه‌ردانه‌دا  سه‌ره‌تا له‌گه‌ڵ دكتۆر فواد مه‌عسوم سه‌رۆك كۆماری عیراق كۆبوینه‌وه‌و به‌وردی باسمان له‌ته‌واوی كێشه‌و كه‌موركورتی و پێداویستیه‌كان كرد كه‌ روبه‌ڕووی شاره‌كه‌ بووه‌ته‌وه‌و سه‌رۆك كۆمار له‌لایه‌ن خۆیه‌وه‌ به‌ڵێنی پێداین كه‌ تاوتوێی ته‌واوی ئه‌و كێشه‌ و داواكاریانه‌ بكات و به‌دواداچوونی وردیان بۆبكات ، و داوایكرد كه‌ په‌یوه‌ندیه‌كانی ئیداره‌ی شاره‌كه‌ له‌گه‌ڵ به‌غدا باشتربكرێت ، بۆ ئه‌وه‌ی كاروباره‌كان به‌شێوه‌یه‌كی باشتر به‌ڕێوه‌بچن. 

وتیشی :له‌به‌شێكی تری سه‌ردانه‌كانماندا ، سه‌ردانی سه‌لیم جبوری سه‌رۆكی په‌رله‌مانی عیراقمان كرد ،سوپای ته‌واوی ئه‌و هاوكاری و خه‌مخۆریانه‌ی كردین كه‌ بۆ ئاواره‌كانی ناوچه‌كه‌ هه‌مان بووه‌ ،پاشان باسی ته‌واوی ئه‌و كێشانه‌مان بۆ كرد كه‌ به‌رۆكی ناوچه‌كه‌یگرتووه‌، ئه‌ویش له‌لای خۆیه‌وه‌ به‌لًَێنیدا كه‌ هه‌ماهه‌نگی ته‌واو بكات و له‌ڕێكه‌ی مامۆستا عه‌بدولعه‌زیزه‌وه‌ له‌گه‌ڵ وه‌زاره‌ته‌كاندا په‌یوه‌ندی زیاتر ببه‌ستێت بۆ ئه‌وه‌ی بتوانرێت ته‌واوی ئه‌و داواكاری و كه‌موكورتیانه‌ جێبه‌جێ بكرێن .

رونیشكرده‌وه‌،به‌شێكی تری سه‌ردانه‌كه‌مان بۆ لای وه‌زیری ناوخۆی عیراق بوو، كه‌ كێشه‌ی ئه‌فسه‌رانی سنوری خانه‌قین  له‌لیوای 8ی پاسه‌وانی سنور ،كه‌موڕی به‌ڕێوبه‌رایه‌تی پۆلیسی خانه‌قینی سه‌ربه‌ دیاله‌ بۆ باسكردو خستمانه‌ به‌رده‌ستی ، دوای تاوتوێكردنی به‌ڵێنیدا كه‌ چاره‌سه‌ری ئه‌و كێشانه‌ بكات. 

باسیله‌وه‌شكرد، دواتر بریكاری وه‌زیری نه‌وتمان له‌به‌غدا به‌سه‌ركرده‌وه‌و كێشه‌ی سوته‌مه‌نی و كارگه‌ی غازو ئه‌و كێشانه‌ی كه‌سه‌ربه‌ وه‌زاره‌ته‌كه‌ین له‌سنوری خانه‌قین پێمان گه‌یاند، پێشوازیه‌كه‌ی زۆرباشبوو، ته‌واوی پشتیوانی خۆی بۆ چاره‌سه‌ركردنی ئه‌و كێشانه‌ خسته‌ڕوو، ئه‌مه‌ له‌كاتێكدا پێشتریش بریكاری وه‌زیری نه‌وت هاوكاریه‌كی زۆر باشی ناوچه‌كه‌یكردبوو .

میروه‌یس راشیگه‌یاند، دواتر سه‌ردانی وه‌زیری رۆشنبیریمان كرد ، كه‌ دوای تاوتوێكردنی  كه‌موكورتی و پێداویستیه‌كانی شاری خانه‌قین  به‌ڵێنیدا به‌دواداچوون بۆ كردنه‌وه‌ی به‌ڕێوبه‌رایه‌تی رۆشنبیری خانه‌قین و كردنه‌وه‌ی مۆزه‌خانه‌ و شوێنه‌واری خانه‌قین ودۆزینه‌وه‌ی هه‌لی كار بۆ ده‌رچووانی زانكۆو په‌یمانگان بكات . 

لێپرسراوی مه‌ڵبه‌ندی خانه‌قین جه‌ختیله‌وه‌شكردوه‌، به‌شێكی تری سه‌ردانه‌كه‌مان بۆلای وه‌زیری دارایی عیراقبوو، بۆ چاره‌سه‌ركردنی  ئه‌و خانووانه‌ی كه‌ ژماره‌یان 600 خانووه‌ كه‌ تاپۆیان نیه‌ و خاوه‌نه‌كانیان چه‌ندین ساڵه‌ هاتوچۆده‌كه‌ن و داواده‌كه‌ن بكرێته‌ ناوی خۆیانه‌وه‌ ، كه‌ ئه‌ویش داوایكرد نوسراوه‌كانیان ئاڕاسته‌ بكرێت و تاوه‌كو به‌پێی یاسا و رێنماییه‌كان  بۆیان ته‌واو بكرێت .

PUKmedia  سامان یاروه‌یس