وه‌فدێكی كونسوڵی فه‌ره‌نسا سه‌ردانی مه‌كته‌بی سیاسی ده‌كه‌ن

بارودۆخی ناوچه‌كه‌ تاوتوێكرا

ئه‌مڕۆ رۆژی 28-11 حاكم قادر حه‌مه‌جان كارگێڕی مه‌كته‌بی سیاسیی ی.ن,ك پێشوازیكرد له‌ وه‌فدێكی كونسوڵخانه‌ی فه‌ره‌نسا له‌ هه‌رێم كرد، كه‌ پێكهاتبوون له‌ ئالان گیپیخات سه‌ركونسوڵ و ئه‌لیكسه‌نده‌ر پۆكین جێگری سه‌ركونسوڵ و خاتوو ئیلیڤیا ئیتۆند به‌رپرسی دۆسێی عیراق له‌وه‌زاره‌تی ده‌ره‌وه‌ی فه‌ره‌نسا.

له‌سه‌ره‌تای دیداره‌كه‌دا كارگێرِی مه‌كته‌بی سیاسی ئیدانه‌ی ئه‌و په‌لاماره‌ تیرۆریستیانه‌ی كرد كه‌ پاریسی –یان كرده‌ ئامانج و ژماره‌یه‌كی زۆری هاوڵاتی مه‌ده‌نی گیانیانله‌ده‌ستداو برینداربوون . 

حاكم قادر رایگه‌یاند: گرووپی تیرۆریستی داعش مه‌ترسییه‌كی جیهانییه‌ و ده‌بێت به‌ره‌نگاریی تیرۆریش له‌سه‌ر ئاستی جیهانی بێت و به‌ره‌یه‌كی فراوانتر بێت بۆ رووبه‌ڕووبوونه‌وه‌ی داعش به‌تایبه‌تی، ته‌ئكیدیكرده‌وه‌، كه‌ هاوكاتی ئۆپه‌راسیۆنی سه‌ربازی ، پێویسته‌ سه‌رچاوه‌ی دارایی و هاوكاریی تیرۆریستانیش وشك بكرێن و دواتریش شه‌رِی فكری بیری توندره‌وی و تیرۆریستی بكه‌ین.

هه‌روه‌ك باسی له‌وه‌شكرد كه‌ ئه‌مڕۆ پێشمه‌رگه‌ جه‌نگاوه‌ری دیموكراسییه‌ و دووساڵه‌ له‌سه‌نگه‌ریی به‌ره‌نگاریی تیرۆریستاندایه‌ و ،وتیشی: ئه‌م به‌ره‌نگاریی و جه‌نگه‌ وه‌كچۆن درێژخایه‌نه‌، ئاوهاش پێویستی به‌ پشتیوانی به‌رده‌وام و درێژخایه‌نه‌، رۆڵی فه‌ره‌نساش له‌ هاوكاریی و پشتیوانی جێگه‌ی ستایشه‌، 

روونیشیكرده‌وه‌، كه‌ مێژووی په‌یوه‌ندی و دۆستایه‌تی كورد و فه‌ره‌نسا دێرینه‌ و پێویست ده‌كات ئه‌م په‌یوه‌ندییه‌ پارێزراو و په‌ره‌پێدراوبێت و جه‌ختیشكرده‌وه‌ : فه‌ره‌نسا كه‌ لانكه‌ی دیموكراسییه‌ رۆڵی گرنگی هه‌یه‌ له‌ پشتیوانی كورد بۆ گه‌یشتن به‌مافه‌كانی به‌تایبه‌ت مافی چاره‌ی خۆنوسین و پشتگیریی و پشتیوانیكردنی ئه‌زمونی هه‌رێمی كوردستان.

هه‌روه‌ك له‌باره‌ی بارودۆخی سیاسیی له‌ هه‌رێم و عیراق و ناوچه‌كه‌ به‌وردی و گشتگیر قسه‌وباسی له‌سه‌ر كرا و حاكم قادر دووپاتیكرده‌وه‌،  كه‌ له‌ ئه‌گه‌ری گۆرانكاریی رۆژهه‌ڵاتی ناوه‌راست پێویسته‌ مافی گه‌لی كورد له‌به‌رچاوبگیرێت و جارێكی دیكه‌ زوڵم و ناهه‌قی لێنه‌كرێت و به‌گه‌لێكی به‌شخوراو به‌جێ نه‌هێڵدرێت.

هه‌روه‌ك رونیكرده‌وه‌ كه‌ بارودۆخی عیراق ناجێگیره‌ و چاره‌نوسیشی دابه‌شبوونه‌، چونكه‌ كێشه‌ی قوڵ له‌ نێوان شیعه‌ و سوننه‌دا هه‌یه‌ و كوردیش كێشه‌ی له‌گه‌ڵ عیراقدا هه‌یه‌.

لایخۆشییه‌وه‌ كونسوڵی فه‌ره‌نسا سوپاسی كارگێڕی مه‌كته‌بی سیاسیی كرد بۆ دووپاتكردنه‌وه‌ هاوخه‌می و به‌ستایشه‌وه‌ باسی له‌ ئازایه‌تی پێشمه‌رگه‌ له‌ جه‌نگی دژ به‌تیرۆریستان كرد و وتی: فه‌ره‌نسا پشتیوانی ئه‌وانه‌ ده‌كات كه‌ له‌ به‌ره‌ی دژ به‌تیرۆردایه‌ و شانازی به‌ هاوپه‌یمانێتی كورد و پێشمه‌رگه‌وه‌ ده‌كات و هه‌روه‌ك دووپاتیكرده‌وه‌ كه‌ تیرۆر و تیرۆریستان هه‌ره‌شه‌ن بۆسه‌ر ئازادی  و دیموكراسیی و شارستانییه‌ت و له‌دژی مرۆڤایه‌تین.

هه‌روه‌ك رایگه‌یاند: فه‌ره‌نسا نكوڵی ناكات له‌ پشتیوانی پێشمه‌رگه‌ بۆ به‌ره‌نگاربوونه‌وه‌ی تیرۆریستان و به‌رده‌وام ده‌بێت له‌ هاوكارییكردن.

PUKmedia  راگه‌یاندنی ئه‌ندامی ده‌سته‌ی كارگێڕی مه‌كته‌بی سیاسی