فه‌رمانبه‌رانی بانك: بایكۆتكردنی ده‌وامی ئێمه‌ له‌قازانجی سه‌رجه‌م فه‌رمانبه‌رانه‌

.

ئه‌مڕۆ 5-10-2015 فه‌رمانبه‌رانی به‌ڕێوه‌به‌رایه‌تی ته‌كنه‌لۆژیای بانكی له‌گه‌ڵ بانكی ئاڵای هه‌رێم له‌شاری سلێمانی بایكۆتی ده‌وامیان كردو هه‌تا مووچه‌یان پێنه‌درێت نایه‌نه‌وه‌ بۆ ده‌وامه‌كانیان.

فه‌رمانبه‌ره‌ مانگرتووه‌كانی ئه‌و بانكانه‌ تایبه‌ت به‌ PUKmedia یان راگه‌یاند: به‌هۆی دواكه‌وتنی مووچه‌كانمانه‌وه‌ ده‌ستمان له‌ كاره‌كانمان هه‌ڵگرتووه‌و بایكۆتی ده‌واممان كردو ده‌چینه‌وه‌ ماڵه‌وه‌، داوای ساده‌ترین مافی خۆمان ده‌كه‌ین كه‌ پێدانی مووچه‌یه‌.

ئه‌و فه‌رمانبه‌رانه‌ وتیشیان: ئێمه‌ هێشتا مووچه‌ی مانگی حه‌وت-مان وه‌رنه‌گرتووه‌، له‌كاتێكدا ئێستا مانگی 10 یه‌، بۆیه‌ به‌وشێوه‌یه‌ كارناكه‌ین.

راشیانگه‌یاند: ئێمه‌ راسته‌ وه‌ك به‌ڕێوه‌به‌رایه‌تی ته‌كنه‌لۆژیای بانكی له‌گه‌ڵ بانكی ئاڵای هه‌رێم بایكۆتی ده‌واممان كردووه‌، به‌ڵام بایكۆتكردنی ئێمه‌ ئاوێنه‌یه‌كه‌ بۆ سه‌رجه‌م به‌ڕێوه‌به‌رایه‌تی و فه‌رمانگه‌كانی سلێمانی، چونكه‌ مووچه‌ی مانگانه‌ی ئه‌وانیش لای ئێمه‌وه‌ بۆیان ده‌نێردرێت، بۆیه‌ ئه‌گه‌ر ئێمه‌ داوای مووچه‌ بكه‌ین، ئه‌وكات له‌ قازانجی سه‌رجه‌م فه‌رمانبه‌رانی سلێمانیه‌.

PUKmedia  لانه‌ كاشان